អន្តរជាតិ
នយោបាយអន្តរជាតិ
អាហ្វ្រិកខាងលិច ត្រៀមចាត់វិធានការគ្រប់យ៉ាងបង្ខំ Jammeh ឲ្យចេញពីតំណែង
×
មេដឹកនាំអាហ្វ្រិកខាងលិចអះអាងថា ពួកគេនឹងព្យាយាមធ្វើគ្រប់បែបយ៉ាងដើម្បីជំរុញឲ្យមានការទទួលយកលទ្ធផលបោះឆ្នោតថ្ងៃ ១ធ្នូ ហើយពួកគេត្រៀមទៅចូលរួមក្នុងពិធីស្បថចូលកាន់តំណែងរបស់ប្រធានាធិបតីទើបជាប់ឆ្នោតថ្មី ហ្កំប៊ី លោក Adama Barrow ដែរ។ នេះបង្ហាញពីជំហររបស់អាហ្វ្រិកខាងលិចក្នុងការការពារប្រធានាធិបតីថ្មី ប្រឆាំងប្រធានាធិបតីចាញ់ឆ្នោត Yahya Jammeh។
មេដឹកនាំអាហ្វ្រិកខាងលិច បានចេញសេចក្តីថ្លែងការណ៍មួយនៅចុងសប្តាហ៍នេះដើម្បីដាក់សម្ពាធជាថ្មីលើមេដឹកនាំផ្តាច់ការក្រាញអំណាចហ្កំប៊ីលោក Yahya Jammeh ដែលបដិសេធលទ្ធផលបោះឆ្នោតនោះ។ សេចក្តីថ្លែងការណ៍នោះបញ្ជាក់ថា ពួកគេនឹងការពារប្រធានាធិបតីថ្មីលោក Adama Barrow និងទៅចូលរួមពិធីស្បថចូលកាន់តំណែងនៅដើមឆ្នាំក្រោយផងដែរ។
យោងតាមសារព័ត៌មានបារាំង France 24 ក្នុងកិច្ចប្រជុំកំពូលសហគមន៍សេដ្ឋកិច្ចប្រទេសអាហ្វ្រិកខាងលិច នៅរដ្ឋធានី Abuja នៃប្រទេសនីហ្សរីយ៉ា មេដឹកនាំអាហ្វ្រិកខាងលិចទាមទារឲ្យ មេដឹកនាំចាញ់ឆ្នោត Yahya Jammeh ត្រូវចុះចេញពីតំណែង និងផ្ទេរអំណាចឲ្យមេដឹកនាំទើបជាប់ឆ្នោត។ ក្នុងកិច្ចប្រជុំនេះមានប្រធានាធិបតីមកពីប្រទេសចំនួន ១១ តែលោក Jammeh មិនទៅចូលរួមប្រជុំឡើយ។
ក្រៅពីនេះ មេដឹកនាអាហ្វ្រិកខាងលិចក៏បានឯកភាពគ្នាថា នឹងបន្តចាត់វិធានការគ្រប់បែបយ៉ាងដែលអាចធ្វើបានដើម្បីធានាថា លទ្ធផលបោះឆ្នោតថ្ងៃ ១ធ្នូនឹងត្រូវគោរពនិងអនុវត្តតាម។
ហើយក្រុមប្រទេសអាហ្វ្រិកខាងលិចនេះបានសម្រេចបង្កើតគណកម្មការមួយទទួលបន្ទុកធ្វើសន្ធានកម្មដែលដឹកនាំដោយប្រធានាធិបតីនីហ្សេរីយ៉ា Muhammadu Buhari និងមានប្រធានាធិបតីហ្កាណា លោក John Dramani Mahama ជាអនុប្រធាន។ លោក John Dramani Mahama ជាប្រធានាធិបតីដែលទើបចាញ់ឆ្នោតដូចគ្នា តែលោកបានប្រកាសទទួលស្គាល់លទ្ធផលកាលពីប៉ុន្មានសប្តាហ៍មុននេះ។
ដោយឡែក កាលពីថ្មីៗនេះដែរ បណ្តាមេដឹកនាំអាហ្វ្រិកបានព្យាយាមសម្របសម្រួលឲ្យមានការផ្ទេរអំណាចដោយសន្តិវិធីតាមផ្លូវការទូតដែរតែបរាជ័យ។ លោកស្រីប្រធានាធិបតី លីបេរី Ellen Johnson Sirleaf អះអាងប្រាប់អ្នកសារព័ត៌មានថា ប្រតិភូជាន់ខ្ពស់ប្រទេសអាហ្វ្រិកចំនួន ៤ បានស្កាត់ជួបមេដឹកនាំហ្កំប៊ីទាំងពីរនាក់ ប៉ុន្តែពួកគេនៅតែបរាជ័យក្នុងការបញ្ចុះបញ្ចូលឲ្យ Jammeh និង Barrow ចុះកិច្ចព្រមព្រៀងរួមគ្នាដើម្បីផ្ទេរអំណាច។
ក្រៅពីមានការដាក់សម្ពាធពីប្រទេសអាហ្វ្រិកខាងលិច អង្គការសហប្រជាជាតិក៏បានដាក់សម្ពាធលើប្រធានាធិបតី Yahya Jammeh ឲ្យផ្ទេរអំណាចផងដែរ។ មន្ត្រីអង្គការសហប្រជាជាតិប្រចាំអាហ្រិ្វកខាងលិច Mohammed Ibn Chambas បានដាក់ឱសានវាតដល់ប្រធានាធិបតីចាញ់ឆ្នោតនេះ។ នៅថ្ងៃ ១៩ មករា លោកត្រូវចេញពីតំណែង បើមិនដូច្នោះទេលោកនឹងរងទណ្ឌកម្ម។
សូមបញ្ជាក់ លោក Jammedh ជាមេដឹកនាំផ្តាច់ការដែលកាន់តំណែងអស់ពេល ២២ឆ្នាំមកហើយ។ លោកបានចាញ់ឆ្នោតកាលពីថ្ងៃ ១ខែធ្នូកន្លងទៅ។ ក្រោយដឹងលទ្ធផល លោកបានចេញមុខទទួលស្គាល់បរាជ័យរបស់ខ្លួននៅតាមវិទ្យុរដ្ឋ ដោយលោកអះអាងថា លោកទទួលយកការសម្រេចចិត្តរបស់ប្រជាជនហ្កំប៊ីដែលចង់ឲ្យលោកចាកចេញពីតំណែង។ លោកបញ្ជាក់ថា លោកមិនតវ៉ារឿងលទ្ធផលទេ ហើយលោកនឹងចាកចេញទៅរស់នៅចម្ការសាងជីវភាពថ្មីវិញ ក្រោយផ្ទេរអំណាចខែមករាខាងមុខនេះ។ ប៉ុន្តែមួយសប្តាហ៍ក្រោយមក មេដឹកនាំរូបនេះបានក្រឡាស់សម្តីភ្លាមដោយលុបចោលលទ្ធផលបោះឆ្នោត និងទាមទារបោះឆ្នោតជាថ្មី៕
Tag:
Yahya Jammeh
Adama Barrow
អាហ្វ្រិកខាងលិច
© រក្សាសិទ្ធិដោយ thmeythmey.com