ភ្នំពេញ៖ បុគ្គលិកក្រុមហ៊ុនឯកជន ស្ថាប័នរដ្ឋ និងអង្គការនានា ដែលមានប្រាក់បៀវត្សចាប់ពី ១លាន និង១រៀលឡើងទៅ ត្រូវជាប់ពន្ធលើប្រាក់បៀវត្ស ដែលត្រូវអនុវត្តចាប់ពីខែមករាឆ្នាំ២០១៧ នេះតទៅ។ នេះបើតាមសេចក្ដីណែនាំរបស់ក្រសួងសេដ្ឋកិច្ច និងហិរញ្ញវត្ថុ នៅថ្ងៃទី២៧ខែធ្នូឆ្នាំ២០១៦ ។
អ្នកទទួលប្រាក់បៀវត្សចាប់ពី ១លាននិង១រៀល ដល់ ១,៥លាន ត្រូវជាប់ពន្ធ ៥ភាគរយ ខណៈអ្នកមានបៀវត្សលើសពី ១,៥លានរៀល ដល់ ៨,៥លានរៀល ត្រូវបង់ពន្ធ ១០ភាគរយ។ ចំណែកប្រាក់បៀវត្សលើសពី ៨,៥លានរៀល ដល់ ១២,៥លានរៀល ត្រូវជាប់ពន្ធ ១៥ភាគរយ ហើយលើសពី ១២,៥លានរៀលត្រូវបង់ពន្ធ ២០ភាគរយ។
ប៉ុន្តែដើម្បីសម្រួលជីវភាពរស់នៅរបស់មន្ត្រីរាជការ គ្រូបង្រៀន គ្រូពេទ្យ និងកម្មករនិយោជិត ដែលមានបន្ទុកចិញ្ចឹមកូន ប្ដីឬប្រពន្ធ រដ្ឋាភិបាលបានសម្រេចដំឡើងកម្រិតកាត់បន្ថយមូលដ្ឋានគិតពន្ធលើប្រាក់បៀវត្ស ដោយកូនក្នុងបន្ទុក និងសហព័ន្ធជាមេផ្ទះ ក្នុងម្នាក់ៗ ១៥ម៉ឺនរៀល (ដែលពីមុន ៧,៥ម៉ឺនរៀល)។ ដូច្នេះបុគ្គលិករដ្ឋ និងឯកជន ដែលបានរៀបរាប់ខាងលើ ដែលមានប្រាប់បៀវត្សលើសពី ១លានរៀលមួយចំនួន នឹងត្រូវរួចផុតពីការបង់ពន្ធលើប្រាក់បៀវត្ស។
ជាមួយគ្នានេះដែរ បើតាមសេចក្ដីណែនាំខាងលើ គ្រប់សហគ្រាសដែលប្រកបអាជីវកម្ម ស្ថាប័នរដ្ឋ និងអង្គការនានា ដែលមានកាតព្វកិច្ចកាត់ទុកនិងបង់ពន្ធលើប្រាក់បៀវត្ស ត្រូវចាប់អនុវត្តការគិតពន្ធលើប្រាក់បៀវត្សថ្មីនេះ ចាប់ពីខែមករាឆ្នាំ២០១៧ តទៅ។ សហគ្រាសដែលបើកប្រាក់បៀវត្សជូននិយោជិតក្នុងខែមករាឆ្នាំនេះ ត្រូវដាក់លិខិតប្រកាសបង់ប្រាក់ពន្ធយ៉ាងយឺតបំផុតត្រឹមថ្ងៃទី២០ខែកុម្ភៈឆ្នាំនេះ។ នេះបើតាមសេចក្ដីណែនាំខាងលើ។
គួរបញ្ជាក់ថា ការកែប្រែពន្ធលើប្រាក់បៀវត្សនេះ គឺបន្ទាប់ពីការធ្វើវិសោធនកម្មច្បាប់ស្ដីពីសារពើពន្ធ។
យោងតាមមាត្រា៤២ថ្មីនៃច្បាប់ស្ដីពីសារពើពន្ធ ពាក្យ«បៀវត្ស» សំដៅដល់បៀវត្ស លាពការ ប្រាក់បំណាច់ បុព្វលាភ ប្រាក់ម៉ោងបន្ថែម ប្រាក់ប៉ះប៉ូវនានា និងអត្ថប្រយោជន៍បន្ថែម ដែលបានទូទាត់ឲ្យដល់និយោជិត ឬដែលបានទូទាត់ដើម្បីប្រយោជន៍ផ្ទាល់ ឬប្រយោលដល់និយោជិត ចំពោះការបំពេញសកម្មភាពបម្រើការងារ។
បើតាមសារាចររបស់ក្រសួងសេដ្ឋកិច្ចនិងហិរញ្ញវត្ថុ កាលពីខែតុលាឆ្នាំ២០១៦ ប្រាក់ឧបត្ថមមួយចំនួនរបស់កម្មករ និយោជិតនៃរោងចក្រ សហគ្រាស ត្រូវរួចផុតពីការយកពន្ធលើប្រាក់បៀវត្ស និងមិនមែនជាកម្មវត្ថុនៃពន្ធលើអត្ថប្រយោជន៍។ ប្រាក់ឧបត្ថមទាំងនោះ រួមមាន៖ សោហ៊ុយធ្វើដំណើរ និងថ្លៃស្នាក់នៅ, ប្រាក់ថ្លៃបាយ, មូលនិធិបេឡាសន្តិសុខសង្គម ឬមូលនិធិសុខមាលភាពសង្គម, ប្រាក់ធានារ៉ាប់រងសុខភាព ឬបុព្វលាភធានារ៉ាប់រងអាយុជីវិត ឬសុខភាព, ប្រាក់ឧត្ថមទារក ឬចំណាយទារកដ្ឋាន និងប្រាក់បំណាច់បញ្ចប់កិច្ចសន្យា ឬប្រាក់បំណាច់បញ្ឈប់លែងឲ្យធ្វើការ៕