អន្តរជាតិ
នយោបាយអន្តរជាតិ
មុនចប់អាណត្តិ អូបាម៉ា ហាមឃាត់ការខួងប្រេងនិងឧស្ម័ននៅឆ្នេរភាគខាងជើងជាអចិន្ត្រៃយ៍
×
ប្រធានាធិបតីចប់អាណត្តិ បារ៉ាក់ អូបាម៉ា បានសម្រេចចេញការហាមឃាត់ការខួងប្រេង និងឧស្ម័នជាអចិន្ត្រៃយ៍នៅតំបន់ឆ្នេរដ៏វែងនៅភាគជើងប្រទេស ក្បែរតំបន់អាក់ទិក។ ការចេញបម្រាមនេះ មានគោលដៅការពារបរិស្ថាន និងប្រព័ន្ធអេកូឡូស៊ីសម្បូរបែបនៅតំបន់នោះ។ ប៉ុន្តែបម្រាមនេះ ហាក់ផ្ទុយពីនយោបាយថាមពលរបស់ប្រធានាធិបតីជាប់ឆ្នោត ដូណាល់ ត្រាំ ដែលចង់បង្កើនបរិមាណថាមពលសម្រាប់បម្រុងទុក។
ប្រធានាធិបតីអាមេរិក បារ៉ាក់ អូបាម៉ា ដែលល្បីថាស្រឡាញ់បរិស្ថាន បានសម្រេចដកយកដីជាច្រើនលានហិចតានៅតំបន់អាក់ទិក និងមហាសមុទ្រអាត្លង់ទិក ជាតំបន់ការពារ និងហាមឃាត់ការខួងប្រេង និងឧស្ម័ន។ តំបន់ការពារនេះ នឹងគ្រប់ដណ្ដប់លើតំបន់ជាច្រើននៃ សមុទ្រ Chukchi និង Beaufort នៃតំបន់ទឹកកកអាក់ទិក និងតំបន់អន្លង់ទឹកជ្រៅនៃមហាសមុទ្រអាត្លង់ទិកដែលលាតសន្ធឹងពីរដ្ឋ Massachusetts ដល់រដ្ឋ Virginia ។
សេតវិមានអាមេរិកនិយាយថា ការសម្រេចចិត្តរបស់ប្រធានាធិបតី គឺដើម្បីការរស់នៅប្រកបដោយនិរន្តរ៍ភាពនៃសេដ្ឋកិច្ច និងប្រព័ន្ធអេកូឡូស៊ីរបស់តំបន់អាក់ទិក។ តម្រូវការការពារវប្បធម៌ជនជាតិដើម ការព្រួយបារម្ភលើជីវិតសត្វព្រៃ និងភាពងាយរងគ្រោះពីផលប៉ះពាល់នៃការលេចធ្លាយប្រេង ជាមូលហេតុសំខាន់ដែលលោក អូបាម៉ា ប្រើសម្រាប់ហាមឃាត់ មុនលោកចប់អាណត្តិនៅពេលខ្លីខាងមុខ។
ទន្ទឹមគ្នានេះដែរ រដ្ឋាភិបាលកាណាដា ក៏បានចេញចំណាត់ការស្រដៀងគ្នានេះដែរ មិនបានហាមឃាត់សកម្មភាពរុករកប្រេង និងឧស្ម័នអចិន្ត្រយ៍ដូចអាមេរិកឡើយ ដោយត្រួតពិនិត្យលើវិធានការរៀងរាល់៥ឆ្នាំម្ដង។ ចំណែកសេតវិមានប្រកាសថា ការសម្រេចចិត្តរបស់លោក អូបាម៉ា លើរឿងនេះ នឹងស្ថិតជាអចិន្ត្រៃយ៍ ដោយសម្អាងលើច្បាប់ឆ្នាំ១៩៥៣ ដែលផ្ដល់អំណាចឲ្យប្រធានាធិបតី ហាមឃាត់ការជួលតំបន់ឆ្នេរជារៀងរហូត។
បើតាមសារព័ត៌មាន BBC ការសម្រេចចិត្តការពារដីជាច្រើនលានហិចតាដែលសម្បូរប្រេង និងឧស្ម័ន ហាក់ដូចជាការបិទផ្លូវប្រធានាធិបតីជាប់ឆ្នោត ដូណាល់ ត្រាំ ដែលចង់ប្រើប្រាស់ធនធានរ៉ែប្រទេសឲ្យអស់លទ្ធភាព។ អំឡុងពេលយុទ្ធនាការស្វែងរកសំឡេងឆ្នោត លោក ត្រាំ និយាយថា លោកនឹងទាញយកប្រយោជន៍ពីធនធានរ៉ែបម្រុងទុករបស់ប្រទេស សម្រាប់បំពេញតម្រូវការថាមពលរបស់អាមេរិក។
យ៉ាងណាមិញ វាមិនមែនជារឿងងាយស្រួលឡើយ ដែលប្រធានាធិបតីថ្មីចង់កែប្រែការសម្រេចចិត្តរបស់ប្រធានាធិបតីចាស់នោះ ហើយក្នុងករណីលោក ត្រាំ ចង់កែប្រែបម្រាមនេះ អាចត្រូវប្រឈមមុខផ្លូវច្បាប់ទៀតផង។ ប៉ុន្តែវិទ្យាស្ថានប្រេងអាមេរិកអះអាងថា គ្មានអ្វីដែលអចិន្ត្រៃយ៍ឡើយ ហើយប្រធានាធិបតី ដូណាល់ ត្រាំ ក៏អាចលុបចោលការសម្រេចរបស់លោក បារ៉ាក់ អូបាម៉ា បានផងដែរ៕
Tag:
អាមេរិក
បារ៉ាក់ អូបាម៉ា
© រក្សាសិទ្ធិដោយ thmeythmey.com