ជាតិ
សុវត្តិភាព ចរាចរណ៍
អ្នកបើកបរយានយន្តគ្មានស្លាកលេខត្រូវជាប់ពន្ធនាគារពី ៦ថ្ងៃ ដល់១ខែ និងពិន័យថវិកាពី ៤សែន ដល់១លានរៀល
× ភ្នំពេញ៖ មាត្រា ៨២ថ្មី នៃច្បាប់ស្តីពី ចរាចរណ៍ផ្លូវគោក បានចែងថា ជនណាប្រើប្រាស់យានយន្តគ្មានបណ្ណសម្គាល់ ឬគ្មានស្លាកលេខសម្គាល់យានយន្ត ត្រូវរងពិន័យអន្តរការណ៍ តាមការ កំណត់ក្នុងអនុក្រឹត្យ។
មាត្រា ៨២ថ្មី ដែលរដ្ឋសភាទើបអនុម័តវិសោធនកម្ម នៅថ្ងៃទី២៦ ខែធ្នូនេះ បានបន្តចែងថា អំពើល្មើសខាងលើ ត្រូវផ្តន្ទាទោសដាក់ពន្ធនាគារពី ៦ (ប្រាំមួយ)ថ្ងៃ ទៅ ១ (មួយ)ខែ និងពិន័យជាប្រាក់ពី ៤០០ ០០០ (បួនសែន)រៀល ដល់ ១ ០០០ ០០០ (មួយលាន)រៀល ក្នុងករណីជនល្មើសធ្លាប់ទទួលរងនូវការពិន័យអន្តរការណ៍ម្តងរួចហើយ តែគេនៅបន្តប្រព្រឹត្តល្មើសទៀត អំឡុងពេល ៦ (ប្រាំមួយ) ខែ គិតចាប់ពីការពិន័យអន្តរការណ៍លើកមុន។
ប៉ុន្តែ មាត្រាដដែល បានចែងបញ្ជាក់ថា បទប្បញ្ញត្តិកថាខណ្ឌខាងលើ មិនត្រូវអនុវត្តចំពោះអ្នកបើកបរទោចក្រយានយន្ត ទោចក្រយានយន្តសណ្តោងរ៉ឺម៉ក ឬត្រីចក្រយានយន្តឡើយ។
រដ្ឋសភាបានអនុម័តសេចក្តីសេចក្តីព្រាងច្បាប់ ស្តីពី វិសោធនកម្មមាត្រាចំនួន ៩ នៃច្បាប់ស្តីពី ចរាចរណ៍ផ្លូវគោក លើសំឡេង ៩៣/១០០សំឡេង ក្នុងសម័យប្រជុំសភា នៅថ្ងៃទី២៦ ធ្នូនេះ នាវិមានរដ្ឋសភា។
រដ្ឋាភិបាលបានធ្វើសេចក្តីព្រាងច្បាប់វិសោធនកម្មទាំង ៩មាត្រានៃច្បាប់ស្តីពី ចរាចរណ៍ផ្លូវគោក ក្រោយមានការប្រទាំងប្រទើសមួយចំនួន ពេលសមត្ថកិច្ចចុះអនុវត្តច្បាប់ចរាចរណ៍ផ្លូវគោកថ្មី ចាប់តាំងពីថ្ងៃទី១ ខែមករា ឆ្នាំ២០១៦រហូតមក។
ច្បាប់ស្តីពី ចរាចរណ៍ផ្លូវគោកថ្មី ត្រូវបានប្រកាសដោយព្រះរាជក្រម កាលថ្ងៃទី៩ ខែមករា ឆ្នាំ២០១៥ ៕
© រក្សាសិទ្ធិដោយ thmeythmey.com