ភ្នំពេញ៖ បើតាមការប្រមើមើលរបស់អ្នកជំនាញ សេដ្ឋកិច្ចកម្ពុជាទំនងជាមានភាពប្រសើរឡើងលើវិស័យមួយចំនួន ប៉ុន្តែនៅប្រឈមហានិភ័យលើផ្នែកខ្លះ ទន្ទឹមនឹងត្រូវរងឥទ្ធិពលពីកត្តាខាងក្រៅ។ ហានិភ័យក្នុងវិស័យឥណទាន, ទីផ្សារកសិផល, រដូវកាលបោះឆ្នោត, និងស្ថានភាពហិរញ្ញវត្ថុអន្តរជាតិ រួមទាំងបរិយាកាសសេដ្ឋកិច្ច និងនយោបាយអន្តរជាតិ ត្រូវបានអ្នកជំនាញ និងស្ថាប័នសេដ្ឋកិច្ចមើលឃើញថានឹងមានឥទ្ធិពលដល់សេដ្ឋកិច្ចកម្ពុជានៅក្នុងឆ្នាំ២០១៧ ។
លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយ (CPS) បានលើកឡើងថា វិស័យកាត់ដេរសំលៀកបំពាក់ វិស័យសំណង់ និងសេវាកម្មមួយចំនួននៅឆ្នាំ២០១៧ នឹងបន្តរីកចម្រើនដូចឆ្នាំ២០១៦។ ប៉ុន្តែសេវាកម្មទេសចរណ៍ទំនងជាមិនកើនឡើងច្រើនទេ។
ចំពោះវិស័យកសិកម្ម លោក ច័ន្ទ សុផល បានថ្លែងប្រាប់សារព័ត៌ថ្មីៗតាមសារអេឡិចត្រូនិកថា បរិមាណផលិតផលកសិកម្មអាចនឹងកើនឡើង ប៉ុន្តែកសិករនៅជួបបញ្ហាតម្លៃកសិផលសំខាន់មួយចំនួនអាចបន្តធ្លាក់ចុះ។ លោកថ្លែងយ៉ាងដូច្នេះថា៖«ផលិតផលកសិកម្មទំនងជាកើន ប៉ុន្តែថ្លៃស្រូវ ដំឡូង និងម្រេច អាចធ្លាក់ចុះជាងឆ្នាំ២០១៦ ដែលប៉ះពាល់ដល់ប្រាក់ចំណូលរបស់ប្រជាកសិករ។ ជាកុសលល្អ ថ្លៃកៅស៊ូកំពុងរើបឡើងវិញបណ្ដើរៗ»។
អ្នកវិភាគសេដ្ឋកិច្ចរូបនេះ បានសង្កត់ធ្ងន់ចំពោះវិស័យឥណទាន និងវិស័យអចលនទ្រព្យ ដោយលោកបញ្ជាក់យ៉ាងដូចនេះថា៖«ហានិភ័យនៅតែមានកម្រិតគួរឱ្យកត់សម្គាល់ចំពោះវិស័យឥណទាន និងវិស័យអចលនទ្រព្យ»។
បើតាមរបាយការណ៍របស់ធនាគារជាតិកម្ពុជា (NBC) ដែលចេញផ្សាយក្នុងពេលថ្មីៗនេះ កំណើនឥណទានបាន និងកំពុងថមថយ ទន្ទឹមនឹងមានការព្រមានពីស្ថានប័នធំៗ ដូចជា ADB, IMF ចំពោះកំណើនខ្ពស់ក្នុងវិស័យនេះ។ របាយការណ៍ដដែលបង្ហាញថា ឥណទានឆ្នាំ២០០៧មានកំណើន ៧៥% មកនៅត្រឹម៣១%ឆ្នាំ២០១៤ និង២៣%ឆ្នាំ២០១៦។ NBC ព្យាករថានៅឆ្នាំ២០១៧កំណើនឥណទាននឹងថយចុះមកនៅត្រឹម២១% ។
