អន្តរជាតិ
នយោបាយអន្តរជាតិ
ត្រាំ ចំអកកូរ៉េខាងជើងថា គ្មានថ្ងៃអាចផលិតមីស៊ីលនុយក្លេអ៊ែរបាញ់ដល់អាមេរិកឡើយ
×
ប្រធានាធិបតីជាប់ឆ្នោតអាមេរិក ដូណាល់ ត្រាំ នៅថ្ងៃទី២ ខែមករា បានបង្ហោះសារឡកឡាយឲ្យមេដឹកនាំកូរ៉េខាងជើង គីម ជុងអ៊ុន ដែលអះអាងថា កូរ៉េខាងជើងឈានដល់ដំណាក់កាលចុងក្រោយនៃការអភិវឌ្ឍមីស៊ីលអន្តរទ្វីបហើយ។ មីស៊ីលអន្តរទ្វីបនេះ ត្រូវគេជឿថា មានសមត្ថភាពបាញ់ដល់ទឹកដីអាមេរិក តែលោក ដូណាល់ ត្រាំ ចំអកវិញថា រឿងនេះនឹងមិនអាចកើតឡើងនោះទេ។
ជាលើកដំបូងចាប់តាំងពីទទួលជ័យជម្នះជាប្រធានាធិបតីអាមេរិកមក លោក ដូណាល់ ត្រាំ បាននិយាយទៅដល់បញ្ហានុយក្លេអ៊ែររបស់កូរ៉េខាងជើង។ តាមរយៈគណនី Twitter របស់ខ្លួន លោក ត្រាំ បាននិយាយថា គ្មានថ្ងៃដែលកូរ៉េខាងជើងអាចអភិវឌ្ឍមីស៊ីលបាញ់ដល់ទឹកដីអាមេរិកឡើយ។ មិនត្រឹមតែនិយាយបង្អាប់កូរ៉េខាងជើងឡើយ លោកក៏រិះគន់ចិន ដែលមិនព្រមដាក់សម្ពាធលើរដ្ឋកុម្មុយនីស្តមួយនេះ ឲ្យបញ្ឈប់សកម្មភាពរបស់ខ្លួនទៀតផង។
ប្រធានាធិបតីជាប់ឆ្នោតរូបនេះ បានបញ្ជាក់តាម Twitter របស់លោកនៅថ្ងៃទី២ មករា ថា កូរ៉េខាងជើង ទើបតែប្រកាសថា ខ្លួននៅដំណាក់កាលចុងក្រោយនៃការអភិវឌ្ឍមីស៊ីលអាចបាញ់គោលដៅនៅអាមេរិក។ ប៉ុន្តែវានឹងមិនកើតឡើងទេ។
ការចម្អកឡកឡាយរបស់ប្រធានាធិបតីអាមេរិក ធ្វើឡើងបន្ទាប់ពីប្រមុខដឹកនាំកូរ៉េខាងជើង និយាយថា កូរ៉េខាងជើង នឹងសាកល្បងមីស៊ីលរយៈចម្ងាយឆ្ងាយនៅពេលខាងមុខ។ ក្នុងសារអបអរឆ្នាំថ្មី លោក គីម ជុងអ៊ុន អះអាងថា កូរ៉េខាងជើង បានមកដល់ដំណាក់កាលចុងក្រោយនៃការរៀបចំការធ្វើតេស្តមីស៊ីលបាលីស្ទិកអន្តរទ្វីប (ICBM) ដែលអាចបំពាក់គ្រាប់នុយក្លេអ៊ែរ និងមានសមត្ថភាពបាញ់ដល់អាមេរិកឯណោះ។
ការប្រកាសរបស់មេដឹកនាំកូរ៉េខាងជើង គឺជាព្រមានថ្មីមួយទៀតទៅលើសន្តិសុខ និងស្ថិរភាពតំបន់ ក៏ដូចជាពិភពលោក ហើយវាក៏ជាការវិវឌ្ឍមួយជំហានទៀតរបស់កូរ៉េខាងជើង ក្នុងការពង្រឹងកម្មវិធីនុយក្លេអ៊ែររបស់ខ្លួន។ ជាមួយនឹងការប្រកាសនេះ មានន័យថា ក្រុងព្យុងយ៉ាង នឹងមិនបោះបង់មហិច្ឆតានុយក្លេអ៊ែររបស់ខ្លួនឡើយ បើទោះជារងសម្ពាធខ្លាំងពីសហគមន៍អន្តរជាតិ តាមរយៈការដាក់ទណ្ឌកម្មក៏ដោយចុះ។
អ្វីដែលគួរឲ្យចាប់អារម្មណ៍នោះ ក្រោយពីនិយាយពីបញ្ហានុយក្លេអ៊ែរកូរ៉េខាងជើង លោក ដូណាល់ ត្រាំ ក៏ឆ្លៀតបង្ហោះសារមួយទៀត ដែលបានរិះគន់សម្ព័ន្ធមិត្តកូរ៉េខាងជើង គឺចិន។ លោកសរសេរថា ចិនបានបឺតជញ្ជក់ទឹកប្រាក់ជាញើសឈាមរបស់អាមេរិកជាច្រើន ប៉ុន្តែវានៅតែមិនអាចជួយកូរ៉េខាងជើងបានដដែល។ នេះជាលើកទីពីរ ដែលប្រធានាធិបតីជាប់ឆ្នោតអាមេរិករូបនេះ រិះគន់ចិនចំៗ លើរឿងនុយក្លេអ៊ែរកូរ៉េខាងជើង៕
Tag:
អាមេរិក
កូរ៉េខាងជើង
ដូណាល់ ត្រាំ
នុយក្លេអ៊ែរ
© រក្សាសិទ្ធិដោយ thmeythmey.com