អន្តរជាតិ
នយោបាយអន្តរជាតិ
តៃវ៉ាន់ ដាស់តឿនទាហានខ្លួនឲ្យត្រៀមខ្លួនជានិច្ច ក្រោយចិន សម្ញែងនាវាដឹកនាំយន្តហោះក្បែរខ្លួននោះ
×
រដ្ឋាភិបាលកោះតៃវ៉ាន់ ហាក់ដូចជាកំពុងតែបញ្ជា និងប្រុងការខ្លាំងទៅកាន់កងទ័ពរបស់ខ្លួន ក្រោយពីចិន បានបញ្ជូននាវាដឹកយន្តហោះចម្បាំងឆ្លងកាត់តំបន់សមុទ្រចិនខាងត្បូងដែលស្ថិតក្បែរកោះវ៉ាន់ផងដែរនោះ។ ការរឹតបន្តឹងសន្តិសុខការពារនេះ ក៏ធ្វើឡើងស្របពេល រដ្ឋាភិបាលទាំងពីរ បាននិងកំពុងតែប្រឈមមុខការទូតគ្នាខ្លាំងផងដែរ។
«ការគំរាមកំហែងពីគូសត្រូវរបស់យើង កំពុងតែកើនឡើងពីមួយថ្ងៃទៅមួយថ្ងៃ។ យើង គួរតែរក្សាការត្រៀមខ្លួនការប្រយុទ្ធគ្រប់ពេលវេលា។ យើង ត្រូវតែពង្រឹងការបណ្តុះបណ្តាលយោធារបស់យើង ដូច្នេះ ពួកគេ(ទាហាន) មិនត្រឹមតែអាចរួចផុតពីការស្លាប់នោះទេ ក៏ប៉ុន្តែ ក៏អាច កម្ទេចសត្រូវ និងអាចបំពេញបេសកម្មផងដែរ»។ នេះគឺសេចក្តីថ្លែងការណ៍របស់រដ្ឋមន្ត្រីការពារជាតិតៃវ៉ាន់ Feng Shih-kuan នៅថ្ងៃទី២៦ ធ្នូ ជុំវិញបញ្ហាសន្តិសុខចុងក្រោយ ដែលបានដកស្រង់ដោយភ្នាក់ងារព័ត៌មាន Reuters។
បើទោះបីជាតៃវ៉ាន់ បានចាត់ទុកសកម្មភាពដឹកជញ្ជូនយន្តហោះចម្បាំងរបស់ចិន ថាជាការគំរាមកំហែងក៏ដោយ ក្រសួងការពារជាតិចិន បានចេញសេចក្តីប្រកាសមួយដោយ អះអាងថា នាវាដឹកយន្តហោះចម្បាំងទីមួយ (Liaoning) របស់ខ្លួនទៅកាន់តំបន់ភាគខាងលិចមហាសមុទ្រប៉ាស៊ីហ្វិកដើម្បីចូលរួមសមយុទ្ធយោធាទ្រង់ទ្រាយធំមួយនោះទេ។ ក្រសួង ក៏បានបន្តទៀតថា សមយុទ្ធយោធានេះ ក៏ជាលំហាត់យោធាប្រចាំឆ្នាំដែរ។
តែយ៉ាងណាក៏ដោយ ដំណើរនៃការដឹកជញ្ជូននាវាដឹកយន្តហោះចម្បាំងរបស់ចិន ហាក់ដូចជាចៃដន្យពេក។ ចៃដន្យនោះគឺ នាវា បានកាត់ទាំងតំបន់ក្បែរកោះតៃវ៉ាន់ ជប៉ុន និងតំបន់ជម្លោះសមុទ្រចិនខាងត្បូង ដែលមានរដ្ឋអាស៊ានពាក់ព័ន្ធផងដែរនោះ។ ទំនងជាចិន ចង់សម្ញែងសាច់ដុំយោធាដាក់ប្រទេសទាំងនោះហើយ។
អ្វីគួរកត់សម្គាល់នោះ ថ្មីៗនេះ តៃវ៉ាន់ និងចិន ក៏មានបញ្ហាការទូតជាមួយគ្នាខ្លាំងណាស់ដែរ។ បញ្ហានោះ ក៏ពាក់ព័ន្ធជាមួយការលូកដៃរបស់អាមេរិកជាមួយនឹងតៃវ៉ាន់ ដែលចិន តែងតែប្រកាសក្តែងៗម្តងហើយម្តងទៀតថាជាផ្នែកមួយរបស់ខ្លួននោះ។ នៅសប្តាហ៍មុន លោកប្រធានាធិបតីជិតផុតអាណត្តិ បារ៉ាក់ អូបាម៉ា បានអនុម័តច្បាប់ថវិកាការពារជាតិឆ្នាំ២០១៧ថ្មី ដោយនៅតែពង្រីកកិច្ចសហប្រតិបត្តិការយោធាជាមួយនឹងតៃវ៉ាន់ ខណៈ លោកប្រធានាធិបតីត្រៀមកាន់អំណាចអាមេរិក ដូណាល់ត្រាំ អះអាងថា លោក មិនសូវខ្វល់ខ្វាយទៅនឹងគោលនយោបាយចិនតែមួយនោះ៕
Tag:
តៃវ៉ាន់
អាមេរិក
ចិន
© រក្សាសិទ្ធិដោយ thmeythmey.com