ចំពោះសាស្ត្រាចារ្យសេដ្ឋកិច្ច លោក តេង ដឺលុច បានចាត់ទុកការថមថយកំណើនឥណទាននេះថា នឹងបះពាល់ដល់កំណើនសេដ្ឋកិច្ច។ លោកលើកឡើងដូច្នេះថា៖«ក្នុងរយៈពេលប៉ុន្មានឆ្នាំកន្លងទៅ ពលរដ្ឋខ្ចីលុយយកទៅវិនិយោគតូច ធំ ដែលជំរុញកំណើនសេដ្ឋកិច្ច។ ប៉ុន្តែចាប់ពីឆ្នាំ២០១៧ ពលរដ្ឋភាគច្រើនចាប់ផ្ដើមកាត់បន្ថយការចំណាយ ដើម្បីសងបំណុល ដែលនឹងធ្វើឲ្យធ្លាក់ចុះនូវសេដ្ឋកិច្ច»។
ដោយសារឆ្នាំ២០១៧ កម្ពុជាត្រូវរៀបចំការបោះជ្រើសរើសក្រុមប្រឹក្សាឃុំសង្កាត់ និងនៅកៀកការបោះឆ្នោតថ្នាក់ជាតិឆ្នាំ២០១៨ អ្នកជំនាញសេដ្ឋកិច្ចថាបរិយាកាសនេះនឹងបង្កើតភាពស្ទាក់ស្ទើរសម្រាប់អ្នកវិនិយោគទាំងក្នុងស្រុក និងក្រៅប្រទេស ដែលជាកង្វល់មួយសម្រាប់សេដ្ឋកិច្ច។
ក្រៅពីបញ្ហាប្រឈមផ្ទៃក្នុង សេដ្ឋកិច្ចកម្ពុជាក៏ត្រូវរងសម្ពាធបរិយាកាសសេដ្ឋកិច្ច និងនយោបាយអន្តរជាតិផងដែរ។ លោក តេង ដឺលុច លើកឡើងថា៖«សេដ្ឋកិច្ចកម្ពុជាឆ្នាំ២០១៧ នៅរក្សាកំណើនខ្ពស់ តែអាចធ្លាក់ចុះបន្តិច ឬច្រើនជាងនេះ អាស្រ័យកត្តាខាងក្រៅ។ ការដោះដូរពាណិជ្ជកម្មលើពិភពលោកជាទូទៅកំពុងធ្លាក់ចុះ ដោយសារការប្រឈមនានា ដូចជា ការឡើងកាន់តំណែងរបស់ប្រធានាធិបតីថ្មីរបស់សហរដ្ឋអាមេរិក, គោលនយោបាយប្រព័ន្ធពាណិជ្ជកម្មរបស់អាមេរិក, ការឡើងកម្ដៅបញ្ហាសមុទ្រចិនខាងត្បូង និងការប្រែប្រួលភូមិសាស្ត្រនយោបាយ និងសេដ្ឋកិច្ចរបស់ប្រទេសដទៃទៀត ដែលនឹងមានឥទ្ធិពលដល់សេដ្ឋកិច្ចកម្ពុជា»។
បើតាមរបាយការណ៍ខាងលើរបស់ NBC សេដ្ឋកិច្ចកម្ពុជាត្រូវប្រឈមហានិភ័យពីនិន្នាការឡើងថ្លៃប្រាក់ដុល្លារអាមេរិក និងភាពរឹតដ្បិតស្ថានភាពហិរញ្ញវត្ថុអន្តរជាតិដែលអាចកាត់បន្ថយលំហូរមូលធនក្នុងតំបន់ និងអាចមានឥទ្ធិពលមកលើកម្ពុជា តាមរយៈការបន្ថយលំហូរវិនិយោគ និងដាក់សម្ពាធលើអត្រាការប្រាក់នៅកម្ពុជា៕