អន្តរជាតិ
នយោបាយអន្តរជាតិ
×![]()
ដោយ: ថ្មីៗ
ក្នុងឱកាសឆ្លងឆ្នាំ២០១៦ ចូលឆ្នាំ ២០១៧ លោកដូណាល់ ត្រាំ បានផ្ញើសារជូនប្រជាជនពិភពលោករួមទាំងសត្រូវនិងអ្នកដែលតាមផ្ចាញ់ផ្ចាលលោកផងតាំងពីលោកជាប់ឆ្នោត។ ជាលើកចុងក្រោយមុនចូលកាន់តំណែង លោកប្រហែលជាចង់ឌឺដងនិងវាយប្រហារបណ្តាអ្នកនយោបាយមួយចំនួនរួមទាំងប្រព័ន្ធផ្សព្វផ្សាយផងដែលប្រឹងធ្វើគ្រប់យ៉ាងដើម្បីទប់ស្កាត់កុំឲ្យលោកឈ្នះឆ្នោត។
«សួស្តីឆ្នាំថ្មីអ្នកទាំងអស់គ្នារួមទាំងសត្រូវដ៏ច្រើនរបស់ខ្ញុំ និងអ្នកដែលវាយប្រហារខ្ញុំ តែបានចាញ់គួរឲ្យអាម៉ាសហើយមិនដឹងថាត្រូវធ្វើម៉េចបន្តទៀត។ ស្រលាញ់អ្នកទាំងអស់គ្នា»។ នេះជាសំណេររបស់លោក ដូណាល់ ត្រាំដែលបង្ហោះតាមប្រព័ន្ធទំនាក់ទំនងសង្គម Twitter នៅថ្ងៃសៅរ៍មុនឆ្លងឆ្នាំ។
Happy New Year to all, including to my many enemies and those who have fought me and lost so badly they just don't know what to do. Love! — Donald J. Trump (@realDonaldTrump) December 31, 2016
គេដឹងច្បាស់ ប្រធានាធិបតីទើបជាប់ឆ្នោតលោក ដូណាល់ ត្រាំ ទំនងជាមិនចង់ឲ្យឆ្នាំចាស់កន្លងផុតទៅដោយមិនបានឌឺដងនិងវាយប្រហារសត្រូវរបស់លោកឡើយ។ សត្រូវជាច្រើនដែលលោកបានបញ្ជាក់ក្នុងសំណេរនេះគ្មានអ្នកណាក្រៅពីក្រុមអ្នកប្រជាធិបតេយ្យ ប្រព័ន្ធផ្សព្វផ្សាយ និងក្រុមអ្នកសាធារណរដ្ឋមួយចំនួនដែលមិនចង់ឲ្យលោកជាប់ឆ្នោតឡើយ។
លោក ដូណាល់ ត្រាំ កន្លងមកបានបង្ហាញការខកចិត្តផងនិងសោកស្តាយផង ដោយអះអះអាងថា ក្រុមអ្នកនយោបាយនៅអាមេរិកមិនផ្តល់តម្លៃលើជ័យជម្នះរបស់លោកឡើយ។
ចាប់តាំងពីលោកជាប់ឆ្នោតថ្ងៃ ៨វិច្ឆិកា លោក ដូណាល់ ត្រាំ ប្រឈមមុខការប្រឆាំងពីក្រុមអ្នកប្រជាធិបតេយ្យ ហើយខ្លះបានស្នើឲ្យមានការរាប់សន្លឹកឆ្នោតឡើងវិញ និងចោទថាការបោះឆ្នោតមិនត្រឹមត្រូវនិងមិនប្រក្រតីទៀត។ ចំណែករដ្ឋបាលលោក បារ៉ាក់ អូបាម៉ា ឯណោះវិញ ថែមទាំងចោទថា រុស្ស៊ីបានលូកលាន់ចូលក្នុងការបោះឆ្នោតអាមេរិកនិងជួយឲ្យលោកដូណាល់ ត្រាំឈ្នះឆ្នោតដែរ៕
© រក្សាសិទ្ធិដោយ thmeythmey.com
