អន្តរជាតិ
សភាគុយបាអនុម័តច្បាប់ហាមយកឈ្មោះ ហ្វីដែលកាស្ត្រូ ប្រើនៅទីសាធារណៈ អតីតមេដឹកនាំបដិវត្តន៍គុយបា ហ្វីដែល កាស្រ្តូ (រូបភាព Xinhua)
× សភាជាតិនៃរដ្ឋកុម្មុយនីស្តគុយបា បានសម្រេចអនុម័តច្បាប់ដែលសំដៅហាមឃាត់ការសាងសង់រូបសំណាកមេដឹកនាំបដិវត្តន៍ ហ្វីដែល កាស្ត្រូ (Fidel Castro) ឬក៏ដាក់ឈ្មោះរបស់លោកសម្រាប់ទីសារធាណៈនានា។ ការអនុម័តច្បាប់នេះ ធ្វើឡើងស្របតាមបំណងប្រាថ្នារបស់លោក ហ្វីដែល កាស្ត្រូ ផ្ទាល់ ដែលមិនចង់ឲ្យមានវប្បធម៌នៃគោរពបុគ្គលណាមួយខ្លាំងឡើយ។
លោក ហ្វីដែល កាស្ត្រូ អតីតប្រធានាធិបតី និងជាមេដឹកនាំបដិវត្តកុំម្មុយនីស្តគុយបា បានទទួលទទួលមរណភាពក្នុងអាយុ៩០ឆ្នាំនៅថ្ងៃទី២៦ ខែវិច្ឆិកា ឆ្នាំ២០១៦ ។ កាលលោកនៅមានជីវិតនៅឡើយនោះ លោកបានបន្សល់ទុកពាក្យបណ្ដាំមួយ គឺលោកមិនចង់ឲ្យមានការប្រើឈ្មោះរបស់លោកសម្រាប់ដាក់ឲ្យទីតាំងណាមួយ ហើយលោកក៏មិនត្រូវការស្តូបរម្លឹកគុណអ្វីដែរ។
សារព័ត៌មាន Daily Mail ផ្សាយថា គោរពតាមពាក្យបណ្ដាំនេះ សភាគុយបា នៅថ្ងៃទី២៧ ខែធ្នូ បានសម្រេចបង្កើតច្បាប់ថ្មីមួយ ហាមប្រាមយកឈ្មោះរបស់អតីតមេដឹកនាំបដិវត្តន៍ ហ្វីដែល កាស្ត្រូ ទៅប្រើនៅតាមអាគារសាធារណៈ ឬក៏ដាក់ជាឈ្មោះឲ្យសាលារៀនជាដើម។ លោក ហ្វីដែល កាស្ត្រូ ធ្លាប់អះអាងថា៖ «បុរស និងស្ត្រី ដែលដឹកនាំគុយបា គឺជាមនុស្ស មិនមែនព្រះឡើយ»។
ប្រធានាធិបតីគុយបា រ៉ាអ៊ូល កាស្ត្រូ ដែលប្អូនប្រុសបង្កើតរបស់លោក ហ្វីដែល កាស្ត្រូ បានថ្លែងទៅកាន់កិច្ចប្រជុំសភាថា គំនិតតស៊ូប្ដូរផ្ដាច់របស់បងប្រុសលោក នឹងនៅតែមានក្នុងសតិសម្បជញ្ញៈនៃជនបដិវត្តន៍គុយបាទាំងថ្ងៃនេះ ថ្ងៃស្អែក និងជារៀងរហូត។ ដូច្នេះវិធីសំខាន់បំផុតដើម្បីគោរព «មេបញ្ជាការរបស់យើង» គឺដើរតាមគំនិតបដិវត្តន៍របស់លោក។
យ៉ាងណាក្ដី ចាប់តាំងពីមរណភាពកាលពីមួយខែមុន គេសង្កេតឃើញរូបថតដ៍ធំរបស់លោក ហ្វីដែល កាស្ត្រូ ដាក់តាំងនៅទីលានបដិវត្តន៍ក្នុងក្រុងឡាហាវ៉ាន។ ច្បាប់ថ្មីនេះ មិនបានរារាំងការយកឈ្មោះ ឬក៏អ្វីផ្សេងដែលជាប់ទាក់ទងនឹងលោកទៅប្រើក្នុងបទចម្រៀង, ក្នុងអត្ថបទអក្សរសិល្ប៍ និងរោងកុនអ្វីដែរ។ ម្យ៉ាងទៀត រូបថតរបស់ ហ្វីដែល កាស្ត្រូ ដែលត្រូវបានព្យួរតាមសាធារណៈ, អាគារស្ថាប័នរដ្ឋ នឹងនៅតែរក្សាដដែល៕
© រក្សាសិទ្ធិដោយ thmeythmey.com