ក្រុមបឹងកេតអង្គរម្ចាស់ជើងឯករងឆ្នាំ២០១៥ បានបង្ហាញក្តីកង្វល់មុនជួបគូប្រជែងក្នុងវគ្គពាក់កណ្តាលផ្តាច់ព្រ័ត្រនៃពានរង្វាន់ Toyota Mekong Club Championship 2016 នាថ្ងៃទី៣១ ខែធ្នូ នៅពហុកីឡដ្ឋានជាតិ ក្រោយពីកូនក្រុមមួយចំនួនកំពុងរ៉ាំរ៉ៃជាមួយរបួស។ ការបង្ហាញក្តីកង្វល់នេះធ្វើឡើងក្នុងសន្និសីទសារព័ត៌មាននៅសណ្ឋាគារកាប៉ូឌីយ៉ាណា កាលពីថ្ងៃទី២៣ ខែធ្នូ។
បញ្ហារបួសរបស់កីឡាករសំខាន់ៗរបស់បឹងកេតអង្គរដូចជា ចាន់ វឌ្ឍនាកា, ស៊ូ យ៉ាទី, Gbenga និង Muramatsu បានធ្វើឲ្យលោក ប្រាក់ សុវណ្ណារ៉ា ដែលជាគ្រូបង្វឹករបស់ក្រុមបឹងកេតអង្គរបានបង្ហាញក្តីកង្វល់យ៉ាងខ្លាំងចំពោះជំនួបក្នុងវគ្គពាក់កណ្តាលផ្តាច់ព្រ័ត្រនៃពានរង្វាន់ Toyota Mekong Club Championship 2016 នាថ្ងៃទី៣១ ខែធ្នូ នៅពហុកីឡដ្ឋានជាតិ។ ព្រោះមកទល់ពេលនេះលោកមិនទាន់ប្រាកដថា កីឡាករទាំង៤អាចចូលរួមបាន១០០ភាគរយនោះឡើយ ទោះបីកីឡាករ Gbenga និង Muramatsu អាចចូលហ្វឹកហាត់ជាមួយក្រុមក៏ដោយ ប៉ុន្តែ ចាន់ វឌ្ឍនាកា និងស៊ូ យ៉ាទី មិនទាន់ចូលហ្វឹកហាត់នោះទេ។
មកទល់ពេលនេះ លោក ប្រាក់ សុវណ្ណារ៉ា មិនទាន់ដឹងច្បាស់ពីគូប្រជែងរបស់ខ្លួនក៏ដោយ ប៉ុន្តែលោកគិតថា ក្រុមទាំង៣ដែលត្រូវឡើងមកជួបបឹងកេតអង្គរសុទ្ធសឹងជាក្រុមខ្លាំងដែលអាចបង្កបញ្ហាដល់បឹងកេតជានិច្ច។ ប៉ុន្តែបើយោងតាមលទ្ធផលនៃការប្រកួតជម្រុះជាក់ស្តែងបឹងកេតអង្គរអាចនឹងជួបជាមួយក្រុមតំណាងឲ្យមីយ៉ាន់ម៉ា ឬក្រុមតំណាងឲ្យប្រទេសឡាវ។
ទោះបីជាយ៉ាងនេះក្តី គ្រូបង្វឹកក្រុមជើងឯករងឆ្នាំ២០១៥រូបនេះបានប្តេជ្ញាថា នឹងខិតខំប្រឹងប្រែងឲ្យអស់ពីលទ្ធភាព ដើម្បីបង្ហាញពីភាពខ្លាំងរបស់វិស័យកីឡាបាល់ទាត់របស់កម្ពុជា ជាពិសេសលោកនឹងព្យាយាមធ្វើយ៉ាងណាមិនធ្វើឲ្យទស្សនិកជនខកចិត្តនោះឡើយ។ លើសពីនេះលោកប្តេជ្ញាថា នឹងឡើងទៅជួលជើងឯកឆ្នាំចាស់ Buriram United FC នៅវគ្គផ្តាច់ព្រ័ត្រទាល់តែបាន។
ចំណែកក្រុម SHB Da Nang របស់វៀតណាម បានបាត់បង់ឱកាសប្រជែងបន្តទៀតហើយ បន្ទាប់ពីពីរប្រកួតក្រុមនេះបានត្រឹមស្មើ ២-២ ជាមួយក្រុម Yadanarbon របស់មីយ៉ាន់ម៉ា និងចាញ់ក្រុម Lanexang United របស់ឡាវ ២-១។ ក្រុមដែលត្រូវឡើងមកជួយបឹងកេតអង្គរនៅថ្ងៃទី៣១ ខែធ្នូ ដូចជា Yadanarbon និងក្រុម Lanexang United ត្រូវប្រកួតប្រជែងគ្នានាវេលាម៉ោង៦ល្ងាច ថ្ងៃទី២៧ ខែធ្នូ នេះនៅលើទឹកដីមីយ៉ាន់ម៉ា។
