អន្តរជាតិ
នយោបាយអន្តរជាតិ
អ៊ីរ៉ង់ចុះកិច្ចព្រមព្រៀងទិញយន្តហោះក្រុមហ៊ុនប៊ូអ៊ីង៨០គ្រឿង
×
សាធារណរដ្ឋឥស្លាមអ៊ីរ៉ង់ចុះកិច្ចព្រមព្រៀងទិញយន្តហោះដឹកអ្នកដំណើរ ៨០គ្រឿងពីក្រុមហ៊ុនប៊ូអ៊ីង ដែលមានតម្លៃសរុប១៦,៦ ពាន់លានដុល្លាអាមេរិក។ យន្តហោះទាំងអស់នឹងត្រូវបញ្ជូនទៅអ៊ីរ៉ង់ក្នុងរយៈពេល ១០ឆ្នាំ ប៉ុន្តែយន្តហោះដំបូងនឹងត្រូវបញ្ជូនទៅនៅឆ្នាំ ២០១៨ខាងមុខ។
អ៊ីរ៉ង់បានបញ្ជាទិញយន្តហោះដឹកអ្នកដំណើរពីក្រុមហ៊ុនប៊ូអ៊ីង ចំនួន ៨០គ្រឿងក្នុងទំហំទឹកប្រាក់សរុប ១៦,៦ ពាន់លានដុល្លារអាមេរិក។ នេះជាការចុះកិច្ចព្រមព្រៀងពាណិជ្ជកម្មធំបំផុតមួយជាមួយក្រុមហ៊ុនអាមេរិក ក្រោយអ៊ីរ៉ង់រួចផុតពីទណ្ឌកម្មពាក់ព័ន្ធសំណុំរឿងនុយក្លេអ៊ែរនោះ។
យោងតាមសារព័ត៌មាន New York Times ក្នុងចំណោមយន្តហោះទាំង ៨០ គ្រឿងនេះមានប្រភេទយន្តហោះប៊ូអ៊ីង 737 ចំនួន ៥០គ្រឿង និងយន្តហោះប៊ូអ៊ីង ៧៧៧ ចំនួន ៣០គ្រឿងផងដែរ។ យន្តហោះដឹកអ្នកដំណើររបស់ក្រុមហ៊ុនប៊ូអ៊ីងនេះនឹងត្រូវបញ្ជូនទៅអ៊ីរ៉ង់តាមកិច្ចព្រមព្រៀងក្នុងរយៈពេល ១០ឆ្នាំ ហើយយន្តហោះជំហានដំបូងនឹងទៅដល់អ៊ីរ៉ង់នៅឆ្នាំ ២០១៨ខាងមុខនេះ។
រដ្ឋមន្ត្រីក្រសួងដឹកជញ្ជូនលោក Abbas Akhoundi ដែលបានចូលរួមក្នុងពិធីចុះហត្ថលេខាកិច្ចព្រមព្រៀង បង្ហាញអារម្មណ៍សុទិដ្ឋិនិយមចំពោះការបង្កើតកិច្ចព្រមព្រៀងនេះ ហើយលោកអះអាងថាកិច្ចព្រមព្រៀងនេះនឹងជួយបង្កើតការងារ ៨០០០កន្លែងដល់ប្រជាជនអ៊ីរ៉ង់ទៀត។
លោកបន្តថា៖«កិច្ចព្រមព្រៀងនេះជាសារមួយច្បាស់ផ្ញើទៅកាន់ពិភពលោកដែលបញ្ជាក់ថា យើងគាំទ្រសន្តិភាព សន្តិសុខ និងការលូតលាស់របស់អ៊ីរ៉ង់ពឹងផ្អែកលើនយោបាយឈ្នះៗ»។
ខាងក្រុមហ៊ុន ប៊ូអ៊ីងឯណោះវិញ ក៏កោតសរសើរការចុះកិច្ចព្រមព្រៀងជាមួយអ៊ីរ៉ង់នេះដែរដោយបញ្ជាក់ថា វាបានបង្កើតការងាររាប់ម៉ឺនដល់ប្រជាជនអាមេរិកតាមរយៈការផលិតយន្តហោះដឹកអ្នកដំណើរសម្រាប់ប្រទេសអ៊ីរ៉ង់។
ការចុះកិច្ច ព្រមព្រៀងនេះទិញលក់យន្តហោះជាមួយក្រុមហ៊ុនប៊ូអ៊ីងនេះកើតឡើង ក្រោយពេលដែលអ៊ីរ៉ង់សម្រេចបានកិច្ចព្រមព្រៀងនុយក្លេអ៊ែរជាមួយមហាអំណាចប្រាំបូកមួយ។ ទណ្ឌកម្មដែលដាក់ប្រឆាំងអ៊ីរ៉ង់ត្រូវដកចេញ ជាថ្នូរនឹងការអនុញ្ញាតឲ្យភ្នាក់ងារថាមពលបរមាណូអន្តរជាតិត្រួតពិនិត្យមើលរោងចក្រនុយក្លេអ៊ែរអ៊ីរ៉ង់រយៈពេល ២០ឆ្នាំទៅមុខដើម្បីធានាថា អ៊ីរ៉ង់មិនមានមហិច្ឆតាផលិតអាវុធនុយក្លេអ៊ែរទេនោះ៕
Tag:
អ៊ីរ៉ង់
ប៊ូអ៊ីង
កិច្ចព្រមព្រៀងនុយក្លេអ៊ែរ
© រក្សាសិទ្ធិដោយ thmeythmey.com