លោកស្រី ស៊ូជី ពេញចិត្តខ្លាំងដែលរដ្ឋមន្ត្រីមិនពុករលួយ

អន្តរជាតិ

លោកស្រី ស៊ូជី ពេញចិត្តខ្លាំងដែលរដ្ឋមន្ត្រីមិនពុករលួយ

10, Dec 2016 , 3:42 pm

រូបភាព

ដោយ: តន ចាន់រិទ្ធារ៉ា

ពីទឹកដីសិង្ហបុរី មេដឹកនាំមីយ៉ាន់ម៉ា លោកស្រី អ៊ុងសាន ស៊ូជី បានបង្ហាញការសប្បាយចិត្តជុំវិញសកម្មភាពរបស់រដ្ឋាភិបាលលោកស្រីនារយៈពេល៩ខែចុងក្រោយនេះ ព្រោះលោកស្រីអាចជម្នះការប្រឈមទាំងឡាយបាន។ បើទោះជារដ្ឋាភិបាលថ្មីមិនទាន់បានធ្វើអ្វីគួរឲ្យកត់សម្គាល់ លោកស្រី ស៊ូជី បាននិយាយថា ភាពជោគជ័យនៃការដឹកនាំរបស់លោកស្រី គឺមីយ៉ាន់ម៉ាអាចធ្វើដំណើរឆ្ពោះទៅមុខ ដោយមិនចាំមានវត្តមានលោកស្រីឡើយ។

ក្នុងបទសម្ភាសន៍ជាមួយទូរទស្សន៍សិង្ហបុរី ទីប្រឹក្សារដ្ឋមីយ៉ាន់ម៉ា លោកស្រី អ៊ុងសាន ស៊ូជី បានលើកឡើងពីកត្តាដើម្បីកំណត់ជោគជ័យនៃការដឹកនាំប្រទេសរបស់លោកស្រី។ ហើយលោកស្រីក៏បានការវិវត្តនៃស្ថានការណ៍នានានៅក្នុងប្រទេស ជាពិសេសស្ថានភាពហិង្សាលើជនមួស្លីមភាគតិចរ៉ូហ៊ីងយ៉ានៅក្នុងរដ្ឋ Rakhine ដែលបង្កជាការរិះគន់យ៉ាងខ្លាំងពីសំណាក់អន្តរជាតិ។

ឆ្លៀតពេលនៃកិច្ចសម្ភាសន៍ដដែលនេះ អ្នកសារព័ត៌មានសិង្ហបុរីក៏បានសួរលោកស្រី ស៊ូជី ថា តើលោកស្រីពេញចិត្តនឹងស្ថានការណ៍នយោបាយក្នុងស្រុកក្នុងពេល៩ខែកន្លងទៅឬទេ? ទីប្រឹក្សារដ្ឋមីយ៉ាន់ម៉ា ក៏បានឆ្លើយថា លោកស្រីមិនដែលគិតពីរឿងសប្បាយចិត្ត ឬមិនសប្បាយចិត្តឡើយ ដ្បិតលោកស្រីដឹងថា បញ្ហាប្រឈមជាច្រើននឹងកើតឡើងមិនខាន តែលោកស្រីក៏បានជម្នះរាល់ឧបសគ្គជាច្រើនហើយដែរ។

លោកស្រី ស៊ូជី ដែលជារដ្ឋមន្ត្រីការបរទេសដែរនោះ បញ្ជាក់ថា អ្វីដែលធ្វើឲ្យលោកស្រីរីករាយខ្លាំង គឺរដ្ឋមន្ត្រីទាំងអស់មិនពុករលួយអ្វីឡើយ។ «វា គឺពិតជាសំខាន់ណាស់។ ប្រជាជនទូទៅក៏បានទទួលស្គាល់លើរឿងនេះដែរ ប៉ុន្តែនៅមានមន្ត្រីថ្នាក់ក្រោមខ្លះ មិនទាន់ធ្វើអ្វីដូចបំណងរបស់យើងនៅឡើយទេ។» នេះជាការបញ្ជាក់បន្ថែមលោកស្រី ស៊ូជី ក្នុងបទសម្ភាស៍ជាមួយទូរទស្សន៍ Channel NewsAsia ដែលផ្សាយនៅថ្ងៃទី៨ ខែធ្នូ។

ទាក់ទិននឹងបញ្ហាពុករលួយនេះ ជ័យលាភីណូបែលសន្តិភាពឆ្នាំ១៩៩១ រូបនេះលើកឡើងដែរថា អំពើពុករលួយ មិនទាន់ជ្រួតជ្រាបក្នុងសង្គមមីយ៉ាន់ម៉ានៅឡើយទេ ហើយនេះជារឿងល្អមួយ។ លោកស្រីបន្តថា ប្រជាជនមីយ៉ាន់ម៉ាបានចាត់ទុកអំពើពុករលួយជា «ដំណើរការនៃជីវិត» តែពួកគេមិនចាត់ទុកវាជា «ផ្លូវនៃជីវិត» របស់ពួកគេឡើយ។ ដូច្នេះ នេះជារឿងគួរឲ្យលើកចិត្តមួយ។

សូមបញ្ជាក់ថា ទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី ទើបតែបញ្ចប់ទស្សនកិច្ចផ្លូវការនៅសិង្ហបុរី។ លោកស្រី បានប្រឈមមុខនឹងបញ្ហាជាច្រើននៅក្នុងប្រទេសជាពិសេសការប៉ះទង្គិចរវាងក្រុមឧទ្ទាម និងកងកម្លាំងយោធាជាដើម ហើយចុងក្រោយគឺអំពើហិង្សានៅរដ្ឋ Rakhine ។ សហគមន៍អន្តរជាតិបានដាក់សម្ពាធលើរដ្ឋាភិបាលយ៉ាងខ្លាំង ចំណែកសមាជិកអាស៊ានខ្លះទៀត ក៏បានបង្ហាញការព្រួយបារម្ភលើបញ្ហាជនជាតិរ៉ូហ៊ីងយ៉ាងផងដែរ៕