ជាតិ
ឆ្លងស្រឡាង ពេលជួសជុលស្ពានជ្រោយចង្វារចាស់ មិនតម្រូវឲ្យបង់ប្រាក់ឡើយ
× ភ្នំពេញ៖ អាជ្ញាធរនឹងដាក់ឲ្យប្រើប្រាស់ស្រឡាង ដោយឥតយកកម្រៃ អំឡុងពេលស្ពានជ្រោយចងា្វរចាស់ ឬស្ពានមិត្តភាពកម្ពុជា-ជប៉ុន ត្រូវបិទបណ្ដោះអាសន្ន ដើម្បីបើកការដ្ឋានជួសជុលកែលម្អ ចាប់ពីខែមករាឆ្នាំ២០១៧ ។ នេះបើតាមលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។
តាមផែនការស្ពានជ្រោយចង្វារចាស់ ដែលត្រូវបានកសាងក្នុងសម័យសង្គមរាស្ត្រនិយម នឹងត្រូវបើកការដ្ឋានជួសជុលឡើងវិញ នៅខែមករាឆ្នាំ២០១៧ ។ ក្រុមហ៊ុនជប៉ុននឹងចំណាយពេលប្រហែល ២២ខែដើម្បីបញ្ចប់ការជួសជុលស្ពាននេះ។ នៅក្នុងអំឡុងពេលដំណើរការជួសជុលស្ពាន អាជ្ញាធរចង់យកស្រឡាងពីអ្នកលឿងមកចម្លងអ្នកដំណើរពីត្រើយម្ខាង ទៅត្រើយម្ខាងទៀតនៅទីតាំងនេះ។
លោក ស៊ុន ចាន់ថុល បានថ្លែងប្រាប់អ្នកកាសែតនៅក្នុងសន្និបាតបូកសរុបការងារប្រចាំឆ្នាំ២០១៦ និងទិសដៅការងារឆ្នាំ២០១៧ នៅថ្ងៃទី២៨ខែធ្នូនេះថា មុនដំបូងក្រសួងគ្រោងដាក់ឲ្យប្រើប្រាស់ស្រឡាងតែ១ ប៉ុន្តែឥឡូវក្រសួងកំពុងពិចារណាដាក់ដំណើរការស្រឡាងចំនួន២ ដើម្បីសម្រួលការធ្វើដំណើរ។ លោកបញ្ជាក់ថា ការឆ្លងស្រឡាងអំឡុងពេលជួសជុលស្ពានជ្រោយចង្វារចាស់នេះ នឹងមិនតម្រូវឲ្យបង់កម្រៃនោះទេ ដោយលោកអះអាងយ៉ាងដូច្នេះថា៖«ខ្ញុំថាយកលុយមិនកើតទេ ដោយសារស្ពានជ្រោយចង្វារឆ្លងអត់យកលុយ បើយើងដាក់ស្រឡាងយកលុយគាត់ គឺវាខុសហើយ ដូច្នេះយើងខ្ញុំថាអត់យកលុយទេ»។
បើតាមការអះអាងរបស់អ្នកនាំពាក្យក្រសួងសាធារណការ និងដឹកជញ្ជូន និងអ្នកនាំពាក្យសាលារាជធានីភ្នំពេញ កាលពីពេលកន្លងមក ម្ចាស់ជំនួយជប៉ុន នឹងត្រូវចំណាយថវិកាសម្រាប់ការជួសជុលស្ពានជ្រោយចង្វារចាស់នេះ ប៉ុន្តែមន្ត្រីទាំងនេះមិនអាចបញ្ជាក់បានពីទំហំទឹកប្រាក់ក្នុងការជួសជុលនេះទេ៕
Tag:
ស៊ុន ចាន់ថុល
ស្ពានជ្រោយចង្វារ
© រក្សាសិទ្ធិដោយ thmeythmey.com