ជាតិ
អាជ្ញាធរ និងខ្មែរឥសា្លមនៅតែខ្វែងគំនិតគ្នារឿងសង់ផ្លូវកាត់របងវិហារបឹងកក់
× ភ្នំពេញ៖ អាជ្ញាធរសាលារាជធានីភ្នំពេញ និងសាសនិកខ្មែរឥស្លាម នៅតែខ្វែងគំនិតគ្នាលើគម្រោងសាងសង់ផ្លូវកាត់របងវិហារឥស្លាមបឹងកក់ ដោយអាជ្ញាធរចង់សង់ផ្លូវកាត់របងវិហារ តែតំណាងសាសនិកឥស្លាមស្នើឲ្យអាជ្ញាធរសង់ផ្លូវវាងជាប់របងវិហារវិញ។
គម្រោងផ្លូវកាត់វិហារឥស្លាមបឹងកក់ នៅតែជាសំណុំរឿងដ៏ចម្រូងចម្រាស់។ អាជ្ញាធរ និងតំណាងសាសនិកខ្មែរឥស្លាមពុំឯកភាពគ្នាលើគម្រោងសង់ផ្លូវថ្មីឡើយ បើទោះបីជាពួកគេមានបំណងកាត់បន្ថយការកកស្ទះចរាចរណ៍តំបន់នេះដូចគ្នាក្តី។
លោក អ៉ះម៉ាត់ យ៉ះយ៉ា តំណាងខ្មែរឥស្លាមម្នាក់ដែលធ្លាប់ចាញ់ក្តីពីបទបរិហាកេរ្តិ៍លោក អូស្មាន ហាស្សាន់ ពាក់ព័ន្ធបញ្ហានេះកន្លងទៅ បានលើកហេតុផលដដែលថា វានឹងធ្វើឲ្យប៉ះពាល់ និងបង្កភាពអានាធិបតេយ្យដល់បរិវេណវិហារដែលជាទីសក្ការបូជារបស់សាសនាឥស្លាម។
រដ្ឋលេខាធិការក្រសួងសង្គមកិច្ច និងយុវនីតិសម្បទារូបនេះ ចាត់ទុករឿងធ្វើផ្លូវកាត់វិហារបឹងកក់ ខាងក្រោយសណ្ឋាគារភ្នំពេញ កំពុងក្លាយជារឿងចម្រូងចម្រាស ដោយសារថ្នាក់ដឹកនាំខ្មែរឥស្លាមម្ខាងគាំទ្រឲ្យធ្វើ និងម្ខាងទៀតជំទាស់ ។
«អត់មានរបស់នេះ ជារបស់អ្នកណាម្នាក់ទេ គឺវាជារបស់សាសនិកឥសា្លម។ បើដីឯកជន អាជ្ញាធរធ្វើចុះ»។ តំណាងអ្នកជំទាស់យ៉ាងម៉ឺងម៉ាត់លើគម្រោងហើយទាមទារឲ្យអាជ្ញាធរបង្ហាញផែនការមេផ្លូវវាងឲ្យបានច្បាស់លាស់សិន មុនពេលពួកគេដោះស្រាយបញ្ហាទាំងនេះ អំឡុងអាជ្ញាធរភ្នំពេញ ចុះវាស់វែងកំណត់ដីផ្លូវ នៅថ្ងៃទី១៩ ខែធ្នូនេះ។
សំឡេង លោក អ៉ះម៉ាត់ យ៉ះយ៉ា៖
ជាការឆ្លើយតបនឹងសំណូមពរ លោក សារិន វណ្ណា ប្រធានមន្ទីររៀបចំដែនដីរាជធានីភ្នំពេញ បានលើកឡើងផ្អែកការសិក្សាថា អាជ្ញាធរលំបាកសង់ផ្លូវវាង ព្រោះវាមិនអាចជួយរំដោះការកកស្ទះចរាចរណ៍បានឡើយ។
