អន្តរជាតិ
ជប៉ុន ចង់ឲ្យឆ្កែឈ្មោលជាកាដូសម្រាប់លោក ពូទីន តែត្រូវរុស្សីបដិសេធ ប្រធានាធិបតី ពូទីន និងនាយករដ្ឋមន្ត្រី អាបេ ជាមួយនឹងឆ្កែញី Yume (រូបភាព Playbuzz)
× ក្រុងមូស្គូ ទំនងជាបានបដិសេធទទួលកាដូជាឆ្កែឈ្មោលមួយក្បាលរបស់ក្រុងតូក្យូ សម្រាប់ជាអនុស្សាវរីយ៍ដល់ប្រធានាធិបតីរុស្សី វ្ល៉ាឌីមៀរ ពូទីន ដែលនឹងជួបជាមួយនាយករដ្ឋមន្ត្រីជប៉ុន ស៊ិនហ្សូ អាបេ នៅសប្ដាហ៍ក្រោយ។ ជំនួបកំពូលនេះ សំដៅពង្រឹងទំនាក់ទំនងរវាងមហាអំណាចទាំងពីរឡើងវិញ ដែលល្អក់កករនាពេលកន្លងមក ដោយសារទំនាស់ដែនអធិបតេយ្យលើប្រជុំកោះគូរីល។
ការប៉ុនប៉ងរបស់ជប៉ុនដែលចង់អនុវត្តគោលនយោបាយការបរទេសដោយប្រើសត្វឆ្កែ (Puppy Diplomacy) ជាមួយរុស្សី បានបរាជ័យ បន្ទាប់ពីរុស្សីមិនព្រមទទួលឆ្កែឈ្មោលមួយក្បាល ដែលជប៉ុនប្រុងយកធ្វើជាកាដូសម្រាប់ប្រធានាធិបតី វ្ល៉ាឌីមៀ ពូទីន ក្នុងជំនូបជាមួយនាយករដ្ឋមន្ត្រី ស៊ិនហ្សូ អាបេ ។ លោក ពូទីន និងលោក អាបេ នឹងជួបគ្នានៅថ្ងៃទី១៥ ដល់ថ្ងៃទី១៦ ខែធ្នូ។
ទីភ្នាក់ងារព័ត៌មាន Reuters ផ្សាយថា ពីដំបូងឡើយ រដ្ឋាភិបាលលោក អាបេ គ្រោងនឹងជូនឆ្កែឈ្មោល Akita ជាកាដូសម្រាប់លោក ពូទីន ។ ជប៉ុន ចង់ឲ្យឆ្កែ Akita ទៅមេដឹកនាំរុស្សី ដើម្បីធ្វើជាដៃគូជាមួយឆ្កែញី Yume ដែលជប៉ុនបានប្រគល់ឲ្យលោក ពូទីន កាលពីឆ្នាំ២០១២។ ប៉ុន្តែ សមាជិកសភាម្នាក់របស់ជប៉ុន និយាយថា រុស្សី បានបដិសេធសំណើនេះទៅហើយ។
លោក Koichi Hagiuda សមាជិកសភាជប៉ុនបានសរសេរលើ Blog របស់លោកថា៖ «យើងបានទទួលព័ត៌មានពីសមភាគីរុស្សី ហើយជារឿងមិនល្អនោះ គឺក្ដីសង្ឃឹមរបស់យើងដែលចង់យកសត្វឆ្កែធ្វើជាកាដូនោះ ត្រូវរលាយអស់ហើយ។ យ៉ាងណាក្ដី សមាជិកសភារូបនេះ មិនបានបញ្ជាក់ពីមូលហេតុដែលរុស្សីបដិសេធសំណើនេះឡើយ។
ប្រធានាធិបតី ពូទីន ជាមនុស្សស្រឡាញ់ចូលចិត្តសត្វ។ ជារឿយៗ គេសង្កេតឃើញរូបថតរបស់លោក ជាមួយនឹងសត្វជាច្រើនដូចជា សត្វសេះ ត្រីដូលហ្វីន និងសត្វខ្លាឃ្មុំជាដើម។ ក្រៅពីឆ្កែញី Yume លោកក៏ជាម្ចាស់សត្វចៀម Buffy ដែលជាប្រភេទចៀមមកពីប៊ុលហ្ការី។ នាយករដ្ឋមន្ត្រីប៊ុលហ្ការី ជាអ្នកប្រគល់សត្វចៀមនេះឲ្យលោក ពូទីន នៅក្នុងឆ្នាំ២០១០។
ងាកមកជំនួបកំពូល ពូទីន-អាបេ វិញ មេដឹកនាំទាំងពីរ នឹងពិភាក្សាគ្នាលើប្រធានបទសំខាន់ជាច្រើនទាក់ទិននឹងបញ្ហាសន្តិសុខដូចជា ការចាប់ផ្ដើមការចរចាសន្តិសុខឡើងវិញ ក៏ដូចជាការចាប់ផ្ដើមសមយុទ្ធជើងទឹករួមគ្នា ដែលជាប់គាំងតាំងពីការលេបយកតំបន់គ្រីមៀរបស់រុស្សីមក។ លើសពីនេះ កិច្ចព្រមព្រៀងពាណិជ្ជកម្មមួយចំនួន ក៏នឹងត្រូវចុះហត្ថលេខាអំឡុងជំនួបនេះផងដែរ៕
Tag:
ជប៉ុន
រុស្សី
វ្ល៉ាឌីមៀរ ពូទីន
© រក្សាសិទ្ធិដោយ thmeythmey.com