អន្តរជាតិ
នយោបាយអន្តរជាតិ
×![]()
ដោយ: ថ្មីៗ
ជ័យជម្នះរបស់លោក ដូណាល់ ត្រាំ ជារឿងគួរឲ្យភ្ងាក់ផ្អើលបំផុតសម្រាប់ពិភពលោក និងជាក្តីបារម្ភដ៏ធំរបស់អ្នកប្រជាធិបតេយ្យក្នុងឆ្នាំ ២០១៦នេះ។ «ធ្វើឲ្យអាមេរិកអស្ចារ្យម្តងទៀត» ជាពាក្យស្លោកដែលលោក ដូណាល់ ត្រាំ តែងតែលើកឡើងក្នុងការឃោសនាបោះឆ្នោត។ ក្រោយពេលលោកជាប់ឆ្នោតក្លាយជាប្រធានាធិបតី គោលនយោបាយសំខាន់ៗមួយចំនួនដែលលោកតែងលើកឡើងនឹងត្រូវអនុវត្ត ក្រោយពេលស្បថចូលកាន់តំណែង។ 
ការជាប់ឆ្នោតជាប្រធានាធិបតីអាមេរិកទី ៤៥ របស់អ្នកជំនួញប្រែក្លាយជាអ្នកនយោបាយ ដូណាល់ ត្រាំ ជាព័ត៌មានគួរឲ្យភ្ងាក់ផ្អើលបំផុតសម្រាប់ពិភពលោកក្នុងឆ្នាំ ២០១៦នេះ។ គ្មានអ្នកណាម្នាក់ធ្លាប់រំពឹងថារឿងបែបនេះកើឡើងទេ ប៉ុន្តែអ្វីៗផ្លាស់ប្តូរ ហើយរឿងមិនគួរកើតបែរជាកើតរួចទៅហើយដែរ។
គេរំពឹងថា គោលនយោយជាច្រើនដែលលោកនឹងត្រូវអនុវត្ត ក្រោយពេលលោកស្បថចូលកាន់តំណែងនៅចុងខែមករានោះ។
រឿងដំបូងគេគឺ បណ្តេញរាល់ជនអន្តោប្រវេសន៍ដែលគ្មានឯកសារត្រឹមត្រូវចេញពីសហរដ្ឋអាមេរិក។ លោក ដូណាល់ ត្រាំ សន្យាថា នឹងបណ្តេញរាល់ជនអន្តោប្រវេសន៍ដែលខុសច្បាប់និងមិនមានឯកសារត្រឹមត្រូវ។ ប៉ុន្តែអ្នកវិភាគបានព្រមានជាមុន ថាគោលនយោបាយ និងចំណាត់ការ លោកដូណាល់ ត្រាំ នឹងបង្កគ្រោះថ្នាក់ដល់សេដ្ឋកិច្ចអាមេរិក ព្រោះទីផ្សារអាមេរិកនឹងបាត់បង់កម្លាំងពលកម្មច្រើនពេក។
លោក ដូណាល់ ត្រាំ ក៏នឹងហាមឃាត់រាល់បណ្តាប្រជាជនម៉ូស្លីមមិនឲ្យចូលមកសហរដ្ឋអាមេរិកដែរ ក្រោមហេតុផលសន្តិសុខ។ វាជារឿងចម្រូងចម្រាសបំផុតមួយ ព្រោះវានឹងប៉ះពាល់ខ្លាំងដល់សេរីភាពសាសនា និងជាការរើសអើងមួយដ៏ធ្ងន់ធ្ងរ។
រឿងមួយដែលសំខាន់នោះលោក នឹងចាប់ផ្តើមគម្រោងសង់ជញ្ជាំងហ៊ុមព័ទ្ធអាមេរិក និងការពារជនអន្តោប្រវេសន៍ខុសច្បាប់ផងដែរនៅព្រំដែនភាគខាងត្បូងប្រទេសដែលជាប់ប្រទេសម៉ិកស៊ិក។ ប៉ុន្តែវាមិនអាចកើតឡើងភ្លាមៗឡើយ ព្រោះវាជារឿងចម្រូងចម្រាសខ្លាំង ហើយគេមិនដឹងថា ម៉ិកស៊ិកនឹងព្រមបង់លុយសម្រាប់ការសាងសង់ឬអត់ឡើយ។
បញ្ហាសុខាភិបាល លោក ដូណាល់ ត្រាំ នឹងលុបចោលឲ្យអស់មរតកនយោបាយលោក បារ៉ាក់ អូបាម៉ា ក្នុងវិស័យនេះ។ បទបញ្ញត្តិគ្រប់គ្រងសុខាភិបាល« Obamacare» នឹងត្រូវជំនួសវិញដោយគោលនយោបាយថ្មីរបស់លោក ដូណាល់ ត្រាំ ដែលគេស្គាល់ថា «Health Savings Accounts»។
