អន្តរជាតិ
នយោបាយអន្តរជាតិ
ចិន ផ្តល់ជំនួយឥតសំណង១៤លានដុល្លារឲ្យហ្វីលីពីនទិញអាវុធ និង៥០០លានដុល្លារបន្ថែមទៀតជាកម្ចីរយៈពេលវែង លោកអគ្គរដ្ឋទូតចិន Zhao Jianhua និងប្រធានាធិបតីហ្វីលីពីន Rodrigo Duterte
×
រដ្ឋមន្ត្រីការពារជាតិហ្វីលីពីន កាលពី ថ្ងៃទី២០ ធ្នូ បានឲ្យដឹងថា ចិន បានផ្តល់ជំនួយឥតសំណងជាអាវុធធុនស្រាល និងទូកល្បឿនលឿនក្នុងតម្លៃប្រមាណ១៤លានដុលា្លរឲ្យហ្វីលីពីនដើម្បីជាការគាំទ្រប្រតិបត្តិការបោសសម្អាត និងបង្ក្រាបគ្រឿងញៀនរបស់លោកប្រធានាធិបតីហ្វីលីពីន Rodrigo Duterte។
លោករដ្ឋមន្ត្រីការពារជាតិហ្វីលីពីន Delfin Lorenzana បានថ្លែងប្រាប់អ្នកសារព័ត៌មានក្រោយពីលោកបានផ្តល់អំណោយ Christmas ទៅកាន់ទាហានរបួសនៅថ្ងៃទី២០ ធ្នូថា ចិន បានផ្តល់បញ្ជីដែលជាសម្ភារយោធាឲ្យហ្វីលីពីន ហើយ រដ្ឋាភិបាលហ្វីលីពីន នឹងពិនិត្យដើម្បីស្វែងរកថាតើអ្វីដែលរដ្ឋាភិបាលត្រូវការ។ លោក សង្កត់ធ្ងន់ថា៖«យើងអាចទទួលបាន អាវុធធុនតូច ទូកល្បឿនលឿន...ព្រោះ១៤.៤លានដុល្លារ មិនច្រើនប៉ុន្មាននោះទេ។ យើង នឹងព្យាយាមបញ្ចប់កិច្ចព្រមព្រៀងនេះនៅចុងឆ្នាំនេះតែម្តង...។» នេះបើយោងតាម
ភ្នាក់ងារព័ត៌មាន Reuters។
តាមប្រភពព័ត៌មានដដែលនោះ ប្រមុខការពារជាតិហ្វីលីពីន លើកឡើងថា ជំនួយរបស់ចិននេះ ត្រូវបានបញ្ជាក់តាមរយៈអគ្គរដ្ឋទូតចិន លោក Zhao Jianhua ក្នុងជំនួបជាមួយនឹងលោកប្រធានាធិបតី Rodrigo Duterte នៅយប់ថ្ងៃចន្ទ ក្នុងវិមានប្រធានាធិបតីនោះ។ ប្រមុខការពារជាតិរូបនោះ ក៏បានបន្ថែមទៀតថា ក្រុងប៉េកាំង ក៏បានព្រមផ្តល់កម្ចីប្រមាណ៥០០លានដុល្លារដល់ហ្វីលីពីនសម្រាប់សម្ភារផ្សេងទៀតផងដែរ។
អ្វីគួរកត់សម្គាល់នោះ ការប្រកាសផ្តល់ជំនួយអាវុធរបស់ក្រុងប៉េកាំង ធ្វើឡើងក្រោយពីសភាអាមេរិក បានអនុម័តសម្រេចផ្អាកលក់កាំភ្លើងជាច្រើនម៉ឺនដើមមកឲ្យហ្វីលីពីន ក្រោមហេតុផលថា រដ្ឋាភិបាលថ្មីហ្វីលីពីន បានរំលោភសិទ្ធិមនុស្សធ្ងន់ធ្ងរ និងខ្លាចក្រែងយកអាវុធទាំងនោះ ដើម្បីបន្តសកម្មបង្ក្រាបគ្រឿងញៀនកាន់ធ្ងន់ធ្ងរទៀតនោះ៕
Tag:
ហ្វីលីពីន
ចិន
អាមេរិក
© រក្សាសិទ្ធិដោយ thmeythmey.com