ជាកាដូឆ្លងឆ្នាំ អូបាម៉ា ដាក់ទណ្ឌកម្មរុស្ស៊ីបន្ថែមដោយបណ្តេញមន្ត្រីទូតរុស្ស៊ីពីអាមេរិក

អន្តរជាតិ

នយោបាយអន្តរជាតិ

ជាកាដូឆ្លងឆ្នាំ អូបាម៉ា ដាក់ទណ្ឌកម្មរុស្ស៊ីបន្ថែមដោយបណ្តេញមន្ត្រីទូតរុស្ស៊ីពីអាមេរិក

30, Dec 2016 , 1:50 pm

រូបភាព

ដោយ: ថ្មីៗ

ទំនងជាផ្តល់កាដូឆ្លងឆ្នាំដល់រុស្ស៊ី រដ្ឋបាលលោក បារ៉ាក់ អូបាម៉ា បានប្រកាសដាក់ទណ្ឌកម្មបន្ថែមប្រឆាំងរុស្ស៊ីក្នុងនោះមានទាំងបណ្តេញមន្ត្រីទូតរុស្ស៊ីជាង៣០នាក់ចេញពីអាមេរិកនិងបិទមិនឲ្យដំណើរការទីតាំងដែលកម្មសិទ្ធិរុស្ស៊ីពីរកន្លែងថែមទៀតផង។ អាមេរិកអះអាងថាវាជាវិធានការសងសឹករុស្ស៊ីដែលបានលូកលាន់ចូលក្នុងការបោះឆ្នោតអាមេរិកកន្លងមក។

តាមការសន្យា រដ្ឋបាលលោក បារ៉ាក់ អូបាម៉ា បានសម្រេចប្រកាសផ្តល់កាដូឆ្លងឆ្នាំ ដល់រុស្ស៊ីដោយការដាក់ទណ្ឌកម្មដើម្បីឆ្លើយតបការជ្រៀតជ្រែកចូលក្នុងដំណើរការនៃការបោះឆ្នោតអាមេរិក។ វាជាកាដូធំបំផុតមួយដែលអាមេរិកមិនដែលធ្លាប់ផ្តល់ឲ្យប្រទេសណាផ្សេងឡើយ។

យោងតាមសារព័ត៌មាន Washington Post មន្ត្រីក្រសួងការបរទេសអាមេរិក បានប្រកាសនៅថ្ងៃព្រហស្បតិ៍ទី ២៩ ខែធ្នូថាដើម្បីឆ្លើយតបការលូកលាន់ក្នុងការបោះឆ្នោត អាមេរិកសម្រេចបណ្តេញមន្ត្រីរុស្ស៊ី ៣៥ នាក់ ដែលកំពុងបំពេញការងារនៅអាមេរិក ហើយអាមេរិកក៏ដាក់ទណ្ឌកម្មលើភ្នាក់ងារចារកម្មធំៗរបស់រុស្សីចំនួន២កន្លែងដែរ។ មន្ត្រីដែលត្រូវរុស្ស៊ីបណ្តេញចេញ មានរយៈពេល ៣ថ្ងៃដើម្បីរៀបចំខ្លួនចាកចេញពីអាមេរិក។

«ថ្ងៃនេះ ក្រសួងការបរទេសសម្រេចប្រកាសដាក់មន្ត្រីរដ្ឋាភិបាលរុស្ស៊ីដែលបំពេញការងារក្នុងស្ថានទូតរុស្ស៊ីនៅក្រុងវ៉ាស៊ីនតោន និងនៅស្ថានកុងស៊ុលនាក្រុង San Francisco ថាជាជនមិនគួរទទួលស្វាគមន៍។ ពួកគេបានធ្វើសកម្មភាពមិនសមស្របតាមឋានៈរបស់ខ្លួនជាអ្នកការទូត។ អ្នកទាំងអស់នេះនិងក្រុមគ្រួសារមានពេលវេលា ៧២ម៉ោង ដើម្បីរៀបចំខ្លួនចាកចេញពីអាមេរិក»។

