អន្តរជាតិ
នយោបាយអន្តរជាតិ
ឆ្លងឆ្នាំនៅតួកគី៖យ៉ាងហោច ៣៥នាក់ស្លាប់ក្នុងការបាញ់ប្រហារមួយនៅមណ្ឌលកម្សាន្តរាត្រី
×![]()
ដោយ: ថ្មីៗ
មនុស្សយ៉ាងហោចណាស់ ៣៥ នាក់ស្លាប់និងជាច្រើននាក់ផ្សេងទៀតរងរបួសក្នុងករណីបាញ់ប្រហារមួយកើតឡើងនៅមជ្ឈមណ្ឌលកម្សាន្តរាត្រីមួយនៅក្រុងអ៊ីស្តង់ប៊ុលប្រទេសតួកគីក្នុងឱកាសឆ្នាំ ២០១៦ចូលឆ្នាំ ២០១៧។ អាជ្ញាធរមូលដ្ឋានចាត់ទុកករណីបាញ់ប្រហារនេះការវាយប្រហារភេរវកម្ម។
អភិបាលក្រុងអ៊ីស្តង់ប៊ុលលោក Vasip Sahin បានប្រាប់អ្នកសារព័ត៌មានថា វាមានការបាញ់ប្រហារមួយកើតឡើងនៅក្លិបកម្សាន្តមួយកន្លែងក្នុងទីក្រុងរបស់លោក។ មនុស្សយ៉ាងហោចណាស់ ៣៥នាក់ស្លាប់ ហើយក្នុងចំណោមអ្នកស្លាប់ទាំងនោះមានមន្ត្រីប៉ូលិសផង។ ហើយមនុស្សប្រហែលជា ៤០នាក់ផ្សេងទៀតរងរបួស។
យោងតាមទីភ្នាក់ងារព័ត៌មាន AFP លោក Sahin បានបញ្ជាក់ថា៖ «គួរឲ្យសោកស្តាយណាស់ មនុស្សយ៉ាងហោចណាស់ ៣៥នាក់បានស្លាប់ ហើយម្នាក់ក្នុងចំណោមអ្នកស្លាប់ជាមន្ត្រីប៉ូលិសផង»។នេះជាការបញ្ជាក់របស់អភិបាលក្រុង។
មនុស្សប្រហែលពី ៥០០ ទៅ ៦០០នាក់ស្ថិតនៅក្នុងក្លិបនៅពេលដែលមានការបាញ់ប្រហារនោះ។ អ្នកខ្លះបានហក់លោតចូលក្នុងទឹកដើម្បីគេចឲ្យផុតពីការបាញ់រះរបស់ខ្មាន់កាំភ្លើង ហើយក្រោយមកត្រូវប៉ូលិសជួយសង្គ្រោះទាន់ពេល។
ជាបឋម បើតាមការរាយការណ៍ពីសារព័ត៌មានក្នុងតំបន់ ករណីបាញ់ប្រហារនេះបង្កដោយខ្មាន់កាំភ្លើងពីរនាក់។ ប៉ុន្តែខាងអាជ្ញាធរអះអាងថា វាមានខ្មាន់កាំភ្លើងតែម្នាក់ប៉ុណ្ណោះ ហើយគេចាត់ទុកវាជាការវាយប្រហារភេរវកម្មផងដែរ។ ចំណែកខាង CNN តួកគី ផ្សាយថា ខ្មាន់កាំភ្លើងមានម្នាក់ ហើយជននោះបានស្លៀកពាក់ជា តា Santa claus ហើយដើរចូលទៅក្នុងក្លិបកម្សាន្ត។ បន្ទាប់មកគេចាប់ផ្តើមបាញ់រះលើមនុស្សម្នានៅក្នុងក្លិបតែម្តង។
តាមពិតទៅការវាយប្រហារនេះកើតឡើងមិនដល់មួយខែឡើយបន្ទាប់ពី ក្រុងអ៊ីស្តង់ប៊ុលនេះរងការវាយប្រហារដោយគ្រាប់បែកពីរដងផ្ទួនគ្នា។ ការវាយប្រហារដោយគ្រាប់បែកនេះកើតឡើងនៅក្រៅពហុកីឡាដ្ឋានរបស់ក្រុម Besiktas ដោយបណ្តាលឲ្យមនុស្ស ៤៤នាក់ស្លាប់ ។ ក្រោយការវាយប្រហារក្រុមឧទ្ទាមឃឺតបានចេញអះអាងថា ខ្លួនជាអ្នកបង្ក៕
© រក្សាសិទ្ធិដោយ thmeythmey.com
