ភ្នំពេញ៖ ការចេញអង្កររបស់កម្ពុជាទៅទីផ្សារអន្តរជាតិ ឆ្នាំ ២០១៦ កើនឡើងត្រឹមតែ ០,៧ ភាគរយ ដែលមានចំនួន ៥៤,២ ម៉ឺនតោន បើធៀបនឹងឆ្នាំ២០១៥ មានបរិមាណ ៥៣,៨ម៉ឺនតោន ដែលជាតួលេខមួយនៅឆ្ងាយពីទិសដៅនាំចេញអង្ករ ១លានតោនរបស់រដ្ឋាភិបាល ដែលបរាជ័យរួចមកហើយនៅឆ្នាំ២០១៥ ។ រដ្ឋមន្ត្រីក្រសួងកសិកម្ម និងអ្នកនៅក្នុងវិស័យនេះ បារម្ភពីវិស័យមួយនេះ ដែលចាំបាច់ត្រូវមានដំណោះស្រាយ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី ៩ខែមករា បានសរសេរលិខិតមួយច្បាប់ជូនប្រមុខរដ្ឋាភិបាល សម្តេច ហ៊ុន សែន អំពីស្ថានភាពនាំចេញអង្កររបស់កម្ពុជានៅឆ្នាំ២០១៦ ។ លោក បានវាយតម្លៃស្ថានភាពនាំចេញអង្ករនៅឆ្នាំ ២០១៦ កន្លង ទៅថា មានកំណើនតិចតួច ដែលបណ្ដាលពីការថយចុះយ៉ាងខ្លាំងរយៈពេលចំនួន ៧ ខែឆ្នាំ២០១៦ ធៀបនឹងរយៈពេលក្នុងឆ្នាំ ២០១៥ ពិសេសក្នុងចន្លោះពីខែមីនាដល់ខែសីហា និងក្នុងខែធ្នូ ដោយថយចុះ ៣០,៥០ភាគរយ។ លោក វេង សាខុន ចាត់ទុកកំណើតដ៏តិចនេះ ជាសញ្ញាគួរឲ្យបារម្ភ។
លោក ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្ម បានថ្លែងប្រាប់សារព័ត៌មានថ្មីៗថា ក្រសួងកសិកម្មបារម្ភទៅលើលទ្ធផលនាំចេញអង្ករ ដែលនៅឆ្ងាយពីគោលនយោបាយនាំចេញអង្ករ១លានតោន។ លោកលើកឡើងយ៉ាងដូច្នេះថា៖«ក្រសួងជាសេនាធិការរបស់រដ្ឋាភិបាលលើកបញ្ហាជាក្ដីបារម្ភនេះ ក្នុងន័យថា ដើម្បីស្នើសុំរដ្ឋាភិបាលជួយជ្រោមជ្រែងបន្ថែម ដើម្បីឲ្យបានជោគជ័យ»។ លោកបន្តថា៖« នេះជាការងារជំរុញគោលនយោបាយ ដែលមានទិសដៅកំណត់ថា យ៉ាងតិច១លានតោនក្នុង១ឆ្នាំៗ ហើយយើងនៅឆ្ងាយ គឺបារម្ភថា មិនអាចសម្រេចជោគជ័យនូវគោលនយោបាយ»។
លោក សុង សារ៉ន អគ្គនាយកក្រុមហ៊ុន Amru Rice ដែលជាក្រុមហ៊ុននាំចេញអង្ករធំលំដាប់ទី៥ បានចាត់ទុកតួលេខនាំចេញអង្ករដែលស្ទើរនឹងគ្មានកំណើននេះថា មិនសមស្របនឹងកំណើនវិនិយោគនៅក្នុងវិស័យនេះ។ លោកឲ្យដឹងយ៉ាងដូច្នេះថា៖«ការកើនឡើងតិចតួច គឺមិនសមស្របនឹងការវិនិយោគរបស់យើងទេ បើប្រៀបធៀបពីមួយឆ្នាំទៅមួយឆ្នាំ ការវិនិយោគលើការផលិត កែច្នៃ មានការកើនឡើង»។ លោកលើកឡើងទៀតថា៖«បច្ចុប្បន្នយើងមានសមត្ថភាពកែច្នៃនាំចេញ ១,២លាន ទៅ២លានតោន ប៉ុន្តែយើងនាំចេញបានប៉ុណ្ណឹង (៥៤ម៉ឺនតោន) គឺមិនឆ្លុះបញ្ជាំងពីសមត្ថភាពរបស់យើងទេ»។ លោក សុង សារ៉ន អះអាងថា តម្លៃនាំចេញអង្ករឆ្នាំ២០១៦ បានថយចុះ បើទោះបរិមាណនាំចេញកើនឡើងតិចតួចក្ដី។