«ក្រុមលីកតំណាងឲ្យមីយ៉ាន់ម៉ា ឡាវ និងវៀតណាម ដែលកំពុងធ្វើការប្រកួតជម្រុះ សុទ្ធតែជាក្រុមខ្លាំង ទោះបីជាយើងត្រូវជួបក្រុមណាមួយ គឺវានៅតែជាការលំបាកចំពោះបឹងកេត។ ដំបូងឡើយ ខ្ញុំគិតថា ក្រុមវៀតណាមខ្លាំង ប៉ុន្តែជាក់ស្តែងពួកគេបានចាញ់ក្រុមឡាវបាត់ទៅហើយ អ៊ីចឹងខ្ញុំអត់ទាន់ហ៊ានសន្និដ្ឋានថា ក្រុមមួយណាខ្សោយនៅឡើយទេ គឺត្រូវចាំតាមដានបន្ថែមទៀត»។ នេះជាការបញ្ជាក់របស់ លោក ប្រាក់ សុវណ្ណារ៉ា គ្រូបង្វឹកក្រុមបឹងកេតអង្គរ។
ការគ្រងជើងឯករងពានរង្វាន់ Toyota Mekong Club 2015 និងការទទួលបានកៅអីនៅវគ្គពាក់កណ្តាលផ្តាច់ព្រ័ត្ររបស់បឹងកេតបានធ្វើឲ្យ លោក គង់ នួន ប្រធានក្រុមហ៊ុនតូយ៉ូតាខេមបូឌា(Toyota)ដែលជាអ្នកបង្កើតពានរង្វាន់នេះឡើង និងលោក ម៉ៃ តុលា អ្នកនាំពាក្យសហព័ន្ធកីឡាបាល់ទាត់កម្ពុជាស្ងើចសរសើរយ៉ាងខ្លាំងចំពោះសមត្ថភាពដ៏អស្ចារ្យរបស់បឹងកេតអង្គរ។ ជាមួយគ្នានេះលោក ម៉ៃ តុលា បានចាត់លទ្ធផលនេះជាប្រវត្តិសាស្ត្រថ្មីសម្រាប់បាល់ទាត់កម្ពុជា។
ចំណែក លោក គង់ នួន បានចាត់ទុកលទ្ធផលនេះថា៖«ឆ្នាំមុនក្រុមបឹងកេត តំណាងឲ្យប្រទេសកម្ពុជាយើង ទទួលបានចំណាត់ថ្នាក់លេខ២ និងទទួលបានពានជាកីឡាករល្អ ខណៈក្រុម Buriram United FC របស់ថៃ ក្លាយជាម្ចាស់ជើងឯក។ បើទោះបីជាយើង មិនទទួលបានលេខ១កាលពីឆ្នាំមុន ប៉ុន្តែវាជាលទ្ធផលមួយ ដែលជំរុញឲ្យកីឡាករកម្ពុជាយើងប្រឹងប្រែងបន្ថែមទៀតសម្រាប់ស្វែងរកជ័យជម្នះនោះឆ្នាំនេះ»។
គួរបញ្ជាក់ថា សម្រាប់រដូវកាលទី៣ ឆ្នាំ២០១៦ ប្រាក់រង្វាន់លើកទឹកមិនផ្លាស់ប្តូរនោះឡើយ គឺក្រុមម្ចាស់ជើងឯកទទួលបានប្រាក់រង្វាន់ ៧៥,០០០ដុល្លារ រីឯម្ចាស់ជើងឯករង ៥ម៉ឺនដុល្លារ ខណៈក្រុមលេខ៣ទទួលបាន ៣ម៉ឺនដុល្លារ និងលេខ៤ បាន ១៥,០០០ដុល្លារ។ ក្រៅពីប្រាក់រង្វាន់នេះក៏មានការផ្តល់ជូនប្រាក់រង្វាន់លើកទឹកចិត្តផ្សេងៗទៀតផងដែរ។
គួររំឭកផងដែរថា សម្រាប់រដូវកាលមុនក្រុមបឹងកេតអង្គររបស់កម្ពុជាក្រោយចាញ់ Buriram United FC របស់ថៃ ១-០ ក្នុងវគ្គផ្តាច់ព្រ័ត្រ ទទួលបានប្រាក់រង្វាន់លើកទឹកចិត្តចំនួន៥ម៉ឺនដុល្លារ ខណៈ Buriram United FC ទទួលបាន៧៥,០០០ដុល្លារ។ ចំណែកកីឡាករ ចាន់ វឌ្ឍនាកា បានជាប់ជាកីឡាករល្អជាងគេប្រចាំព្រឹត្តិការណ៍ពានរង្វាន់ Toyota Mekong Club Championship 2015។ មុនឡើងដល់វគ្គផ្តាច់ព្រ័ត្របឹងកេតអង្គរបានយកឈ្នះក្រុមលីកកំពូលរបស់ឡាវ និងមីយ៉ាន់ម៉ា រួចបន្តយកឈ្នះក្រុមលីកកំពូលរបស់វៀតណាម នៅវគ្គពាក់កណ្តាលផ្តាច់ព្រ័ត្រ៕