យ៉ាងណាក៏ដោយចុះ ក្រសួងការបរទេសមិនបានបញ្ជាក់ចំៗថាមន្ត្រីដែលត្រូវបណ្តេញចេញពាក់ព័ន្ធការវាយប្រហារតាមប្រព័ន្ធអ៊ីនធឺណេត និងលួចចូលលួចទិន្នន័យក្នុងកុំព្យូទ័រគណកម្មការជាតិគណបក្សប្រជាធិបតេយ្យឡើយ។ តែគេអះអាងថា វាជាការឆ្លើយតបចំពោះសកម្មភាពមិនសមរម្យដែលរុស្ស៊ីធ្វើដាក់មន្ត្រីទូតអាមេរិកដែលកំពុងបំពេញការងារនៅរុស្ស៊ីប៉ុណ្ណោះ។

បន្ថែលើការបណ្តញមន្ត្រីរុស្ស៊ី ក្រសួងការបរទេសអាមេរិកបានប្រកាសបិទទីតាំងដែលជាអចលនទ្រព្យរបស់រុស្ស៊ីចំនួន ២កន្លែង ដោយក្នុងនោះមានមួយកន្លែងនៅ Maryland និងមួយកន្លែងទៀតនៅ Glen Cove នៅ ញូវយ៉ក។អាមេរិកចោទប្រកាន់ថា ទីតាំងទាំងពីរនេះត្រូវបានប្រើប្រាស់សម្រាប់ធ្វើចារកម្ម ប៉ុន្តែមន្ត្រីក្រសួងការបរទេសអាមេរិកបដិសេធឆ្លើយថា វាត្រូវបានរុស្ស៊ីប្រើប្រាស់សម្រាប់វាយប្រហារប្រព័ន្ធអ៊ីនធឺណែតក្នុងពេលបោះឆ្នោតកន្លងមកឬអត់ឡើយ។

ដោយឡែក ប្រធានាធិបតីទើបជាប់ឆ្នោតលោក ដូណាល់ ត្រាំ ដូចមិនពេញចិត្តសោះចំពោះការដាកទណ្ឌកម្មប្រឆាំងរុស្ស៊ីបន្ថែមដោយចោទថារុស្ស៊ីលូកលាន់ក្នុងការបោះឆ្នោតអាមេរិកនោះ។

កាលពីថ្ងៃព្រហស្បតិ៍ទី ២៩ធ្នូ ម្សិលមិញនៅរដ្ឋFlorida ពេលអ្នកសារព័ត៌មានបានឆ្លៀតសួរលោក ថា «តើអាមេរិកគួរដាក់ទណ្ឌកម្មរុស្ស៊ីពាក់ព័ន្ធការលួចចូលប្រព័ន្ធបោះឆ្នោតអាមេរិកដែរឬអត់?» លោក ដូណាល់ ត្រាំ បានឆ្លើយតបយ៉ាងច្បាស់ថា អាមេរិកគួរដើរទៅមុខហើយអាមេរិកមិនគួរផ្តោតលើបញ្ហាអតីតកាលទៀតទេ។

ប្រធានាធិបតីរូបនេះ ចង់មានន័យថា អាមេរិកមិនគួរប្រកាន់ទោសអូសដំណើរ ដោយបន្តរករឿងរុស្ស៊ីហើយចោទប្រកាន់មហាអំណាចមួយនេះថាបានជ្រៀតជ្រែកក្នុងកិច្ចការផ្ទៃក្នុងខ្លួនឡើយ ហើយការដាក់ទណ្ឌកម្មជារឿងចាស់គំរឹលមួយ។ បន្ថែមពីការប្រឆាំងការទណ្ឌកម្ម លោក ដូណាល់ ត្រាំ នៅតែមិនជឿជាក់ថា រុស្ស៊ីនៅពីក្រោយសកម្មភាពលូកលាន់ក្នុងប្រព័ន្ធបោះឆ្នោតអាមេរិកហើយជួយឲ្យលោកជាប់ឆ្នោតនោះទេ។ លោកពន្យល់ថា នៅក្នុងសម័យបច្ចេកវិទ្យាទំនើបដូចបច្ចុប្បន្ន គ្រប់យ៉ាងវាមានភាពស្មុគស្មាញដែលវាពិបាកសន្និដ្ឋានថា រុស្ស៊ីពិតជាលូកដៃចូលជ្រៀតជ្រែកក្នុងការបោះឆ្នោតពិតមែនឬអត់នោះ៕