បើតាម លោក សុង សារ៉ន ការនាំចេញអង្កររបស់កម្ពុជាជួបបញ្ហា មិនអាចប្រកួតប្រជែងនៅលើទីផ្សារអន្តរជាតិ។ «យើងប្រកួតអត់ឈ្នះគេ ទីផ្សារមាន តែយើងវាយចូលអត់រួច»។ នេះជាការបញ្ជាក់របស់លោក សារ៉ន ដែលឲ្យដឹងបន្ថែមទៀតថា ទីផ្សារអង្កររបស់កម្ពុជានៅទីផ្សារអឺរ៉ុប និងទីផ្សារចិន គឺល្អព្រោះមានការលើកលែងពន្ធ និងឆន្ទៈនយោបាយ ខណៈទីផ្សារផ្សេងមួយចំនួនទៀតបានធ្លាក់ចុះ។
«យើងមិនអាចបន្តជាមួយបញ្ហាដែលគ្មានដំណោះស្រាយទេ បើអត់ដំណោះស្រាយ គេយកទីផ្សារយើងអស់ហើយ»។ នេះជាការលើកឡើងរបស់លោក សុង សារ៉ន ដែលជំរុញឲ្យរដ្ឋាភិបាលនិងអ្នកពាក់ព័ន្ធត្រូវរកដំណោះស្រាយចំពោះបញ្ហាប្រឈមក្នុងវិស័យស្រូវអង្ករ។ លោកថាបញ្ហាថ្លៃដើមផលិតខ្ពស់ទៅលើការដាំដុះស្រូវ ការកែច្នៃអង្ករ និងអត្រាការប្រាក់របស់គ្រឹះស្ថានហិរញ្ញវត្ថុ ជាចំណុចដែលត្រូវតែដោះស្រាយ។
អគ្គនាយកក្រុមហ៊ុន Amru rice រូបនេះ បានកត់សម្គាល់ពីបញ្ហាក្រៅស្រុក ដែលប៉ះពាល់ទីផ្សារអង្ករអន្តរជាតិ និងជះឥទ្ធិពលដល់កម្ពុជានៅឆ្នាំ២០១៦ និងបន្តដល់ឆ្នាំ២០១៧ ។ លោកបញ្ជាក់ថា ប្រទេសមួយចំនួន ដែលធ្លាប់តែបញ្ជាទិញ តែបែរមកផលិតដើម្បីផ្គត់ផ្គង់ដោយខ្លួនឯង ដែលនាំឲ្យបរិមាណផលិតលើសតម្រូវការ។ តម្លៃប្រេងឆៅធ្លាក់ចុះ, អត្រាប្តូរប្រាក់អាមេរិក និងការឡើងកាន់តំណែងថ្មីរបស់ប្រធាធិបតីសហរដ្ឋអាមេរិក ក៏ត្រូវបាន លោក សុង សារ៉ន មើលឃើញថាជាបញ្ហាចោតដល់វិស័យស្រូវអង្ករផងដែរ។
សូមបញ្ជាក់ថា ទិន្នន័យនៃការនាំអង្ករចេញទៅក្រៅប្រទេសកាលពីឆ្នាំ ២០១៥ កើនឡើងប្រមាណ ៣៩ ភាគរយ បើប្រៀបធៀបនឹងឆ្នាំ ២០១៤ ។
បើតាមលោក ឡោ រស្មី អ្នកនាំពាក្យក្រសួងកសិកម្ម រុក្ខាប្រមាណ និងនេសាទ តួលេខបឋមនៃការប្រមូលផលស្រូវរដូវវស្សានៅឆ្នាំ២០១៦ មានចំនួនជាង ៧លានតោន ហើយបើបូកសរុបទិន្នផលទាំងស្រូវរដូវវស្សា និងរដូវប្រាំង ដែលប្រមូលផលនៅខែមករាឆ្នាំ២០១៧ នឹងមានចំនួនសរុបប្រមាណ ១០លានតោន។ លោកបញ្ជាក់ថា កម្ពុជាមានតម្រូវការស្បៀងក្នុងស្រុកប្រមាណ ៥លានតោនស្រូវ និងគិតជាអង្ករជាង ២លានតោន៕