អន្តរជាតិ
ដូណាល់ ត្រាំ ងាករកអ្នកជំនួញធំៗសម្រាប់តំណែងរដ្ឋមន្ត្រីការបរទេស
× ប្រធានាធិបតីជាប់ឆ្នោតអាមេរិក ដូណាល់ ត្រាំ នៅតែមិនទាន់រកបានបេក្ខជនសក្តិសមសម្រាប់តំណែងរដ្ឋមន្ត្រីការបរទេសនៅឡើយទេ ខណៈលោកចាប់ផ្ដើមផាត់ចេញបុគ្គលខ្លះចេញពីបញ្ជីបេក្ខជនសម្រាប់តំណែងសំខាន់នេះ។ លោក ដូណាល់ ត្រាំ ក៏បានសំឡឹងរកបេក្ខភាពផ្សេងទៀតរួមទាំងម្ចាស់ក្រុមហ៊ុនធំៗនៅអាមេរិក ដើម្បីពិចារណារកបេក្ខភាពដែលអាចគ្រប់គ្រងក្រសួងការបរទេសបាន។
មកទល់ពេលនេះ ប្រធានាធិបតី ដូណាល់ ត្រាំ បានប្រកាសពីបេក្ខភាពជាច្រើនរួចហើយសម្រាប់តំណែងនៅក្នុងគណៈរដ្ឋមន្ត្រីថ្មី ក៏ដូចជារដ្ឋបាលថ្មីរបស់លោក ដែលនឹងត្រូវស្បថចូលកាន់តំណែងនៅថ្ងៃទី២០ ខែមករាខាងមុខ។ ប៉ុន្តែលោក ដូណាល់ ត្រាំ ហាក់មានការលំបាកក្នុងការជ្រើសរើសបេក្ខភាពសម្រាប់រដ្ឋមន្ត្រីការបរទេស ដ្បិតមានឥស្សរជនជាច្រើន ដែលអាចកាន់តំណែងនេះបាន។
នៅពេលនេះ លោក ដូណាល់ ត្រាំ ចាប់ផ្ដើមសម្រិតសម្រាំងបេក្ខជនសម្រាប់តំណែងប្រមុខការទូតនេះ ដោយបេក្ខជនខ្លះក៏បានប្រកាសដកខ្លួនចេញពីការប្រជែងតំណែងនេះដែរ។ អតីតភិបាលក្រុង New York លោក Rudy Giuliani បានសម្រេចចិត្តមិនប្រជែងកៅអីរដ្ឋមន្ត្រីការបរទេសឡើយ ដ្បិតលោក ត្រាំ ក៏កំពុងស្វែងរកបេក្ខភាពដទៃទៀត ក្រៅពីបុគ្គលបួនរូបដែលក្រុមការងាររបស់លោកជ្រើសរើសរួចហើយ។
បេក្ខភាពបីរូបផ្សេងទៀតដែលគេរំពឹងថា អាចកាន់តំណែងប្រមុខការបរទេសមាន អតីតបេក្ខជនប្រធានាធិបតី Mitt Romney, អតីតប្រមុខ CIA ឧត្តសេនីយ៍ David Petraeus និងសមាជិកព្រឹទ្ធសភារដ្ឋ Tennessee លោក Bob Corker ។ នាពេលចុងក្រោយនេះ លោក ត្រាំ ក៏បានពង្រីកការស្វែងរកបេក្ខភាពតំណែងសំខាន់លើក្រុមសមាជិកសភា និងបណ្ដាអ្នកជំនួញធំៗនៅអាមេរិក។
នាយកក្រុមហ៊ុន Exxon Mobil Corp លោក Rex Tillerson និង លោក Alan Mulally អតីតនាយកប្រតិបត្តិមកពីក្រុមហ៊ុន Ford Motor Co និង Boeing Co កំពុងស្ថិតក្នុងរ៉ាដារបស់ប្រធានាធិបតីជាប់ឆ្នោត ដូណាល់ ត្រាំ ទាំងអស់។ សារព័ត៌មាន The Wall Street Journal បានស្រង់ប្រភពពីមន្ត្រីនៃក្រុមការងារលោក ត្រាំ ថាលោក Tillerson មានភាគរយខ្ពស់ជាងគេសម្រាប់តំណែងរដ្ឋមន្ត្រីការបរទេស។
ការសំឡឹងរកបេក្ខភាពរដ្ឋមន្ត្រីការបរទេសពីក្នុងចំណោមអ្នកជំនួញធំៗ ត្រូវគេមើលឃើញថា ជាយុទ្ធសាស្ត្រថ្មីរបស់ប្រធានាធិបតីជាប់ឆ្នោត ដូណាល់ ត្រាំ ដែលចង់បានអ្នកមានបទពិសោធន៍ដឹកនាំ ទៅគ្រប់គ្រងក្រសួងការបរទេស។ រឿងស្រដៀងគ្នានេះ កើតឡើងនៅឯមន្ទីរបញ្ចកោណ ដោយលោក ត្រាំ បានជ្រើសរើសឧត្តមសេនីយ៍ចូលនិវត្តន៍ James Mattis សម្រាប់តំណែងរដ្ឋមន្ត្រីការពារជាតិផងដែរ។ លោក James Mattis ជាអតីតមេទ័ពអាមេរិកអំឡុងសង្គ្រាមនៅអ៊ីរ៉ាក់ និងអាហ្វហ្គានីស្ថាន៕
Tag:
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com