អន្តរជាតិ
ពីឆ្នាំ២០១៧តទៅ ចិន ដំឡើងឧបករណ៍តាមដានបញ្ហាប្រឈមបរិស្ថានសមុទ្រនៅសមុទ្រចិនខាងត្បូង
× ចាប់ពីដើមឆ្នាំ២០១៧តទៅ ចិន នឹងដាក់ឧបករណ៍ព្យាករណ៍បរិស្ថានសមុទ្រនៅតំបន់ថ្មប៉ប្រះទឹកចំនួនបីនៃប្រជុំកោះ Spratly (ចិនហៅថា Nansha) នៃសមុទ្រចិនខាងត្បូង។ ការណ៍ដែលធ្វើបែបនេះដើម្បីជាការឆ្លើយតបទៅនឹងការកើនឡើងនៃបញ្ហាប្រឈមបរិស្ថាននៅក្នុងសមុទ្រចិនខាងត្បូង ទប់ស្កាត់មហន្តរាយដែនសមុទ្រ សុវត្ថិភាពនាវាចរណ៍ និងការស្រាវជ្រាវ។ នេះបើយោងតាមរដ្ឋបាលដែនសមុទ្រចិន (SOA)។
តាមរដ្ឋបាលដែនសមុទ្រចិន (SOA) ដែលដកស្រង់ដោយសារព័ត៌មានរដ្ឋចិន People’s Daily រដ្ឋាភិបាលក្រុងប៉េកាំង បានដំឡើងគម្រោងចំនួនប្រាំ ដែលរាប់បញ្ចូលទាំងមជ្ឈមណ្ឌលតាមដានដែនសមុទ្រ និងសំណង់ផ្សេងៗទៀតក្នុងគោលដៅស្រាវជ្រាវវិទ្យាសាស្ត្រក្នុងតំបន់ថ្មប៉ប្រះទឹក Yongshu, Zhubi និង Meiji នៃប្រជុំកោះSpratly នៃសមុទ្រចិនខាងត្បូង។
តាមប្រភពព័ត៌មានដដែលនោះ ចាប់ពីថ្ងៃទី០១ មករា តទៅ ប្រព័ន្ធតាមដានឧត្តុនិយម និងធារាសាស្ត្រ ក៏ដូចជាប្រព័ន្ធតាមដានបរិស្ថានដែនសមុទ្រ ត្រូវចាប់ផ្តើមដំណើរការតាមផែនការនៅក្នុងប្រជុំកោះនៃសមុទ្រចិនខាងត្បូងហើយ។ សម្រាប់ព័ត៌មានផ្សេងៗដែលទទួលបានតាមរយៈឧបករណ៍ទាំងនេះ នឹងត្រូវបញ្ជូនទៅកាន់ស្ថាប័នរដ្ឋាភិបាល និងក្រុមហ៊ុនពាក់ព័ន្ធដែនសមុទ្រចិនតាមរយៈ fax ឬសេវាផ្ញើសារខ្លីៗ។
សូមជម្រាបផងដែរ សមុទ្រចិនខាងត្បូង គឺជាសមុទ្រជម្លោះរវាងរដ្ឋអាស៊ានដែលរួមមានព្រុយណេ ម៉ាឡេស៊ី ហ្វីលីពីន និងវៀតណាម និងចិន។ ផ្នែកដែលជាតំបន់ចម្រូងចម្រាសខ្លាំងនៃសមុទ្រចិនខាងត្បូងនោះគឺ ប្រជុំកោះស្ព្រាតលី (Spratly) និង ប្រជុំកោះ ប៉ារ៉ាស្សែល (Paracel)។
ខណៈដែលជម្លោះនៃការបែងចែកផលប្រយោជន៍លើទឹកដីដ៏មានសក្តានុពលធនធានធម្មជាតិនោះមិនទាន់បញ្ចប់ មានរបាយការណ៍ជាច្រើន បានបង្ហាញថា ចិន បានបន្តសកម្មភាពវាទទីឥតឈប់ឈរនៅក្នុងតំបន់ជម្លោះ ដែលរួមមានទាំងការសាងសង់កោះសិប្បនិម្មិត និងសំណង់យោធានៅក្នុងតំបន់ដែលខ្លួនបានចូលទៅគ្រប់គ្រងផងដែរ។
កន្លងមកដោយសារ មានករណីនៃការល្បាតទាំងនាវាចម្បាំង និងយន្តហោះស៊ើបការណ៍របស់អាមេរិកនៅក្បែរតំបន់ចិនគ្រប់គ្រងនៅក្នុងសមុទ្រចិនខាងត្បូងនោះ ចិន ក៏បានដំឡើង ស្ថានីយបញ្ជា និងគ្រប់គ្រងនាវាចរណ៍នៅលើថ្មប៉ប្រះទឺក Zhubi នៅឆ្នាំ២០១៦ផងដែរ៕
Tag:
ចិន
សមុទ្រចិនខាងត្បូង
© រក្សាសិទ្ធិដោយ thmeythmey.com