សម្តេច ហ៊ុន សែន៖ ព្រឹទ្ធាចារ្យ ឆេង ផុន រួមចំណែកយ៉ាងសំខាន់ក្នុងការសង្គ្រោះសិល្បៈខ្មែរឲ្យរស់ឡើងវិញ

ជាតិ

សម្តេច ហ៊ុន សែន៖ ព្រឹទ្ធាចារ្យ ឆេង ផុន រួមចំណែកយ៉ាងសំខាន់ក្នុងការសង្គ្រោះសិល្បៈខ្មែរឲ្យរស់ឡើងវិញ

26, Dec 2016 , 9:53 pm

រូបភាព

ដោយ: ថ្មីៗ

«ខ្ញុំ និងសហការីក្នុងរាជរដ្ឋាភិបាលមកជូនដំណើរបងប្រុសជាលើកចុងក្រោយ ខ្ញុំនៅនឹកឃើញអ្វីៗគ្រប់យ៉ាងដែលយើងបានរួមដំណើរជាមួយគ្នាក្នុងកាលៈទេសៈដ៏លំបាកបំផុត សុំគោរពជូនដំណើរនឹងលាបងជារៀងរហូត»។ នេះជាចំណាររបស់សម្តេចនាយករដ្ឋមន្ត្រីឧទ្ទិសដល់ ព្រឹទ្ធចារ្យ ឆេង ផុន ដែលបានទទួលមរណភាពកាលពីថ្ងៃទី២២ ខែធ្នូ ឆ្នាំ២០១៦ ក្នុងអាយុ៨៦ឆ្នាំដោយរោគាពាធ។

បន្ថែមពីលើសាររំលែកទុក្ខភ្លាមៗ សម្តេចនាយករដ្ឋមន្ត្រី ហ៊ុន សែន បានអញ្ជើញទៅគោរពវិញ្ញាណក្ខន្ធ លោកព្រឹទ្ធាចារ្យ ឆេង ផុន នៅក្រុងតាខ្មៅ ខេត្តកណ្តាល កាលពីរសៀលថ្ងៃចន្ទ ទី២៦ ខែធ្នូនេះ។ ព្រឹទ្ធាចារ្យ ឆេង ផុន ជាអតីតរដ្ឋមន្ត្រីក្រសួងវប្បធម៌ និងឃោសនាការព័ត៌មាននៅទសវត្សរ៍ឆ្នាំ៨០ និងធ្លាប់ធ្វើជាប្រធានគណៈកម្មាធិការជាតិរៀបចំការបោះឆ្នោតក្នុងសម័យបោះឆ្នោតឆ្នាំ១៩៩៧ ហើយលោកក៏ជាស្ថាបនិកមជ្ឈមណ្ឌលវប្បធម៌ និងវិបស្សនាផងដែរ។

សម្រាប់សម្តេច ហ៊ុន សែន មរណភាពរបស់ព្រឹទ្ធាចារ្យ ឆេង ផុន គឺជាការបាត់បង់បិតា ជីតា ប្រកបដោយព្រហ្មវិហារធម៌ និងក៏ជាការបាត់បង់នូវធនធានមនុស្សដ៏សំខាន់ម្នាក់របស់ប្រទេសជាតិ។ សម្តេចលើកឡើងថា ព្រឹទ្ធាចារ្យ ឆេង ផុន បានចូលរួមយ៉ាងសកម្មផងដែរនៅក្នុងការអប់រំបណ្ដុះឆន្ទៈសិល្បករឲ្យស្រឡាញ់សិល្បៈ វប្បធម៌ ដែលជាដួងព្រលឹងរបស់ខ្មែរ ព្រមទាំងបានជួយសង្គ្រោះសិល្បៈស្ទើរគ្រប់ទម្រង់ឲ្យរស់ឡើងវិញនៅក្រោយរបបខ្មែរក្រហមដួលរលំនៅឆ្នាំ១៩៧៩៕