អន្តរជាតិ
អាមេរិក ត្រៀមខ្លួនរួចជាស្រេចដើម្បីប្រឈមនឹងចិន ប្រសិនចិននៅតែបន្តវាទទីក្នុងសមុទ្រចិនខាងត្បូង លោកមេបញ្ជាការកងទ័ពអាមេរិកប្រចាំតំបន់ប៉ាស៊ីហ្វិក នាឱកាសសង្ខេបព្រឹត្តិការណ៍អាស៊ាននៅខែកុម្ភៈ ជាមួយអ្នកសារព័ត៌មានអាស៊ាន
× ហាក់ដូចជាស្ងាត់មួយរយៈពេលហើយនោះ ក្រុងវ៉ាស៊ីនតោន បានប្រកាសជំហរជាថ្មីម្តងទៀតក្នុងការប្រឈមមុខជាមួយនឹងក្រុងប៉េកាំងនៅក្នុងតំបន់ជម្លោះសមុទ្រចិនខាងត្បូង ប្រសិនបើក្រុងប៉េកាំង នៅតែបន្តសកម្មភាពវាទទីនៅក្នុងតំបន់ជម្លោះ។ ក្រុងវ៉ាស៊ីនតោន ក៏សន្យានឹងបន្តអនុវត្តសកម្មភាពនាវាល្បាតនៅក្នុងតំបន់នោះតាមច្បាប់អន្តរជាតិផងដែរ។
មេបញ្ជាកងទ័ពអាមេរិកប្រចាំតំបន់ប៉ាស៊ីហ្វិក លោក Harry Harris នៅថ្ងៃទី១៤ ធ្នូនេះ បានអះអាងថា អាមេរិក បានត្រៀមខ្លួនរួចស្រេចហើយក្នុងការប្រឈមជាមួយនឹងចិន ប្រសិន ចិន នៅបន្តសកម្មភាពវាទទីរបស់ខ្លួននៅក្នុងសមុទ្រចិនខាងត្បូង។ សេចក្តីថ្លែងការណ៍នេះ ត្រូវបានធ្វើឡើងក្នុងសុន្ទរកថារបស់លោកឧត្តមសេនីយ៍រូបនេះក្នុងដំណើរទស្សនកិច្ចទៅកាន់អូស្ត្រាលី។
នាឱកាសដដែលនោះ លោកឧត្តមសេនីយ ក៏បានសង្កត់ធ្ងន់យ៉ាងដូច្នេះថា៖«យើង នឹងមិនអនុញ្ញាឲ្យតំបន់រួមគ្នា(សមុទ្រចិនខាងត្បូង)ត្រូវបានបិទជាលក្ខណៈឯកតោភាគីបានឡើយ បើទោះបីជា មានមូលដ្ឋានជាច្រើន ត្រូវបានសាងសង់ឡើងនៅក្នុងតំបន់សិប្បនិម្មិតនៃសមុទ្រចិនខាងត្បូង។ យើង នឹងធ្វើកិច្ចសហប្រតិបត្តិការ នៅពេលយើងអាច ប៉ុន្តែយើង នឹងក៏នឹងត្រៀមខ្លួនដើម្បីប្រឈមផងដែរ នៅពេលចាំបាច់នោះ»។ នេះបើយោងតាមការការដកស្រង់សម្តីលោកឧត្តមសេនីយ៍រូបនេះដោយភ្នាក់ងារព័ត៌មាន Reuters។
បន្ថែមពីការប្តេជ្ញាចិត្តនេះ ប្រមុខការពារជាតិអាមេរិកប្រចាំតំបន់ប៉ាស៊ីហ្វិករូបនេះ ក៏បានបញ្ជាក់ដែរថា អាមេរិក ក៏នៅតែបន្តសកម្មភាពល្បាតនៅក្នុងសមុទ្រចិនខាងត្បូង ក្រោមច្បាប់អន្តរជាតិដដែលនោះ។ នេះបើយោងតាមប្រភពព័ត៌មានដដែលនោះ។
