ក្រុមហ៊ុនចិនគ្រោងបោះទុន ៣ពាន់លានដុល្លារសង់សណ្ឋាគារផ្កាយ ៦

ជាតិ

សេដ្ឋកិច្ច

ក្រុមហ៊ុនចិនគ្រោងបោះទុន ៣ពាន់លានដុល្លារសង់សណ្ឋាគារផ្កាយ ៦

05, Jan 2017 , 9:56 am

រូបភាព

សម្ដេច ហ៊ុន សែន និង លោក Zhang Li ប្រធានក្រុមហ៊ុន Guangzhou នាជំនួបកាលពីថ្ងៃទី៤ខែមករា

ដោយ:

ភ្នំពេញ៖ ក្រុមហ៊ុន Guangzhou R&F គឺជាក្រុមហ៊ុនអចលនទ្រព្យដ៏ធំមួយនៅប្រទេសចិន គ្រោងវិនិយោគរួមគ្នាជាមួយអ្នកឧកញ៉ា គិត ម៉េង អគ្គនាយកក្រុមហ៊ុន Royal Group លើទឹកប្រាក់ ៣ពាន់លានដុល្លារនៅក្នុងប្រទេសកម្ពុជា។ នេះបើតាមព័ត៌មានដែលបង្ហោះនៅលើទំព័រហ្វេសប៊ុករបស់ សម្ដេចនាយករដ្ឋមន្ត្រី ហ៊ុន សែន ។

គម្រោងវិនិយោគនេះ ត្រូវបានលើកឡើងនៅក្នុងជំនួបរវាងសម្ដេច ហ៊ុន សែន និង លោក Zhang Li ប្រធានក្រុមហ៊ុន Guangzhou R&F នៅថ្ងៃទី៤ខែមករា។ សម្ដេចបានសរសេរនៅលើហ្វេសប៊ុករបស់ខ្លួនថា ថ្មីៗនេះ លោក Zhang Li បានជួបលោក គិត ម៉េង រួចហើយ និងបានពិភាក្សាក្នុងការបោះទុនវិនិយោគនៅក្នុងប្រទេសកម្ពុជាប្រមាណ ៣ពាន់លានដុល្លារ។ សម្ដេចបញ្ជាក់ទៀតថា ជាជំហ៊ានដំបូង លោក Zhang Li មានចំណាប់អារម្មណ៍វិនិយោគសាងសង់សណ្ឋាគារលំដាប់ផ្កាយ ៦ នៅក្នុងទីក្រុងភ្នំពេញ និងក្រុងព្រះសីហនុ។

សម្ដេច ហ៊ុន សែន បានស្វាគមន៍ចំពោះការសហការគ្នារវាង លោក Zhang Li និងលោក គិត ម៉េង ដោយសម្ដេចថ្លែងបញ្ជាក់ថា ភាគីកម្ពុជាមានដី ហើយភាគីចិនមានថវិកាសម្រាប់វិនិយោគសាងសង់។ ប្រមុខរដ្ឋាភិបាលអះអាងទៀតថា ការវិនិយោគនេះ គឺទន្ទឹមគ្នានឹងកម្ពុជាកំពុងមានតម្រូវការសណ្ឋាគារលំដាប់កំពូលៗ ព្រោះថាភ្ញៀវទេសចរអន្តរជាតិមកកម្ពុជាមានកំណើនជារៀងរាល់ឆ្នាំ។ ហើយការបណ្ដាក់ទុននេះ គឺស្របនឹងគោលនយោបាយខ្សែក្រវ៉ាត់មួយ វិថីមួយ និងគោលនយោបាយវិថីសូត្រសមុទ្ររបស់ចិន៕