ជាតិ
នយោបាយជាតិ
CNRP នឹងពិភាក្សាពីការចុះឈ្មោះបោះឆ្នោតនៅក្រៅប្រទេសជាមួយ CPP
× ភ្នំពេញ៖ ប្រធានស្តីទីគណបក្សសង្គ្រោះជាតិ ឯកឧត្តម កឹម សុខា គ្រោងលើកសំណើរៀបចំការចុះឈ្មោះបោះឆ្នោតនៅក្រៅប្រទេស ទៅពិភាក្សាជាមួយគណបក្សកាន់អំណាច ដើម្បីជួយសម្រួលដល់ប្រជាពលរដ្ឋខ្មែរដែលចំណាកស្រុកក្រៅប្រទេសអាចចុះឈ្មោះបោះឆ្នោតបាន មុនការបោះឆ្នោតឆ្នាំ២០១៨ខាងមុខ។ អ្នកនាំពាក្យគណបក្សប្រជាជនកម្ពុជា លោក សុខ ឥសាន ឆ្លើយតបថា បើចង់ឲ្យមានការចុះឈ្មោះបោះឆ្នោតនៅក្រៅប្រទេសនោះ លុះត្រាតែមានការធ្វើវិសោធនកម្មច្បាប់បោះឆ្នោតជាមុនសិន។
បើទោះជាការចុះឈ្មោះបោះឆ្នោតបានបិទបញ្ចប់ហើយក្តី តែអវត្តមានពលរដ្ឋនៅក្រៅប្រទេសច្រើននោះ គឺនៅតែជាក្តីកង្វល់របស់ឯកឧត្តម កឹម សុខា ប្រធានស្តីទីគណបក្សសង្គ្រោះជាតិ។ ឯកឧត្តម កឹម សុខា ដែលទើបតែទទួលបានការលើកលែងទោសពីព្រះមហាក្សត្រ ក្រោមការអន្តរាគមន៍ពីនាយករដ្ឋមន្ត្រី ហ៊ុន សែន នោះ យល់ឃើញថា ការចុះឈ្មោះបោះឆ្នោតរយៈពេល៣ខែកន្លងមកនេះ នៅមានភាពរាំងស្ទះសម្រាប់ពលរដ្ឋចំណាកស្រុកក្រៅប្រទេស ដែលពួកគេពុំមានលទ្ធភាពគ្រប់គ្រាន់ ក្នុងការវិលមកចុះឈ្មោះបោះឆ្នោតបានឡើយ។ ត្រង់ចំណុចនេះប្រធានស្តីទីបក្សប្រឆាំងរូបនេះ អះអាងថា លោកនឹងលើកសំណើរៀបចំការចុះឈ្មោះបោះឆ្នោតនៅក្រៅប្រទេស ទៅពិភាក្សាជាមួយគណបក្សកាន់អំណាច ដើម្បីជួយសម្រួលដល់ប្រជាពលរដ្ឋខ្មែរចំណាកស្រុកទាំងនេះ ផ្ដល់ឱកាសឲ្យពួកគេអាចចុះឈ្មោះបាន សម្រាប់មានសិទ្ធិបោះឆ្នោតនៅឆ្នាំ២០១៨ខាងមុខ។
ថ្លែងក្នុងពិធីអបអរសាទរខួបលើកទី៦៨ នៃទិវាសិទ្ធិមនុស្សអន្ដរជាតិ ក្រោមប្រធានបទ «សិទ្ធិក្នុងការបោះឆ្នោត» នៅថ្ងៃទី១០ ធ្នូនេះ ឯកឧត្តម កឹម សុខា បានបញ្ជាក់ដូច្នេះថា៖«គណបក្សទាំងពីរនេះគួរតែអង្គុយជាមួយគ្នា រៀបចំធ្វើច្បាប់ ឬវិសោធនកម្មច្បាប់បោះឆ្នោត ដើម្បីឲ្យមានកន្លែងចុះឈ្មោះបោះឆ្នោតនៅកន្លែងណាដែលខ្មែរយើងមានចំនួនច្រើននៅទៅនោះ ដើម្បីងាយស្រួលឲ្យពួកគាត់បោះឆ្នោតបាន។ នេះជាប្រយោជន៍ទាំងអស់គ្នាទេ…។ ដូចនេះខ្ញុំក្នុងនាមគណបក្សសង្គ្រោះជាតិ ខ្ញុំនឹងពិភាក្សាជាមួយដៃគូ នៅក្នុងគណបក្សប្រជាជនកម្ពុជា ដើម្បីពិនិត្យលទ្ធភាពធ្វើច្បាប់ ឬវិសោធនកម្មច្បាប់ណា ដើម្បីផ្ដល់ឱកាសឲ្យពលរដ្ឋខ្មែរយើង ដែលមានសិទ្ធិបោះឆ្នោត អាចមានសិទ្ធិបោះឆ្នោតតាមលទ្ធភាពដែលយើងត្រូវធ្វើជាដំណាក់ៗ…។
សំឡេងប្រធានស្តីទីគណបក្សសង្គ្រោះជាតិ៖