សូមជម្រាបផងដែរថា ជម្លោះសមុទ្រចិនខាងត្បូង គឺជាជម្លោះអធិបតេយ្យ ដែលមានរដ្ឋពាក់ព័ន្ធដូចជា ព្រុយណេ ម៉ាឡេស៊ី ហ្វីលីពីន វៀតណាម តៃវ៉ាន់ និងចិន។ ចិន បានទាមទារស្ទើរតែតំបន់ទាំងស្រុងនៃតំបន់ជម្លោះក្រោមអំណេះអំណាងប្រវត្តិសាស្ត្រ ខណៈរដ្ឋពាក់ព័ន្ធផ្សេងទៀត ទាមទារដោយភស្តុតាងផ្នែកច្បាប់នោះ។ ខណៈពេលដំណោះស្រាយនៃជម្លោះនេះ មិនសូវជាមានពន្លឺប៉ុន្មាននោះ មានរបាយការណ៍រូបភាពផ្កាយរណបជាច្រើន បានបង្ហាញថាចិន បន្តសកម្មភាពវាទទីជាច្រើនហិកតា និងទាំងសាងសង់កោះសិប្បនិម្មិត ដោយមានទាំងបំពាក់សព្វាវុធផងដែរនោះ។
បើទោះបីជាអាមេរិក មិនមានទឹកដីជាប់ជាមួយនឹងតំបន់វិវាទនោះក៏ដោយ អាមេរិក បានប្រលូកខ្លួនយ៉ាងជ្រៅលើបញ្ហានេះ ទាំងផ្នែកការទូត និងទាំងផ្នែកយោធា ដ្បិតបើបណ្តោយចិន ឲ្យធ្វើសកម្មភាពបែបនោះ សមុទ្រចិនខាងត្បូងដែលជាច្រកពាណិជ្ជកម្មមមាញឹកលំដាប់ទីពីររបស់ពិភពលោកនេះ នឹងត្រូវគ្រប់គ្រងដោយចិនហើយ។ ផ្នែកការទូតនោះគឺ អាមេរិក តែងតែចេញសេចក្តីថ្លែងការណ៍រិះគន់ចិន ក៏ដូចជាលើកបញ្ហាសមុទ្រចិនខាងត្បូងនៅក្នុងកិច្ចប្រជុំក្នុងតំបន់ ដែលមានវត្តមានចិននៅទីនោះផងដែរនោះ។
សម្រាប់ផ្នែកយោធា អាមេរិក កន្លងមក បានធ្វើសកម្មភាពទាំងតាមមធ្យោបាយនាវាល្បាត និងយន្តហោះស៊ើបការណ៍មកកាន់ជម្លោះដែលស្ថិតក្បែរតំបន់ដែលចិន បានសាងសង់នៅក្នុងតំបន់ជម្លោះ ក្រោមហេតុផលថា ដើម្បីអនុវត្តសិទ្ធិសេរីភាពនៃការធ្វើនាវាចរណ៍ និងសេរីភាពនៃការហោះហើរដែលផ្តល់ដោយច្បាប់អន្តរជាតិនោះ។ ជាងនេះទៅទៀតនោះ អាមេរិក ក៏បានសហការណ៍ជាមួយនឹងបណ្តាភាគីជម្លោះដែលរួមមានទាំងហ្វីលីពីន និងវៀតណាមក្នុងការពង្រឹងសមត្ថភាពការពារដែនសមុទ្រដើម្បីទប់ទល់ជាមួយនឹងចិនផងដែរ។ តែក្រោមរដ្ឋបាលថ្មីរបស់ហ្វីលីពីន អាមេរិក ហាក់ដូចជាមិនសូវមានសកម្មភាពយោធាប្រឆាំងចិនដូចមុនទៀត ដ្បិតរដ្ឋបាលថ្មីនេះ មាននិន្នាការខ្លាំងប្រឆាំងនឹងអាមេរិក៕
Tag:
ចិន
អាមេរិក
សមុទ្រចិនខាងត្បូង
© រក្សាសិទ្ធិដោយ thmeythmey.com