ចំណែករឿងទំនាក់ទំនងពាណិជ្ជកម្មជាមួយពិភពខាងក្រៅ លោក ដូណាល់ ត្រាំ នឹងអនុវត្តគោលនយោបាយសេដ្ឋកិច្ចមានលក្ខណៈការពារនិយមនិងជាតិនិយមខ្លាំង។ លោក ដូណាល់ ត្រាំ ធ្លាប់លើកឡើងជាច្រើនដងថា បើសិនជាលោកជាប់ឆ្នោត លោកនឹងចរចាឡើងវិញ ឬអាចទាត់ចោលកិច្ចព្រមព្រៀងពាណិជ្ជកម្មធំៗមួយចំនួនផង។
កិច្ចព្រមព្រៀងដែលលោកនឹងចរចាឡើងវិញមុនគេគឺកិច្ចព្រមព្រៀងពាណិជ្ជកម្មសេរី អាមេរិកខាងជើង (North American Free Trade agreement) ។ ហើយបន្តមកលោកនឹងអាចទាត់ចោល ឬចរចាឡើងវិញកិច្ចព្រមព្រៀងភាពជាដៃគូអន្តរប៉ាស៊ីហ្វិក (TPP) ផងដែរ។ ហើយលោកក៏នឹងព្យាយាមកាត់បន្ថយទំនាក់ទំនងពាណិជ្ជកម្មជាមួយប្រទេសខាងក្រៅ រួមទាំងដំឡើងពន្ធឲ្យខ្ពស់សម្រាប់ផលិតនាំចូលថែមទៀតផង។ ដូច្នេះវាជាបញ្ហាសម្រាប់សេដ្ឋកិច្ចពិភពលោក។
បន្ថែមពីនោះ គោលនយោបាយការបរទេសរបស់លោកវិញ គឺបន្ថយការចំណាយនិងការពារក្រុមប្រទេសណាតូ និងសម្ព័ន្ធមិត្តផ្សេងទៀត។ លោកធ្លាប់អះអាងថា ក្រុមប្រទេសសមាជិកណាតូ ត្រូវបង់វិភាគទានឲ្យគ្រប់គ្រាន់តាមការកំណត់នៅក្នុងសន្ធិសញ្ញា បើសិនជាចង់ឲ្យអាមេរិកការពារពេលមានបញ្ហាសន្តិសុខ។ ហើយលោកក៏ប្រហែលជាផ្តល់សិទ្ធិឲ្យប្រទេសកូរ៉េខាងត្បូង និងជប៉ុនមានអាវុធនុយក្លេអ៊ែរ ទុកប្រើប្រាស់ការពារខ្លួនផងដែរ។
មួយវិញទៀត លោកនឹងចាប់ផ្តើមជួបជាមួយប្រធានាធិបតីរុស្ស៊ី ដោះស្រាយបញ្ហាទំនាក់ទំនងទ្វេភាគីដែលធ្លាក់ចុះ។ លោកលើកឡើងជាច្រើនដងថា លោកពិតជាអាចធ្វើការជាមួយលោក វ្ល៉ាឌីមៀ ពូទីន បាន។ ដូច្នេះ វាជារឿងដែលអាចទៅរួចដែលប្រទេសទាំងពីរនឹងចាប់ដៃគ្នាដោះស្រាយបញ្ហាប្រឈមពិភពលោករួមគ្នាដែរ។
រឿងសំខាន់មួយទៀត គឺបរិស្ថាន និងថាមពល។ ផ្ទុយស្រឡះពីក្រុមអ្នកប្រជាធិបតេយ្យ លោក ដូណាល់ ត្រាំ មិនដែរជឿជាក់ថាបញ្ហាប្រែប្រួលអាកាសធាតុកើតមានឡើងឡើយ។ ជាការពិតដែលលោកនឹងចាប់ផ្តើមកាត់កញ្ចប់លុយរាប់ពាន់លានដុល្លារ ដែលរដ្ឋាភិបាលលោក បារ៉ាក់ អូបាម៉ា ចំណាយលើកម្មវិធីរដ្ឋប្រែប្រួលអាកាសធាតុកន្លងមកនោះ។
ជាយ៉ាងដូច្នេះក្តី កន្លងមកលោកបានព្យាយាមក្រឡាស់សម្តីបន្តិចម្តងៗ មុនពេលពិធីស្បថចូលកាន់តំណែងមកដល់។ គេមិនគួររំពឹងថា អ្វីដែលលោកដូណាល់ ត្រាំ បានសន្យាកន្លងមកនឹងត្រូវអនុវត្ត ឬក្លាយជាការពិតទាំងអស់ឡើយ។ អ្វីៗនឹងផ្លាស់ប្តូរ ហើយលោកក៏មិនអាចធ្វើគ្រប់យ៉ាងបានតាមចិត្តក្នុងនាមជាប្រធានាធិបតីនោះដែរ៕
Tag:
ដូណាល់ ត្រាំ
© រក្សាសិទ្ធិដោយ thmeythmey.com