ជាការឆ្លើយតបអ្នកនាំពាក្យគណបក្សប្រជាជនកម្ពុជា លោក សុខ ឥសាន បានបង្ហើរសម្ដីហាក់មិនខុសពីឯកឧត្តម កឹម សុខា ឡើយ ដោយលោកថា បើចង់ឲ្យមានការចុះឈ្មោះបោះឆ្នោតនៅក្រៅប្រទេសនោះ លុះត្រាតែមានការធ្វើវិសោធនកម្មច្បាប់បោះឆ្នោតជាមុនសិន។ ថ្លែងប្រាប់សារព័ត៌មានថ្មីៗលោក សុខ ឥសាន បានបញ្ជាក់ដូច្នេះថា៖«វាជាសិទ្ធិរបស់ក្រុមតំណាងរាស្ត្រគណបក្សសង្គ្រោះជាតិក្នុងការសុំធ្វើវិសោធនកម្មច្បាប់បោះឆ្នោត ។ តែសិទ្ធិវិសោធនកម្មច្បាប់ចុះឈ្មោះបោះឆ្នោតនៅក្រៅប្រទេសនេះ លុះត្រាមានការអនុម័តពីខាងតំណាងរាស្ត្រគណបក្សយើងទាំង៦៨សិនទើបអាចធ្វើបាន។ តែអ្វីដែលសំខាន់នោះគឺត្រូវអាស្រ័យលើមេដឹកនាំគណបក្សសម្ដេច ហ៊ុន សែន ថាតើសម្ដេចគាត់នឹងពិភាក្សា ហើយយល់ព្រមដែរទេ ព្រោះយើងចាំតែធ្វើតាមការណែនាំរបស់មេបក្សប៉ុណ្ណោះ»។
បន្ថែមពីលើនេះអ្នកនាំពាក្យគណបក្សប្រជាជនកម្ពុជារូបនេះ បានព្រលយពាក្យពញ្ញាក់អារម្មណ៍គណបក្សប្រឆាំងវិញបែបនេះថា៖« កន្លងមកតែងតែមានការរិះគន់ជាច្រើនពីខាងគណបក្សប្រឆាំងមកលើមន្ត្រីតាមស្ថានទូតនៅក្រៅប្រទេស។ ដូច្នេះគណបក្សយើងខ្លាចតែខាងគណបក្សប្រឆាំងមានបញ្ហាទៅវិញទេ ព្រោះបើសិនជាចង់ចុះឈ្មោះបោះឆ្នោតនៅក្រៅប្រទេស គឺមានតែដាក់នៅតាមស្ថានទូត ហើយពួកគេ(CNRP)ដឹងស្រាប់ថា មន្ត្រីទូតក្រៅប្រទេសគឺចេញពីការជ្រើសតាំងពីរដ្ឋាភិបាល ដូច្នេះគណបក្សប្រឆាំងអាចនឹងមានការរិះគន់ថា ការចុះឈ្មោះ ការបោះឆ្នោតនៅការិយាល័យក្រៅប្រទេសនោះ មិនមានភាពយុត្តិធម៌ កេងបន្លំឆ្នោតជាដើមទៀត»។
គួរបញ្ជាក់ថា ការចុះឈ្មោះបោះឆ្នោតរយៈពេល៣ខែកន្លងមកនេះ ប្រជាពលរដ្ឋខ្មែរដែលបានទៅចុះឈ្មោះបោះឆ្នោតមានចំនួន ៧,៨៧៣,១៩៤ ប៉ុណ្ណោះ ក្នុងចំណោមប្រជាពលរដ្ឋដែលមានអាយុគ្រប់បោះឆ្នោតចំនួន ៩,៦៦៤,២១៦ លាននាក់។ បើតាមសមាជិកគណៈកម្មាធិការរៀបចំការបោះឆ្នោតគជប លោក សូ សុផាត
មូលហេតុដែលពលរដ្ឋចុះឈ្មោះមិនគ្រប់ចំនួនតាមការប៉ាន់ស្មានស្ថិតិនោះ បណ្ដាលមកពីពលរដ្ឋដែលចំណាកស្រុកបម្រើការងារនៅក្រៅប្រទេសទាំងស្របច្បាប់ និងខុសច្បាប់នោះមានចំនូនជាង១លាននាក់។ ចំណែកពលរដ្ឋពលរដ្ឋមិនអាចទៅចុះឈ្មោះបាននោះ មកពីកំពុងស្ថិតនៅក្នុងស្ថានភាពជាប់ពន្ធនាគារ។ កំពុងសម្រាកព្យាបាលជំងឺនៅតាមមន្ទីពេទ្យ។ ជនចាស់ជរាឬជនពិការដែលពិបាកធ្វើដំណើរការ និងករណីទទួលមរណភាព៕
Tag:
កឹម សុខា
បោះឆ្នោត
CNRP
CPP
© រក្សាសិទ្ធិដោយ thmeythmey.com