ជាតិ
សិល្បះ
លោក សុះ ម៉ាច៖ ល្មមដល់ពេលសិល្បករ ផលិតករបង្កើនស្នាដៃដើមនិងគុណភាពសិល្បៈខ្មែរហើយ លោក សុះ ម៉ាច (ទីពីរឆ្វេង) រួមទាំងសិល្បករ-ការិនីផ្សេងទៀត។ រូបថត ហ្វេសប៊ុក
×
ភ្នំពេញ៖ វិស័យសិល្បៈនៅកម្ពុជា មានការវិវត្តរីកចម្រើន ទាំងផ្នែកភាពយន្ត ចម្រៀងបុរាណ និងសម័យ ប៉ុន្តែ ផលិតករ អ្នកនិពន្ធ និងអ្នកដឹកនាំរឿង រួមទាំងអ្នកពាក់ព័ន្ធទាំងអស់ក្នុងវិស័យនេះ ត្រូវនាំគ្នាប្រឹងជំរុញការបង្កើតស្នាដៃដើមរបស់ខ្មែរឲ្យបានច្រើនថែមទៀត ជាជាងការលួចចម្លងពីបរទេស ដើម្បីលើកតំកើងកេរ្តិ៍ឈ្មោះរបស់ខ្លួនក្នុងចំណោមមហាជនក្នុងស្រុក។
ប្រធានសមាគមសិល្បករខ្មែរ លោក សុះ ម៉ាច បានធ្វើការអំពាវនាវបែបនេះពេលដែលគាត់ធ្វើការឆ្លុះបញ្ចាំងដំណើរវិវត្តន៍ក្នុងវិស័យសិល្បៈខ្មែរមួយឆ្នាំកន្លងមកនេះ និងបង្ហើបឲ្យដឹងអំពីគោលដៅដែលសមាគមរបស់លោកបានកំណត់សម្រាប់អនុវត្តន៍និងសម្រេចឲ្យបាននៅឆ្នាំ២០១៧ ខាងមុខ។
លោក សុះ ម៉ាច និយាយថា៖ «ល្មមដល់ពេលដែលយើងត្រូវធ្វើខ្លួនឯងហើយ ព្រោះកូនខ្មែរបច្ចុប្បន្នមានស្នាដៃ និង ពូកែច្រើនណាស់។ អ្នកផលិតរឿង គួរគិតពីគុណភាព ជៀសជាងគិតពីបរិមាណ»។
ជាការកត់សម្គាល់រួម លោក សុះ ម៉ាច និយាយថាវិស័យសិល្បៈនៅកម្ពុជាមានការកើនឡើង និងរីកដុះដាលជាងឆ្នាំ កន្លងទៅ ទាំងផ្នែក ភាពយន្ត ផ្នែកចម្រៀងបុរាណ និងសម័យ។ ផ្នែកភាពយន្ត ចម្រៀងបុរាណ និងសម័យក៏ហាក់ មានសន្ទុះងើបឡើងដែរ ហើយលោកបាននិយាយថានេះក៏ដោយសារមានការចូលរួមគាំទ្រពីសំណាក់ទស្សនិកជន គ្រប់រូប និងការជួយជ្រំជ្រែងពីក្រសួងវប្បធម៌ និងវិចិត្រសិល្បៈ ក្រសួងព័ត៌មាន និងក្រសួងអប់រំ យុវជន និងកីឡា ជាដើម។ ម្យ៉ាងវិញទៀត បច្ចុប្បន្ននេះ ទស្សនិកជនបានងាកមកស្រលាញ់វប្បធម៌ខ្មែរច្រើនជាងមុន ជាពិសេសរួមគ្នា អភិរក្សសិល្បៈបុរាណខ្មែរ ដូចជា ល្ខោនខោល និងចាប៉ីដងវែងជាដើម។ លោក បន្ដថា នៅតាមស្ថានីយ៍ទូរទស្សន៍ មួយចំនួន ក៏បានចាកផ្សាយពីសិល្បៈបុរាណខ្មែរ ដែលបង្ហាញការយល់ដឹងដល់កូនខ្មែរគ្រប់រូបផងដែរ។
ក្រៅពីភាពរីកចម្រើនច្រើន ទាំងផ្នែកបច្ចេកទេស និងគុណភាពល្អដែលជម្រុញឲ្យមានការប្រកួត ប្រជែងគ្នាយ៉ាង ខ្លាំងក្នុងចំណោមផលិតករ លោកសុះ ម៉ាច និយាយថា ប្រការគួឲ្យលើកទឹកចិត្តដល់ពួកគេមួយទៀតនោះគឺការផ្តល់ម៉ោងមាស (ចាប់ពីម៉ោង៧ ដល់៩ យប់) ពីសំណាក់ស្ថានីយ៍ភាពយន្តសម្រាប់បញ្ចាំងភាពយន្តខ្មែរ។ លោកសង្ឃឹមជឿជាក់ថា ៥ឆ្នាំខាងមុខ វិស័យភាពយន្ត និងចម្រៀងនៅកម្ពុជា មានការរីកចម្រើន ខ្លាំងថែមទៀត។
ក្រៅពីគោលដៅបង្កើនការពង្រឹងគុណភាពសិល្បៈ លោក សុះ ម៉ាច និយាយថាសមាគម ក្នុងឆ្នាំ២០១៧ ក៏នឹងប្រឹងផ្តោតការយកចិត្តទុកដាក់ជួយដល់សិល្បករចាស់ៗផងដែរ។
លោក សុះ ម៉ាច និយាយថា៖ « សមាគមសិល្បៈខ្មែរ មិនទុកពួកគាត់ចោលនោះទេ។ ពួកយើងតែងតែជួយ ផ្សព្វផ្សាយ និងរកសប្បុរសជនជួយដល់ពួកគាត់ ដែលមានវ័យចាស់ និងមានជំងឺជាដើម»។ លោកនិយាយថា សម្រាប់ឆ្នាំថ្មីខាងមុខនេះ សមាគម មានគម្រោងរៀបចំតន្ត្រីសប្បុរសធម៌ ជួយដល់សិល្បករចាស់ៗ ដែលជួបទុក លំបាកក្នុងជីវភាពរស់នៅ៕
Tag:
សិល្បៈ
សុះ ម៉ាច
សមាគមសិល្បករខ្មែរ
© រក្សាសិទ្ធិដោយ thmeythmey.com