កម្ពុជាមានកំណើនម៉ូតូចំនួន ៣០ម៉ឺនគ្រឿងក្នុងមួយឆ្នាំ

ជាតិ

សេដ្ឋកិច្ច

កម្ពុជាមានកំណើនម៉ូតូចំនួន ៣០ម៉ឺនគ្រឿងក្នុងមួយឆ្នាំ

02, Jan 2017 , 11:39 pm

រូបភាព

ដោយ:

ភ្នំពេញ៖ ចំនួនទោចក្រយានយន្ត (ម៉ូតូ) សរុបនៅកម្ពុជាមានប្រមាណ ៣លាននិង២សែនគ្រឿង ខណៈចំនួនរថយន្តមានជាង ៥០ម៉ឺនគ្រឿង នៅពេលបច្ចុប្បន្ននេះ។ នេះបើតាមការលើកឡើងរបស់ លោករដ្ឋមន្ត្រី ស៊ុន ចាន់ថុល នៅក្នុងសន្និបាតបូកសរុបការងាររបស់ឆ្នាំ២០១៦ និងទិសដៅការងារឆ្នាំ២០១៧ របស់ក្រសួងសាធារណការ និងដឹកជញ្ជូន នៅថ្ងៃទី២៨ខែធ្នូឆ្នាំ២០១៦ ។

លោក ស៊ុន ចាន់ថុល ឲ្យដឹងថា នៅពេលបច្ចុប្បន្នកម្ពុជាមានម៉ូតូចំនួនប្រមាណ ៣លាននិង២សែនគ្រឿង ហើយមានកំណើនម៉ូតូចំនួន ៣០ម៉ឺនគ្រឿងក្នុងមួយឆ្នាំៗ ។

ជាមួយគ្នានេះដែរ លោក ស៊ុន ចាន់ថុល បានលើកឡើងនៅក្នុងសន្និបាតខាងលើទៀតថា ក្រសួងសាធារណការនឹងចាប់ផ្ដើមអនុវត្តប្រព័ន្ធថ្មី ដែលអាចឲ្យអ្នកទិញធ្វើស្លាកលេខ និងបណ្ណសម្គាល់យានយន្តនៅហាងលក់ម៉ូតូ និងរថយន្ត ចាប់ពីខែមករាឆ្នាំ២០១៧ តទៅ។

ចំពោះកំណើនរថយន្តនៅកម្ពុជាវិញ អភិបាលរាជធានីភ្នំពេញ លោក ប៉ា សុជាតិវង្ស ត្រូវបានទីភ្នាក់ងារសារព័ត៌មានកម្ពុជា AKP ដកស្រង់សំដីកាលពីខែវិច្ឆិកាឆ្នាំ២០១៦ ថា កម្ពុជានាំចូលរថយន្តទាំងជជុះ និងថ្មីប្រមាណ ៥ម៉ឺនគ្រឿងក្នុងមួយឆ្នាំៗ ដែលក្នុងនោះមានតែជាង ១០ភាគរយប៉ុណ្ណោះជារថយន្តប្រភេទថ្មី៕