អ៊ីស្រាអែល កោះហៅមន្ត្រីទូតសមាជិកក្រុមប្រឹក្សាសន្តិសុខមកសួរនាំរឿងបោះឆ្នោតប្រឆាំងខ្លួន

អន្តរជាតិ

នយោបាយអន្តរជាតិ

អ៊ីស្រាអែល កោះហៅមន្ត្រីទូតសមាជិកក្រុមប្រឹក្សាសន្តិសុខមកសួរនាំរឿងបោះឆ្នោតប្រឆាំងខ្លួន

26, Dec 2016 , 11:13 am

រូបភាព

នាយករដ្ឋមន្ត្រីអ៊ីស្រាអែល បេនចាមីន នេតាន់យ៉ាហ៊ូ (រូបភាព Xinhua)

ដោយ: តន ចាន់រិទ្ធារ៉ា

រដ្ឋាភិបាលនាយករដ្ឋមន្ត្រី បេនចាមីន នេតាន់យ៉ាហ៊ូ (Benjamin Netanyahu) ខឹងសម្បារយ៉ាងខ្លាំងលើសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលបានថ្កោលទោសសកម្មភាពអ៊ីស្រាអែលបំពានទឹកដីប៉ាឡេស្ទីន។ ក្រៅពីព្រលះអាមេរិកធ្ងន់ៗរឿងមិនបោះឆ្នោតប្រឆាំង អ៊ីស្រាអែល ក៏កោះហៅអគ្គរដ្ឋទូតរដ្ឋសមាជិកក្រុមប្រឹក្សាសន្តិសុខទាំងអស់ដែលបោះឆ្នោតគាំទ្រសេចក្ដីសម្រេចនេះ មកសួរនាំទៀតផង។

នាយករដ្ឋមន្ត្រី បេនចាមីន នេតាន់យ៉ាហ៊ូ បានចេញចំណាត់ការខ្លាំងៗមិនធ្លាប់មានប្រឆាំង ក្រុមប្រឹក្សាសន្តិសុខអង្គការសហប្រជាជាតិដែលចេញដំណោះស្រាយថ្កោលទោសអ៊ីស្រាអែល។ លោកអះអាងថា អ៊ីស្រាអែលនឹងធ្វើគ្រប់យ៉ាងដើម្បីការពារអ៊ីស្រាអែល ពីផលប៉ះពាល់នៃសេចក្ដីសម្រេចរបស់ក្រុមប្រឹក្សាសន្តិសុខ ដែលជាសេចក្ដីសម្រេចលើកដំបូងស្ដីពីអ៊ីស្រាអែល និងប៉ាឡេស្ទីន ក្នុងពេលជាង៨ឆ្នាំមកនេះ។

ក្នុងកិច្ចប្រជុំគណៈរដ្ឋមន្ត្រីនៅថ្ងៃទី២៥ ខែធ្នូ លោក នេតាន់យ៉ាហ៊ូ បានបន្តរិះគន់រដ្ឋបាលលោកប្រធានាធិបតី បារ៉ាក់ អូបាម៉ា ដែលសម្រេចចិត្តបោះឆ្នោតអនុប្បវាទ។ បើតាមសារព័ត៌មានរុស្សី Sputnik នាយករដ្ឋមន្ត្រីរូបនេះបញ្ជាក់ថា រដ្ឋបាលអាមេរិកជាអ្នកផ្ដើមគំនិតនៅពីក្រោយសេចក្ដីសម្រេចនេះ, បង្ហាញជំហរថ្មីរបស់ខ្លូន, រូចបញ្ជូនបន្តទៅឲ្យក្រុមប្រឹក្សាសន្តិសុខ។

ដោយមិនខ្វល់ពីថ្ងៃបុណ្យ Christmas អ្វីនោះ នាយករដ្ឋមន្ត្រី នេតាន់យ៉ាហ៊ូ ដែលជារដ្ឋមន្ត្រីការបរទេសដែរនោះ ក៏បានកោះហៅអគ្គរដ្ឋទូតប្រទេសសមាជិកក្រុមប្រឹក្សាសន្តិសុខទាំងអស់ប្រចាំអ៊ីស្រាអែល មកសួរនាំលើការបោះឆ្នោតគាំទ្រនេះ។ អគ្គរដ្ឋទូតទាំងអស់ នឹងត្រូវជួបដាច់ដោយឡែកពីគ្នាជាមួយមន្ត្រីជាន់ខ្ពស់ក្រសួងការបរទេសអ៊ីស្រាអែល ប៉ុន្តែគេមិនទាន់ដឹងពីព័ត៌មានលម្អិតនៅឡើយទេ។

ចំណែកអគ្គរដ្ឋទូតអាមេរិកប្រចាំអ៊ីស្រាអែល Dan Shapiro ក៏ត្រូវកោះហៅសួរនាំដែរ ដ្បិតអាមេរិកមិនបានបោះឆ្នោតវ៉េតូប្រឆាំង ដែលវាបានបើកផ្លូវឲ្យក្រុមប្រឹក្សាសន្តិសុខអាចថ្កោលទោសអ៊ីស្រាអែលបាន។ កាន់តែធ្ងន់ធ្ងរនោះ អ៊ីស្រាអែល ក៏បានព្យួរទំនាក់ទំនងការទូតបណ្ដោះអាសន្នជាមួយណូវែលសេឡង់ និងសេណេហ្កាល់ ព្រោះប្រទេសទាំងពីរជាអ្នករៀបចំដំណោះស្រាយនេះ។

មិនយូរប៉ុន្មានក្រោយការបោះឆ្នោត រដ្ឋមន្ត្រីការបរទេសអាមេរិក ចន ឃែរី បានចេញមកការពារការសម្រេចចិត្តរបស់ខ្លួន ដែលមិនប្រើប្រាស់សិទ្ធិជំទាស់ដំណោះស្រាយក្រុមប្រឹក្សាសន្តិសុខដែលទាមទារឲ្យអ៊ីស្រាអែលឈប់បំពានទឹកដីប៉ាឡេស្ទីន។ លោកសង្កត់ធ្ងន់ថា ការប៉ុនប៉ងរបស់អ៊ីស្រាអែលក្នុងការសាងសង់ផ្ទះសម្បែង ឬសហគមន៍ក្នុងតំបន់ប្រទាញប្រទង់រួមទាំងហ្សេរុយសាឡឹមខាងកើតដែរនោះ បង្កជាគ្រោះថ្នាក់ដល់ «ដំណោះស្រាយរដ្ឋពីរ» រវាងអ៊ីស្រាអែល និងប៉ាឡេស្ទីន៕