អន្តរជាតិ
នយោបាយអន្តរជាតិ
×![]()
ដោយ: ថ្មីៗ
ប្រតិភូបោះឆ្នោតដែលត្រូវបានជ្រើសរើសក្នុងការបោះឆ្នោតកាលពីថ្ងៃ ៨ ខែវិច្ឆិកាកន្លងមកនេះ បានសម្រេចរើសយក លោក ដូណាល់ ត្រាំ ជាប្រធានាធិបតីអាមេរិកជាផ្លូវការក្នុងពេលជួបជុំគ្នានៅថ្ងៃ ១៩ ធ្នូ។ លោក ដូណាល់ ត្រាំ រូបនេះនៅតែក្លាយជាប្រធានាធិបតីទី ៤៥ របស់អាមេរិកទោះមានការជំទាស់និងប្រឆាំងច្រើនទាំងក្នុងបក្ស និងក្រៅបក្សកន្លងមកយ៉ាងណាក្តី។
ក្រោយឆ្លងកាត់ព្យុះភ្លៀងដោយប្រឈមចលនាប្រឆាំងពាសពេញប្រទេសក្រោយជាប់ឆ្នោតនៅថ្ងៃ ៨ខែវិច្ឆិកាកន្លងមក លោក ដូណាល់ ត្រាំ ត្រូវបានប្រតិភូបោះឆ្នោតជ្រើសរើសជាប្រធានាធិបតីអាមេរិកទី ៤៥ជាផ្លូវការហើយ។ គ្មានឧបសគ្គអ្វីរារាំងលោកទៀតឡើយ ហើយលោកក៏ត្រៀមស្បថចូលកាន់តំណែងថ្ងៃ ២០ មករាដែរ។
ការជ្រើសរើសលោក ដូណាល់ ត្រាំ ជាប្រធានាធិបតីជាផ្លូវការនេះធ្វើឡើងរយៈពេល៦សប្តាហ៍ក្រោយពេលបោះឆ្នោត ហើយវាធ្វើឡើងស្របពេលដែលក្រុមនយោបាយមួយចំនួននៅបន្តប្រឹងប្រែងបញ្ចុះបញ្ចូលឲ្យប្រតិភូបោះឆ្នោតប្តូរចិត្តឈប់គាំទ្រលោក ដូណាល់ ត្រាំ ។
ក្រុមអ្នកគាំទ្របក្សប្រជាធិបតេយ្យដែលកើតទុក្ខមិនសុខចិត្តព្រោះលោកស្រី ហ៊ីឡារី គ្លីនតុន ចាញ់ឆ្នោតនោះ បានស្វះស្វែងបញ្ចុះបញ្ចូលឲ្យប្រតិភូបក្សសាធារណរដ្ឋប្តូរចិត្តឈប់គាំទ្រលោក ដូណាល់ ត្រាំ។ ប៉ុន្តែ ពួកគេត្រូវធ្វើយ៉ាងណាបញ្ចុះបញ្ចូលឲ្យប្រតិភូយ៉ាងហោចណាស់ ៣៧នាក់ បោះបង់ចូលលោក ដូណាល់ ត្រាំ។
យោងតាមទីភ្នាក់ងារព័ត៌មាន កំណត់ លោក ដូណាល់ ត្រាំ ទទួលបានប្រតិភូគាំទ្រលើសពីចំនួន ២៧០ ដែលជាចំនួនតម្រូវសម្រាប់ការឈ្នះតំណែងប្រធានាធិបតី។ ប៉ុន្តែបើងាកទៅមើលលទ្ធផលឆ្នោតទូទៅទូទាំងសហរដ្ឋអាមេរិក លោកស្រី ហ៊ីឡារី គ្លីនតុន ឈ្នះលោក ដូណាល់ ត្រាំ ប្រហែល៣លានសំឡេងឯណោះ។
ក្រោយការជ្រើសរើសជាផ្លូវការនេះ អនុប្រធានាធិបតីដែលទើបជាប់ឆ្នោតលោក Mike Pence បានសរសេរបង្ហោះតាមប្រព័ន្ធទំនាក់ទំនងសង្គម Twitter របស់ខ្លួនដោយអបអរសាទរលោក ដូណាល់ ត្រាំ ថែមទៀតផង។
សូមបញ្ជាក់ថា ការជាប់ឆ្នោតជាប្រធានាធិបតីអាមេរិកទី ៤៥ របស់អ្នកជំនួញប្រែក្លាយជាអ្នកនយោបាយ ដូណាល់ ត្រាំ ជាព័ត៌មានគួរឲ្យភ្ងាក់ផ្អើលបំផុតសម្រាប់ពិភពលោកក្នុងឆ្នាំ ២០១៦នេះ។ គ្មានអ្នកណាម្នាក់ធ្លាប់រំពឹងថារឿងបែបនេះកើតឡើងទេ ប៉ុន្តែអ្វីៗផ្លាស់ប្តូរ ហើយរឿងមិនគួរកើតបែរជាកើតរួចទៅហើយដែរនៅសហរដ្ឋអាមេរិក។ លោកដូណាល់ ត្រាំ រំពឹងថា លោកនឹងអាចគ្រប់គ្រងអាមេរិកបានដល់ទៅពីរអាណត្តិឯណោះ៕
Tag:
ដូណាល់ ត្រាំ
ហ៊ីឡារី គ្លីនតុន
© រក្សាសិទ្ធិដោយ thmeythmey.com
