ជាតិ
សេដ្ឋកិច្ច
ឆ្នាំ ២០១៦៖បោកអ៊ុតទំនើប បង្កើតសាខាកាន់តែច្រើន តែជួបបញ្ហាខ្វះអ្នកបច្ចេកទេស
×
លោក ហែម ហេម៉ា ប្រធានក្រុមហ៊ុនបោកអ៊ុតទំនើប សប្បាយចិត្តដែលក្រុមហ៊ុនរបស់លោកបានពង្រីកសាខាកាន់តែច្រើនបន្ថែមទៀតនៅក្នុងឆ្នាំ ២០១៦ ។ ក៏ប៉ុន្តែលោកប្រធានក្រុមហ៊ុនរូបនេះ ក៏និយាយពីបញ្ហាប្រឈមក្រុមហ៊ុនរបស់លោកសំខាន់ដែរ គឺកង្វះខាតអ្នកជំនាញបច្ចេកទេសនៅក្នុងវិស័យបោកអ៊ុតនេះ។
ក្រុមហ៊ុនបោកអ៊ុតទំនើបរបស់ លោក ហែម ហេម៉ា ក៏កំពុងស្វែករកឱកាសពង្រីកខ្លួននៅឆ្នាំថ្មីនេះ។ ក្រុមហ៊ុនរបស់លោក ហេម៉ា ដែលមានផ្ដល់សេវាកម្មបោកអ៊ុតយីហោបោកអ៊ុតទំនើប និងយីហោមួយទៀតគឺ យក្សាបោកអ៊ុត នៅឆ្នាំ២០១៦ បានពង្រីកសាខាសរុបចំនួន ៤០០ ដោយមានសាខាចំនួនពីរ នៅប្រទេសថៃ និងវៀតណាម និងបង្កើតការងារក្នុងស្រុកប្រមាណ ២០០០នាក់។ លោក ហែម ហេម៉ា ឲ្យដឹងថា ទន្ទឹមនឹងជោគជ័យទាំងនេះ អាជីវកម្មរបស់លោកជួបបញ្ហាខ្វះអ្នកបច្ចេកទេសក្នុងសិប្បកម្មផលិតសាប៊ូបោកអ៊ុតទំនើបជាច្រើននាក់ និងខ្វះដើមទុន។
លោក ហេម៉ា ឲ្យដឹងថា សម្រាប់ឆ្នាំ២០១៧ ក្រុមហ៊ុនដែលមានលក្ខណៈគ្រួសារមួយនេះ នឹងបណ្ដុះបណ្ដាលអ្នកជំនាញស្រាវជ្រាវ និងបម្រើការក្នុងសិប្បផលិតសាប៊ូរបស់លោកបន្ថែម ដែលសិប្បកម្មលោកត្រូវការធនធានមនុស្សលើផ្នែកនេះដល់ចំនួន៣០នាក់។ លោកអះអាងថា តម្រូវការអ្នកជំនាញផ្នែកផលិតសាប៊ូ និងទឹកក្រអូប គឺជាភាពចាំបាច់មួយរបស់ក្រុមហ៊ុន ដើម្បីផ្ដល់សេវាកម្មបោកអ៊ុតកាន់តែល្អ។ លោកប្រាប់ទៀតថា ក្រុមហ៊ុនលោកនឹងពង្រីកសេវាកម្ម និងផលិតផលរបស់ខ្លួនជាបន្តបន្ទាប់ទៀតនៅឆ្នាំថ្នីនេះ ដោយលោកបញ្ជាក់ដូច្នេះថា៖«ដើមទុនយើងមានតែចាំពេលវេលា បានតិច យើងធ្វើតិច បានបន្តិចទៀត យើងធ្វើទៀត»៕
Tag:
បោកអ៊ុតទំនើប
ហែម ហេម៉ា
© រក្សាសិទ្ធិដោយ thmeythmey.com