បន្ថែមលើមតិផ្ទុយលោក អ៉ះម៉ាត់ យ៉ះយ៉ា តំណាងអាជ្ញាធររូបនេះ បានបង្ហាញពីសារប្រយោជន៍បើកផ្លូវកាត់វិហារបឹងកក់ថ្មីថា វានឹងសម្រួលចរាចរណ៍ម្តុំបឹងកក់ និងម្តុំស្តុបកាណាឌីយ៉ា (BKC) និងរំដោះជំនន់ទឹកភ្លៀង ព្រោះអាជ្ញាធរនឹងសង់ផ្លូវថ្មីដែលទទឹង ២០ម៉ែត្រ ទ្រូងផ្លូវ ១៦ ចិញ្ចើមផ្លូវម្ខាងៗ ២ម៉ែត្រ និងបណ្តោយជាង ២០០ ម៉ែត្រ ហើយគេនឹងរៀបចំប្រព័ន្ធលូរំដោះទឹកតាមបណ្តោយផ្លូវថ្មីដែរ។
លោកបាននិយាយប្រាប់ក្រុម អ្នកសារព័ត៌មានអំឡុងពេលចុះវាស់វែងដីផ្លូវក្នុងវិហារបឹងកក់ នៅថ្ងៃនេះថា៖«បើយើងធ្វើតាមច្រកដែលមានស្រាប់នេះ តើយើងអាចបត់ចេញរួចទេ?...យើងត្រូវគិតថា យើងសង់ផ្លូវនេះសំខាន់»។ បើតាមលោក សារិន វណ្ណា អាជ្ញាធរនឹងទូទាត់ដោះដូរ ដីបឹងកក់ខាងក្រោយវិហារឥស្លាមសងស្មើគ្នាឲ្យសាសនិកឥស្លាមវិញដែរ។
សំឡេងលោក សារិន វណ្ណា៖
ជុំវិញបញ្ហានេះដែរ លោក ឃួង ស្រេង អភិបាលរងរាជធានីភ្នំពេញ បានបដិសេធនិយាយជាមួយអ្នកសារព័ត៌មាន ពេលលោកចុះត្រួតពិនិត្យការវាស់វែងដី។ លោកគ្រាន់តែនិយាយថា អាជ្ញាធរនឹងបន្តអញ្ជើញតំណាងសាសនិកខ្មែរឥស្លាមចូលរួមប្រជុំថែមទៀត មុនចាប់ផ្តើមអនុវត្តគម្រោង ខាងមុខ។
តាមការរៀបចំពីប្រវត្តិដីវិហារបឹងកក់ គឺដើមឡើយនៅជំនាន់សង្គមរាស្ត្រនិយម អតីតព្រះហាក្សត្រខ្មែរ សម្តេច ព្រះនរោត្តម សីហនុ បានប្រគល់ដីឲ្យសហគមន៍ខ្មែរឥស្លាម។ ក្រោយរបបខ្មែរក្រហម ដីនេះគឺគ្រប់គ្រងដោយឯកជន និងជាបាកម្សាន្ត ក្នុងអំឡុងឆ្នាំ៩០។ ជាបន្តបន្ទាប់ ដីវិហារនេះ ត្រូវបានថ្នាក់ដឹកនាំខ្មែរឥស្លាមទាមទារមកគ្រប់គ្រងឡើងវិញ និងបច្ចុប្បន្នមានប្លង់ចំនួនពីរ ដាច់ដោយឡែកពីគ្នា។ ប្លង់ដីមួយចំណែក គ្រប់គ្រងដោយ លោក អូស្មាន ហាស្សាន់ ប្រធានមូលនិធិអភិវឌ្ឍន៍មូស្លិមកម្ពុជា និងប្លង់មួយទៀត គ្រប់គ្រងដោយលោក វ៉ាន់ ម៉ាត់ ប្រធានសមាគមខ្មែរឥស្លាមកម្ពុជា៕
Tag:
វិហារបឹងកក់
អូស្មាន ហាស្សាន់
អ៉ះម៉ាត់ យ៉ះយ៉ា
© រក្សាសិទ្ធិដោយ thmeythmey.com