អន្តរជាតិ
នយោបាយអន្តរជាតិ
ហ្វីលីពីន មិនតវ៉ាលើរបាយការណ៍ដែលចោទចិនថាធ្វើយោធូបនីយកម្មនៅសមុទ្រចិនខាងត្បូងឡើយ លោកប្រធានាធិបតីហ្វីលីពីន និងលោកប្រធានាធិបតីចិន នាពេលហ្វីលីពីនបំពេញទស្សនកិច្ចទៅកាន់ចិន
× បើទោះបីជាមានរបាយការណ៍របស់ស្ថាប័នជំនាញក្រុងវ៉ាស៊ីនតោន បង្ហាញថា ក្រុងប៉េកាំង កំពុងតែធ្វើយោធូបនីយកម្មនៅតំបន់ជម្លោះសមុទ្រចិនខាងត្បូងក៏ដោយ ក្រុងម៉ានីល មិនចាប់អារម្មណ៍ឡើយ ពោលគឺ ក្រុងម៉ានីល មិនមានការតវ៉ាអ្វីឡើយ។ នេះគឺជាការបញ្ជាក់របស់ប្រមុខការទូតហ្វីលីពីនលោក Perfecto Yasay។
ថ្លែងទៅកាន់អ្នកសារព័ត៌មាននៅសិង្ហបុរីនៅថ្ងៃទី១៦ធ្នូ លោករដ្ឋមន្ត្រីការបរទេស Perfecto Yasay បានបញ្ជាក់ថា រដ្ឋាភិបាលហ្វីលីពីន នឹងមិនចេញកំណត់ហេតុការទូតតវ៉ាទៅកាន់ចិនឡើយ។ លោកសង្កត់ធ្ងន់ថា៖«ឲ្យពួកគេធ្វើសកម្មភាពដែលចាំបាច់ដើម្បីបម្រើប្រយោជន៍ជាតិគេចុះ...សម្រាប់ហ្វីលីពីន យើងមានការទំនាក់ទំនងទ្វេភាគីជាមួយនឹងគ្នា ហើយប្រទេសដទៃ អាចធ្វើយ៉ាងម៉េចលើបញ្ហានេះស្រេចតែគេចុះ»។ នេះបើយោងតាមការចុះផ្សាយរបស់សារព័ត៌មានសិង្ហបុរី Channel News Asia។
នាឱកាសដដែលនោះ លោកប្រមុខការទូត ក៏បានបន្ថែមទៀត ហ្វីលីពីន មិនអាចបញ្ឈប់ចិនបានឡើយ ហើយមានតែការពង្រឹងទំនាក់ទំនងឲ្យកាន់តែល្អជាមួយនឹងចិននោះទេដែលផ្តល់ប្រយោជន៍មកវិញនោះ។ លោក ពន្យល់ថា ដោយសារតែការពង្រឹងទំនាក់ទំនងល្អជាមួយនឹងចិន អ្នកនេសាទហ្វីលីពីនបច្ចុប្បន្ន អាចទៅនេសាទនៅក្នុងតំបន់ក្បែរថ្មប៉ប្រះទឹក Scarborough ដែលចិន បានបិទមិនឲ្យចូលតាំងពីឆ្នាំ២០១២នោះ។
សូមជម្រាបផងដែរថា បញ្ហាសមុទ្រចិនខាងត្បូង គឺជាជម្លោះអធិបតេយ្យរវាងរដ្ឋពាក់ព័ន្ធអាស៊ានដូចជា ព្រុយណេ ម៉ាឡេស៊ី ហ្វីលីពីន និងវៀតណាម ជាមួយនឹងចិន។ តំបន់ដែលចំណុចវិវាទខ្លាំងនៃសមុទ្រចិនខាងត្បូង គឺនៅប្រជុំកោះស្ព្រាតលី និងប្រជុំកោះប៉ារ៉ាស្សែល ដែលចិន បានទាមទារស្ទើរតែទាំងស្រុងនៃតំបន់ទាំងនោះដោយយោងតាម កត្តាប្រវត្តិសាស្ត្រ ខណៈរដ្ឋពាក់ព័ន្ធអាស៊ានទាមទារដោយយោងតាមច្បាប់អន្តរជាតិនោះ។
នៅថ្ងៃទី១៣ ធ្នូកន្លងទៅ ស្ថាប័នវិភាគអាមេរិក «គំនិតផ្តួចផ្តើមតម្លាភាពដែនសមុទ្រអាស៊ី (AMTI) បានចេញផ្សាយរបាយការណ៍ថ្មីមួយពីការវិវត្តនៅសមុទ្រចិនខាងត្បូង ដោយបានអះអាងថា ចិន បានដំឡើងសព្វាវុធដែលជាប្រព័ន្ធការពារ ដែលជាប្រភេទកាំភ្លើងធំប្រឆាំងនឹងយន្តហោះនៅក្នុងមូលដ្ឋានមួយចំនួនក្នុងកោះស្ព្រាតលី។ ផ្អែកតាមរូបភាពដែលចាប់ដោយផ្កាយរណប AMTI បានពន្យល់ថា សំណង់ដែលជាប្រភេទការដ្ឋានយោធា បានសាងសង់រួចទៅហើយនៅតំបន់កោះ ដែលក្រុមអ្នកជំនាញចាត់ទុកថាជាការធ្វើយោធូបនីយកម្មនៅក្នុងសមុទ្រចិនខាងត្បូង៕
Tag:
ហ្វីលីពីន
ចិន
សមុទ្រចិនខាងត្បូង
© រក្សាសិទ្ធិដោយ thmeythmey.com