អន្តរជាតិ
នយោបាយអន្តរជាតិ
ប្រជាជនជប៉ុនបារម្ភពីការកើនឡើងឧក្រិដ្ឋកម្ម ក្រោយសភាអនុម័តច្បាប់ស្ដីពីកាស៊ីណូ
×![]()
ដោយ: ថ្មីៗ
សភាជប៉ុន នៅថ្ងៃទី១៥ ខែធ្នូ បានអនុម័តច្បាប់ស្ដីពីកាស៊ីណូដ៏ចម្រូងចម្រាស បើទោះជាមានការព្រួយបារម្ភខ្លាំងពីការកើនឡើងឧក្រិដ្ឋកម្ម និងការញៀនល្បែងរបស់ប្រជាជនក្ដី។ ច្បាប់ដែលមិនសូវមានប្រជាប្រិយភាពនេះ មានគោលដៅទាក់ទាញការវិនិយោគលើឧស្សាហកម្មទេសចរណ៍ បន្ថែមលើឧស្សាហកម្មល្បែងស៊ីសងដែលមានស្រាប់ដូចជាការប្រណាំងសេះ និងការប្រណាំងកង់ជាដើម។
បន្ទាប់ឆ្លងកាត់ដំណាក់កាលសភាជាន់ខ្ពស់រួចមក សេចក្ដីព្រាងច្បាប់ស្ដីពីកាស៊ីណូដែលគាំទ្រដោយរដ្ឋាភិបាលនាយករដ្ឋមន្ត្រី ស៊ិនហ្សូ អាបេ បានទទួលភ្លើងខៀវពីសភាជាន់ទាបហើយ។ សមាជិកសភាជាន់ទាប បានអនុម័តច្បាប់ចម្រូងចម្រាសនេះនៅថ្ងៃទី១៥ ខែធ្នូ ហើយច្បាប់នេះនឹងបើកផ្លូវដល់ការអភិវឌ្ឍរមណីយដ្ឋានកំសាន្តដែលរួមបញ្ចូលទាំងសណ្ឋាគារ កាស៊ីណូ និងមជ្ឈមណ្ឌលទិញទំនិញនៅជាមួយគ្នាតែម្ដង។
រដ្ឋាភិបាលជប៉ុនសង្ឃឹមថា ក្រោយការអនុម័តនេះ ក្រុមហ៊ុនល្បែងស៊ីសងធំៗលើពិភពលោកនឹងងាកមកវិនិយោគរកស៊ីលើទឹកដីជប៉ុន។ នាពេលកន្លងមក ក្រុមហ៊ុនអន្តរជាតិដូចជា Wynn Resorts, MGM Resorts និង Caesars ជាដើមសុទ្ធតែធ្លាប់បង្ហាញចំណាប់រកស៊ីលើវិស័យនេះទាំងអស់។ ក្រុមហ៊ុនល្បែងស៊ីសងទាំងនោះ ចង់បានទីតាំងថ្មីសម្រាប់ជំនួញរបស់ពួកគេ ជាពិសេសទីតាំងដែលនៅក្បែរចិនតែម្ដង។
ទន្ទឹមនឹងគ្នានេះដែរ សារព័ត៌មាន The Japan Times ផ្សាយថា សាធារណមតិជប៉ុនក៏បានបង្ហាញការព្រួយបារម្ភរបស់ខ្លួនជុំវិញការអនុម័តរបស់សភាជាន់ទាបនេះដែរ។ បច្ចុប្បន្ននេះ សង្គមជប៉ុនក៏កំពុងប្រឈមមុខនឹងបញ្ហាងប់ងុលខ្លាំងរបស់ប្រជាជនលើល្បែងស៊ីសងស្របច្បាប់ដូចជា Pachinko និងសកម្មភាពស៊ីសងផ្សេងទៀតរួមទាំងការប្រណាំងសេះ ប្រណាំងទូក និងប្រណាំងកង់ជាដើម។
ប្រជាជនជាច្រើន ហាក់នៅសង្ស័យលើការអនុញ្ញាតឲ្យការបើកកាស៊ីណូក្លាយជារឿងស្របច្បាប់នោះ។ ការស្ទង់មតិរបស់របស់ទូរទស្សន៍ NKH បង្ហាញថា ប្រជាជន៤៤ភាគរយជំទាស់នឹងច្បាប់នេះ ទល់នឹងការគាំទ្រដែលមានតែ១២ភាគរយ ខណៈដែល៣៤ភាគរយផ្សេងទៀត មិនមានជំហរដាច់ស្រេចលើបញ្ហានេះឡើយ។ ចំណែកនៅវេទិកាសភាវិញ ក្រុមបក្សប្រឆាំងក៏បានបោះឆ្នោតជំទាស់ដែរ តែគ្មានសំឡេងគ្រប់គ្រាន់ដើម្បីបង្អាក់ឡើយ។
តាមពិតទៅ គម្រោងធ្វើឲ្យស្របច្បាប់នៃការបើកកាស៊ីណូនេះ ក្លាយជារឿងចម្រូងចម្រាសអស់ពេល១៥ឆ្នាំមកហើយ។ ក្រុមប្រឆាំងនឹងផែនការនេះបានលើកឡើងពីការព្រួយបារម្ភលើការកើនឡើងនៃការញៀនល្បែង ក៏ដូចជាឧក្រិដ្ឋកម្មក្នុងប្រទេសផងដែរ។ តែក្រុមអ្នកគាំទ្រនិយាយដែរថា ការបើកកាស៊ីណួ នឹងជួយសេដ្ឋកិច្ចប្រទេស និងទាក់ទាញទេសចរ ចំណែកឯរដ្ឋាភិបាលវិញក៏អះអាងដែរថា ខ្លួនព្យាយាមគ្រប់គ្រងវិស័យនេះ មិនឲ្យមានផលប៉ះពាល់ឡើយ៕
Tag:
ជប៉ុន
© រក្សាសិទ្ធិដោយ thmeythmey.com
