សុវត្តិភាព ចរាចរណ៍
អ្នកស្លាប់ និងរបួសជាង៧ពាន់នាក់ ក្នុងករណីគ្រោះថ្នាក់ចរាចរណ៍ រយៈពេល១១ខែ
×![]()
ដោយ: ធឿន បញ្ញាឬទិ្ធ
ភ្នំពេញ៖ គិតត្រឹមរយៈពេល១១ខែមកនេះ អ្នកស្លាប់ និងរបួសដោយសារគ្រោះថ្នាក់ចរាចរណ៍មានចំនួនជាង៧ពាន់នាក់ ដែលតួលេខនេះមានការថយចុះប្រើប្រៀបធៀបរយៈពេលដូចគ្នាក្នុងឆ្នាំ២០១៥។ នេះបើតាមការចុះផ្សាយរបស់អគ្គស្នងការដ្ឋាននគរបាលជាតិ។
អគ្គស្នងការរងនគរបាលជាតិលោក ហ៊ឹម យ៉ាន បានឲ្យដឹងថា គ្រោះថ្នាក់ចរាចរណ៍ក្នុងរយៈពេល១១ខែនេះ បានកើតឡើងចំនួន ៣៣៣៨លើក បើធៀបនឹងឆ្នាំ២០១៥ មានចំនួន ៣៧៨៩លើក ពោលគឺថយចុះចំនួន ៤៥១លើក ស្មើនឹង១២ភាគរយ។ ចំណែកអ្នកស្លាប់នៅក្នុងឆ្នាំ២០១៦នេះ មានចំនួន ១៥៧៦នាក់ ថយចុះចំនួន ២៥៩នាក់ ស្មើនឹង ១៤ភាគរយ បើធៀបនឹងឆ្នាំ២០១៥ មានអ្នកស្លាប់ ១៨៣៥នាក់។ រីឯអ្នករបួសវិញ មានចំនួន ៥៩៦២នាក់ គឺថយចុះចំនួន ៥៩៦នាក់ ស្មើនឹង ៩ភាគរយ បើធៀបកាលពីឆ្នាំមុន មានចំនួន ៦៥៥៨នាក់។
ចំពោះករណីគ្រោះថ្នាក់ចរាចរណ៍ជាង៣ពាន់លើកនេះ បានកើតឡើងនៅតាមរាជធានីភ្នំពេញ ៣៤១លើក, ព្រះសីហនុ ២៦៦លើក, កំពត ២០៦លើក, ពោធិ៍សាត់ ២០២លើក និងខេត្តដែលកើតមាន គ្រោះ ថ្នាក់តិចជាងគេ មាន៖ ព្រះវិហារ ៤២លើក, ស្ទឹងត្រែង ៥៣លើក, ឧត្តរមានជ័យ ៥៦លើក, មណ្ឌលគិរី ៥៧លើក, ប៉ៃលិន ៥៩លើក។
ដោយឡែកកត្តាដែលនាំឲ្យកើតមានគ្រោះថ្នាក់ចរាចរណ៍ ទី១.វ៉ាជែង, ទី២.បត់ឆ្លងផ្លូវខ្វះការប្រុងប្រយ័ត្ន និងទី៣.បើកបរក្នុងស្ថានភាពស្រវឹងជាដើម។ នេះបើតាមលោក ហ៊ឹម យ៉ាន ដែលបានបញ្ជាឲ្យនគរបាលត្រូវរឹតបន្តឹងការអនុវត្តច្បាប់ចរាចរណ៍ផ្លូវគោកឲ្យបានខ្ជាប់ខ្ជួន ជាពិសេសផ្សព្វផ្សាយច្បាប់ចរាចរណ៍ផ្លូវគោកដល់ប្រជាពលរដ្ឋ និងសហគមន៍ឲ្យយល់កាន់តែច្បាស់ពីគ្រោះថ្នាក់នេះ៕
Tag:
គ្រោះថ្នាក់ចរាចរណ៍
© រក្សាសិទ្ធិដោយ thmeythmey.com
