ជាតិ
សេដ្ឋកិច្ច
រូបភាពពីអគ្គនាយកដ្ឋានគយ និងរដ្ឋាករកម្ពុជា
×![]()
ដោយ: ខន ចំប៉ា
អគ្គនាយកដ្ឋានគយនិងរដ្ឋាករកម្ពុជា បញ្ជាក់ថា ចំណូលពន្ធគយ ក្នុងឆ្នាំ២០១៦ ប្រមូលបានជាង ៧,០៧៦ ប៊ីលានរៀលសមមូលនឹង១,៧៤៥ លានដុល្លារអាមេរិក។ ចំណូលនេះ កើនប្រមាណ១០.៥ភាគរយ ធៀបនឹងឆ្នាំ២០១៥ ។
ក្នុងឆ្នាំ២០១៦ អគ្គនាយកដ្ឋានគយនិងរដ្ឋាករកម្ពុជា ប្រមូលចំណូលពន្ធ បានជាង ៧,០៧៦ ប៊ីលានរៀលសមមូលនឹង១,៧៤៥ លានដុល្លារអាមេរិក។ នេះបើតាមគេហទំព័រអគ្គនាយកដ្ឋានគយនិងរដ្ឋាករកម្ពុជា ដែលបញ្ជាក់បន្តថា ចំណូលនេះកើនប្រមាណ១០.៥ភាគរយ ធៀបនឹងចំណូលពន្ធគយឆ្នាំ២០១៥ ។
លោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា បានបញ្ជាក់នៅក្នុងកិច្ចប្រជុំបូកសរុបការងារគយនិងរដ្ឋាករប្រចាំខែធ្នូ និងលទ្ធផលបូកសរុបប្រចាំឆ្នាំ ២០១៦ ថាលទ្ធផលចំណូលនេះ ត្រូវជា ១០៦.២៥ភាគរយ ធៀបនឹងផែនការកំណត់ដោយច្បាប់ថវិកាឆ្នាំ២០១៦ ។ ជាមួយនឹងលទ្ធផលលើសផែនការកំណត់នេះ លោក គុណ ញឹម បានលើកសរសើរនិ ងវាយតម្លៃខ្ពស់ ចំពោះកិច្ចខិតខំប្រឹងប្រែង ដោយទទួលខុសត្រូវ និងការលះបង់ របស់មន្ត្រីគយនិងរដ្ឋាករគ្រប់រូប។
ទន្ទឹមនឹងនេះអគ្គនាយកនៃអគ្គនាយកដ្ឋានគយនិងរដ្ឋាករកម្ពុជា ក៏ណែនាំមន្ត្រីរបស់ខ្លួនអំពីទិសដៅការងារឆ្នាំ២០១៧ ដោយសង្កត់ធ្ងន់លើការងារមួយចំនួន ៧ ចំណុចរួមមាន៖ ទី១. បន្តពង្រឹងអភិបាលកិច្ចល្អក្នុងអង្គភាព និងក្រមសីលធម៌វិជ្ជាជីវៈ។ ទី២. ពង្រឹងប្រសិទ្ធភាការងារ។ ៣.ស្វះស្វែងរកប្រភពចំណូល ឬសក្តានុពលដែលនៅសេសសល់ ដើម្បីកៀរគរចំណូលចូលថវិកាជាតិបន្ថែមទៀត។ ទី ៤.បន្តការអនុវត្តឲ្យបាន ក្នុងការគ្រប់គ្រងការនាំចូលផលិតផលតេលសិលា ដោយបានលុបចោលទាំងស្រុងការនាំចូលតាមផ្លូវគោក។ ទី៥. ការបន្តអនុវត្តជាប្រចាំលើការងារពង្រឹងរដ្ឋបាលគយ គោលនយោបាយគយពាក់ព័ន្ធនឹងពន្ធអាករ កិច្ចសម្រួលពាណិជ្ជកម្ម និងការងារបច្ចេកទេសគយពាក់ព័ន្ធនឹងតម្លៃគិតពន្ធគយ យថាប្រភេទ ដើមកំណើតនិងបរិមាណទំនិញជាដើម។ ទី៦.បន្តពង្រឹងកិច្ចសហការផ្ទៃក្នុងអង្គភាពគយ និងរដ្ឋាករ និងអង្គភាពពាក់ព័ន្ធ ជាពិសេសជាមួយអគ្គនាយកដ្ឋានពន្ធដារ។ និងទី៧.ពង្រឹងប្រសិទ្ធភាពការងារបង្ការ ទប់ស្កាត់ និង បង្ក្រាបអំពើរត់គេចពន្ធ ដែលជាការងារគន្លឹះដ៏សំខាន់ ក្នុងការជំរុញអនុលោមភាពសារពើពន្ធ៕
Tag:
ពន្ធគយ
គុន ញឺម
© រក្សាសិទ្ធិដោយ thmeythmey.com
