ក្រសួងពាណិជ្ជកម្មតម្រូវឲ្យអាជីវករលក់លោហធាតុ-ត្បួង ត្រូវបិទស្លាកតម្លៃ និងចេញវិក័យបត្រផ្លូវការ

ជាតិ

សេដ្ឋកិច្ច

ក្រសួងពាណិជ្ជកម្មតម្រូវឲ្យអាជីវករលក់លោហធាតុ-ត្បួង ត្រូវបិទស្លាកតម្លៃ និងចេញវិក័យបត្រផ្លូវការ

21, Dec 2016 , 8:39 pm

រូបភាព

ដោយ:

ភ្នំពេញ៖ ដើម្បីលើកកម្ពស់ការទទួលខុសត្រូវរបស់ម្ចាស់អាជីវកម្ម ការពារផលប្រយោជន៍អតិថិជនជាតិ- អន្តរជាតិ និងលើកស្ទួយកិត្តិយសជាតិ ក្រសួងពាណិជ្ជកម្មបានតម្រូវឲ្យអាជីករលក់លោហធាតុ-ត្បូងថ្មមានតម្លៃជាគ្រឿងអលង្ការ និងវត្ថុអនុសស្សាវរីយ៍ ត្រូវប្រកាន់ខ្ជាប់នូវភាពសុចរិតក្នុងសកម្មភាពអាជីវកម្ម លក់ដូរ ចែកចាយ និងផ្សព្វផ្សាយផលិតផលរបស់ខ្លួន។

សេចក្ដីណែនាំរបស់ក្រសួងពាណិជ្ជកម្ម ដែលចេញនៅថ្ងៃទី១៩ខែធ្នូ បានតម្រូវឲ្យអាជីករ ពាណិជ្ជកររកស៊ីលក់ដូរលោហធាតុ-ត្បូងថ្មមានតម្លៃជាគ្រឿងអលង្ការ និងវត្ថុអនុវស្សាវរីយ៍ ត្រូវផ្ដល់ព័ត៌មានពិតប្រាកដពាក់ព័ន្ធទំនិញរបស់ខ្លួន និងបិទស្លាក់តម្លៃលើទំនិញ ព្រមទាំងចេញវិក័យបត្រប្រើប្រាស់ផ្លូវការ និងមានខ្លឹមសារជាក់លាក់ជូនអតិថិជន។ ជាមួយគ្នានេះអ្នកទិញ ត្រូវមានសុចរិតភាពចំពោះការទិញទំនិញ ហើយត្រូវពិនិត្យលោហធាតុ-ត្បូង ឲ្យបានច្បាស់លាស់ និងស្នើសុំវិក័យបត្រទិញ-លក់ពីអាជីវករ។

សេចក្ដីណែនាំបន្តថា អាជីវករ ពាណិជ្ជករទាំងឡាយណាដែលផ្គត់ផ្គង់ ចែកចាយ លក់ដូរ ឬផ្សាយពាណិជ្ជកម្ម លោហធាតុ-ត្បូងថ្មមានតម្លៃជាគ្រឿងអលង្ការ និងវត្ថុអនុស្សាវរីយ៍ ដោយក្លែងបន្លំអ្នកប្រើប្រាស់ នឹងត្រូវទទួលទណ្ឌកម្ម តាមច្បាប់ស្ដីពីការគ្រប់គ្រងគុណភាព សុវត្ថិភាពលើផលិតផលទំនិញ និងសេវា និងបណ្ដាបទប្បញ្ញត្តិពាក់ព័ន្ធជាធរមាន។

អគ្គនាយកដ្ឋានកាំកុងត្រូលចុះត្រួតពិនិត្យការដាក់តាំងលក់ ចែកចាយ និងឃ្លាំងមើលការផ្សព្វផ្សាយផលិតផលលោហធាតុ-ត្បូងថ្មមានតម្លៃជាគ្រឿងអលង្ការ និងវត្ថុអនុស្សាវរីយ៍ ដើម្បីទប់ស្កាត់ និងបង្ក្រាបក្នុងករណីមានការក្លែងបន្លំ។ ទន្ទឹមនឹងនេះ អគ្គនាយកដ្ឋានកាំកុងត្រូល ត្រូវរៀបចំយន្តការដោះស្រាយបញ្ហាផ្សេងៗពីអ្នកប្រើប្រាស់ តាមរយៈការបង្កើតប្រព័ន្ធទំនាក់ទំនង និងប្រអប់ទទួលព័ត៌មានពាក់ព័ន្ធនឹងការប្ដឹងតវ៉ាពីអ្នកប្រើប្រាស់។ នេះបើតាមសេចក្ដីណែនាំខាងលើ៕