សេដ្ឋកិច្ច
NBC កំណត់ឲ្យគ្រឹះស្ថានហិរញ្ញវត្ថុបញ្ចេញកម្ចីប្រាក់រៀល ឲ្យបានយ៉ាងតិច ១០ភាគរយ
× គ្រឹះស្ថានធនាគារ និងហិរញ្ញវត្ថុទាំងអស់ ត្រូវបានតម្រូវឲ្យបញ្ចេញកម្ចីជាប្រាក់រៀល ឲ្យបានយ៉ាងតិច ១០ភាគរយនៃទំហំកម្ចីសរុបរបស់ខ្លួន។ នេះបើតាមប្រកាសរបស់ធនាគារជាតិនៃកម្ពុជា (NBC) នៅថ្ងៃទី១ខែធ្នូ។
ប្រកាសនេះបានចែងយ៉ាងដូច្នេះថា៖«គ្រឹះស្ថានទាំងអស់ត្រូវមានឥណទានជារូបិយវត្ថុជាតិ យ៉ាងតិច១០ភាគរយនៃសំពៀតឥណទានសរុប»។
ការកំណត់របស់ NBC ដូចនេះ គឺដើម្បីជំរុញការផ្ដល់ឥណទានជារូបិយវត្ថុជាតិ និងបង្កើនការប្រើប្រាស់រូបិយវត្ថុជាតិនៅក្នុងចរន្តសេដ្ឋកិច្ច។ នេះបើតាមប្រកាសខាងលើ ដែលតម្រូវឲ្យគ្រឹះស្ថានហិរញ្ញវត្ថុត្រូវចែងពីការផ្ដល់ឥណទានជារូបិយវត្ថុជាតិក្នុងយុទ្ធសាស្ត្រ និងគោលនយោបាយរបស់ខ្លួន។
គ្រឹះស្ថានធនាគារ និងហិរញ្ញវត្ថុទាំងអស់ ដែលស្ថិតនៅក្រោមអាណាព្យាបាលរបស់ NBC ត្រូវអនុវត្តការកំណត់ខាងលើ ចាប់ពីថ្ងៃទី១ខែធ្នូឆ្នាំនេះ និងអនុវត្តឲ្យបានពេញលេញយ៉ាងយូរត្រឹមថ្ងៃទី៣១ខែធ្នូឆ្នាំ២០១៩ ។ ប្រកាសដដែលនេះបញ្ជាក់យ៉ាងដូចនេះ និងបានចែងទៀតថា ធនាគារជាតិអាចតម្រូវឲ្យគ្រឹះស្ថានធនាគារនិងហិរញ្ញវត្ថុបង្កើនការផ្ដល់ឥណទានជារូបិយវត្ថុជាតិបន្ថែមទៀត ស្របតាមការចាំ បាច់៕
© រក្សាសិទ្ធិដោយ thmeythmey.com