ជាតិ
សេដ្ឋកិច្ច
×![]()
កណ្តាល៖ គម្រោងលំនៅឋានសាធារណៈ តម្លៃសមរម្យរបស់ក្រុមហ៊ុន Worldbridge Land ដែលសហការជាមួយក្រសួងរៀបចំដែនដី នគរូបនីយកម្ម និងសំណង់ ត្រូវបានបើកការដ្ឋានសាងសង់ នៅថ្ងៃទី៧ខែមករា នៅស្រុកស្អាង ខេត្តកណ្ដាល។ ផ្ទះទាំងនេះនឹងត្រូវប្រកាសលក់ក្នុងពេលឆាប់ៗ ដោយភ្ជាប់នឹងលក្ខខណ្ឌមួយចំនួនចំពោះការទិញ។
នៅក្នុងជំហានដំបូង ក្រុមហ៊ុនចាប់ផ្ដើមសាងសង់ផ្ទះចំនួន ២២៩៧ ល្វែងលើផ្ទៃដី២៤ហិកតា ដែលស្ថិតនៅក្នុងភូមិទួលក្រសាំង ឃុំរកាខ្ពស់ ស្រុកស្អាង ខេត្តកណ្ដាល ចម្ងាយ ៨គីឡូម៉ែត្រពីក្រុងតាខ្មៅ នៃបណ្តោយផ្លូវជាតិ ២១ ។ ផ្ទះទាំងនេះមានពីរប្រភេទ ដែលប្រភេទទីមួយ មានទំហំដី ៤ ម៉ែត្រគុណ១០ម៉ែត្រ និងទំហំផ្ទះ ៤ ម៉ែត្រគុណ៧ម៉ែត្រ និងមាន២ជាន់ (ជាន់ផ្ទាល់ដី និងជាន់ទី១) ។ ប្រភេទទីពីរ មានទំហំដី ៦ម៉ែត្រគុណ១០ម៉ែត្រ និងមានទំហំផ្ទះ ៦ម៉ែត្រគុន៧ម៉ែត្រ និងមាន២ជាន់ដូចគ្នា។ ការសាងសង់លំនៅឋានទាំងនេះ នឹងត្រូវបញ្ចប់នៅចុងឆ្នាំ២០១៨ ។
លោក សៀ ឫទ្ធី អគ្គនាយក្រុមហ៊ុន Worldbridge Land ឲ្យដឹងថា ផ្ទះតម្លៃសមរម្យនឹងលក់ជូនមន្ត្រីរាជការ មន្ត្រីចូលនិវត្តន៍ និងជនពិការ ជាអាទិភាព។ លោកបញ្ជាក់ដូច្នេះថា៖«ជាអាទិភាពយើងលក់ឲ្យមន្ត្រីរាជការមុន ប៉ុន្តែទន្ទឹមនឹងនេះយើងមានចំណែកខ្លះលក់ឲ្យប្រជាពលរដ្ឋ។ ប៉ុន្តែត្រូវមានចំណូលទាបនឹងមធ្យម មានន័យថាក្រោម៥ រយដុល្លារ (ក្នុង១ខែ)។
ចំពោះលក្ខខណ្ឌទិញផ្ទះក្នុងគម្រោងនេះ គឺអ្នកទិញត្រូវមានគ្រួសារ ដែលយ៉ាងហោចក៏ត្រូវមានប្ដី ឬប្រពន្ធ។ ទិញផ្ទះបានរយៈពេល៥ឆ្នាំ ទើបអាចលក់ ឬជួលបាន។ នេះបើតាមលោក សៀ ឬទ្ធី ដែលបញ្ជាក់ទៀតថា ចំពោះប្រាក់កក់ទិញផ្ទះ លោកនឹងព្យាយាមកំណត់ក្នុងតម្លៃទាប ហើយនឹងប្រកាសនៅក្នុងពេល១ឬ២សប្ដាហ៍ខាងមុខ។ លោក សៀ ឬទ្ធី ឲ្យដឹងថា ផ្ទះទាំងនេះនឹងត្រូវលក់ក្នុងតម្លៃចាប់ពី ២៥០០០ដុល្លារ ទៅជាង ៣ម៉ឺនដុល្លារ។
អគ្គនាយកក្រុមហ៊ុន Worldbridge Land រូបនេះ បញ្ជាក់ទៀតថា លោកកំពុងពិភាក្សាជាមួយគ្រឹះស្ថានហិរញ្ញវត្ថុ ដើម្បីបន្ទាបតម្លៃអត្រាការប្រាក់ជូនដល់អតិថិជនដែលខ្ចីប្រាក់ទិញផ្ទះតម្លៃសមរម្យនេះ។ លោកបន្តថា ក្រុមហ៊ុននឹងកំណត់តម្លៃបង់រំលួសផ្ទះ ក្នុងតម្លៃមួយសមស្របនឹងលទ្ធភាពរបស់អ្នកទិញ។ ចំពោះគោលបំណងនៃគម្រោងមួយនេះ លោក សៀ ឫទ្ធី មានប្រសាសន៍ថា លោកចង់លើកកម្ពស់ជីវភាពរស់នៅរបស់អ្នកមានចំណូលទាបនិងមធ្យម អាចទទួលបានលំនៅឋានតម្លៃសមរម្យ ដើម្បីរស់នៅប្រកបដោយសុខមាលភាព សន្តិសុខ និងសេចក្ដីថ្លៃថ្នូរ។
គម្រោងដែលមានតម្លៃប្រមាណ ៦០ លានដុល្លារនេះ ត្រូវបាន លោក សៀ ឫទ្ធី អះអាងថា ក្រុមហ៊ុននឹងរៀបចំទីតាំងលំនៅដ្ឋានសមរម្យនេះទៅជាសហគមន៍ ដែលមានប្រព័ន្ធអគ្គិសនី ទឹកស្អាត មតេយ្យសាលា ផ្សារ គ្លីនិកព្យាបាលជំងឺ ជាដើម។
លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានថ្លែងក្នុងពិធីបញ្ចុះបឋមសិលាបើកការដ្ឋានសាងសង់លំនៅឋានតម្លៃសមរម្យនេះថា នេះគឺជាគម្រោងទីមួយនៅកម្ពុជា ហើយគម្រោងនេះគឺស្របនឹងគោលនយោបាយជាតិស្ដីពីលំនៅឋានរបស់រដ្ឋាភិបាល។ លោកថ្លែងទៀតថា គម្រោងនេះនឹងក្លាយបទពិសោធន៍សម្រាប់ការអនុវត្តគម្រោងលំនៅឋានសាធារណៈតម្លៃសមរម្យដទៃទៀត។
លោក ជា សុផារ៉ា បានស្នើឲ្យក្រុមហ៊ុនពិចារណាឲ្យអ្នកទិញត្រូវបង់រំលួសក្នុង១ខែត្រឹម៨០ដុល្លារ ក្នុងរយៈពេលវែង។
លោក សៀ ឫទ្ធី ក៏បានបញ្ជាក់ថា លោកមានបំណងសាងសង់ផ្ទះតម្លៃសមរម្យនេះនៅទីតាំងផ្សេងទៀតនៅជុំវិញរាជធានីភ្នំពេញ៕
Tag:
លំនៅឋានតម្លៃសមរម្យ
សៀ ឫទ្ធី
ជា សុផារ៉ា
© រក្សាសិទ្ធិដោយ thmeythmey.com
