សាលាក្តីខ្មែរក្រហមបំបែកសំណុំរឿងលោក អោ អាន

ខ្មែរក្រហម

ជាតិ

សាលាក្តីខ្មែរក្រហមបំបែកសំណុំរឿងលោក អោ អាន

16, Dec 2016 , 10:59 pm

រូបភាព

រូបថតដោយ៖ VOA

ដោយ:

ភ្នំពេញ៖ សហចៅក្រមស៊ើបអង្កេត បានបិទបញ្ចប់ការស៊ើបសួរជនត្រូវចោទលោក អោ អាន ក្នុងសំណុំរឿង ០០៤ និង ០០៤ វគ្គ១ នៅថ្ងៃទី១៦ ខែធ្នូ ឆ្នាំ២០១៦នេះ។ ក្រោយស៊ើបសួររយៈពេលជាង ៨ឆ្នាំមក សហចៅក្រមស៊ើបអង្កេត បានសម្រេចចេញដីកាបំបែកនីតិវិធីលោក អោ អាន ពីសំណុំរឿង ០០៤ ទៅសំណុំរឿង ០០៤ វគ្គ២។

សហចៅក្រមស៊ើបអង្កេត បានបំបែកនីតិវិធីលោក អោ អាន ដោយសារជនត្រូវចោទរូបនេះ មានសិទ្ធិទទួលសេចក្តីសម្រេចចោទប្រឆាំងលោក ដោយឥតពន្យារពេលយូរ។ ម្យ៉ាងទៀត វាទុកឱកាសឲ្យចៅក្រមអាចចេញដីកាដំណោះស្រាយ (ដីកាលើកលែងការចោទប្រកាន់ ឬការបញ្ជូនជនត្រូវចោទទៅជំនុំជម្រះ) តាមវិធានផ្ទៃក្នុងសាលាក្តីខ្មែក្រហម ក្នុងរយៈពេលមួយសមស្រប។

លើសពីនេះទៀត ដីកាដែលចេញដោយសហចៅក្រមស៊ើបអង្កេតអន្តរជាតិ ជួយកាត់បន្ថយវិសាលភាពនៃការស៊ើបសួរប្រឆាំងលោក អោ អាន ផ្អែកតាមវិធានផ្ទៃក្នុង ៦៦ ស្ទួន។ នេះបើតាមសេចក្តីថ្លែងការណ៍របស់ការិយាល័យសហចៅក្រមស៊ើបអង្កេតស្តីពី ការបិទការស៊ើបសួរប្រឆាំងនឹងលោក អោ អាន និងការសម្រេចបំបែកសំណុំរឿង ០០៤។

សហចៅក្រមស៊ើបអង្កេតបានចេញផ្សាយសេចក្តីថ្លែងការណ៍នៅថ្ងៃទី ១៦ ខែធ្នូនេះ បញ្ជាក់ទៀតថា នីតិវិធីនេះ នឹងនាំឲ្យការសម្រេចសេចក្តីលើសំណុំរឿងប្រឆាំងនឹងលោកទាន់ពេលវេលា ស្របពេលការស៊ើបសួរក្នុងសំណុំរឿង ០០៤ សេសសល់កំពុងបន្តនីតិវិធី។

«កិច្ចស៊ើបសួរលើជនត្រូវចោទម្នាក់ទៀតនៅក្នុងសំណុំរឿង ០០៤ នៅតែបន្តដំណើរការនោះ ទើបយើងយល់ឃើញថា ដើម្បីជាប្រយោជន៍យុត្តិធម៌ គឺត្រូវបំបែកនីតិវិធីពាក់ព័ន្ធនឹង អោ អាន ចេញពីសំណុំរឿង ០០៤»។ សហចៅក្រមបញ្ជាក់បន្ថែម ខណៈពួកគេបន្តនីតិវិធីជនត្រូវចោទម្នាក់ទៀត ក្នុងសំណុំរឿង០០៤ដែរ។

សហចៅក្រមបានបើកការស៊ើបសួរប្រឆាំងលោក អោ អាន តាមនីតិវិធីជាបន្តបន្ទាប់ ក្រោយពីសហព្រះរាជអាជ្ញាអន្តរជាតិ បានបញ្ជូនដីកាសន្និដ្ឋានរឿងឲ្យពួកគេស៊ើបសួរ លើកទី ៣ នៅថ្ងៃទី២០ ខែវិច្ឆិកា ឆ្នាំ២០០៨ និងចុងក្រោយនៅថ្ងៃទី ២០ ខែវិច្ឆិកា ឆ្នាំ២០១៥រហូតមក ពាក់ព័ន្ធនឹងឧក្រិដ្ឋកម្មដែលលោកបានប្រព្រឹត្តពីថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី៦ ខែមករា ឆ្នាំ១៩៧៩ ។

លោក អោ អាន ស្ថិតក្រោមការស៊ើបអង្កេតពីមនុស្សឃាតដោយចេតនា និងឧក្រិដ្ឋកម្មប្រឆាំងនឹងមនុស្សជាតិ នៅថ្ងៃទី២៧ ខែមីនា ឆ្នាំ២០១៥ និងក្រោមការត្រួតពិនិត្យពីបទឧក្រិដ្ឋកម្មថ្មីបន្ថែមទៀត រាប់ទាំងឧក្រិដ្ឋកម្មប្រល័យពូជសាសន៍ទៅលើជនជាតិចាម នៅថ្ងៃទី១៤ ខែមីនា ឆ្នាំ២០១៦។

បទចោទលើលោក អោ អាន នោះពាក់ព័ន្ធនឹង អំពើប្រល័យពូជសាសន៍លើជនជាតិចាម, ឧក្រិដ្ឋកម្មប្រឆាំងមនុស្សជាតិ រួមមាន ការធ្វើមនុស្សឃាត ការសម្លាប់រង្គាល ការរៀបអាពាហ៍ពិពាហ៍ដោយបង្ខំ ការរំលោភលើផ្លូវភេទ និងការឃុំឃាំងក្នុងស្ថានភាពអមនុស្សធម៌ ការរំលោភលើក្រមព្រហ្មទណ្ឌកម្ពុជា ឆ្នាំ ១៩៥៦ ជាដើម។ បទចោទឧក្រិដ្ឋកម្មទាំងនោះ ប្រព្រឹត្តឡើងក្នុងការដ្ឋានធ្វើពលកម្មដោយបង្ខំនៅទំនប់អន្លង់ជ្រៃ, ទីកន្លែងសម្លាប់មនុស្សគោកព្រីង មន្ទីរសន្តិសុខមិត្តសុប(គរ), មន្ទីរសន្តិសុខ និងទីកន្លែងសម្លាប់មនុស្សទួលបេង, វត្តអង្គួញដី, មន្ទីរសន្តិសុខវត្តអូរត្រកួន, មន្ទីរសន្តិសុខវត្តបាធាយ, ទីកន្លែងសម្លាប់មនុស្សភ្នំប្រុស មន្ទីរសន្តិសុខវត្តតាមះ, មន្ទីរសន្តិសុខចម្ការស្វាយចន្ទី, មន្ទីរសន្តិសុខវត្តបារាយណ៍ជាន់ដែក, មន្ទីរសន្តិសុខវត្តស្រងែ និងទីតាំងផ្សេងទៀត ក្នុងខេត្តកំពង់ចាម៕