អន្តរជាតិ
របបយោធាថៃ ចាប់ផ្ដើមដំណើរការកែសេចក្ដីព្រាងរដ្ឋធម្មនុញ្ញបំពេញបំណងមហាក្សត្រ
× ប្រមុខរបបយោធាថៃ ប្រាយុទ្ធ ចន្ទអូចា បាននិយាយថា លោក នឹងចាប់ផ្ដើមធ្វើវិសោធនកម្មសេចក្ដីព្រាងរដ្ឋធម្មនុញ្ញត្រង់ចំណុចស្ដីពីមហាក្សត្រ តបតាមសំណើរបស់ស្ដេច Maha Vajiralongkorn ។ លោកឧត្តមសេនីយ៍ ប្រាយុទ្ធ និយាយដូចនេះ បន្ទាប់ពីសភាថៃ អនុម័តលើវិសោធនកម្មរដ្ឋធម្មនុញ្ញបណ្ដោះអាសន្នឆ្នាំ២០១៤ ដែលនេះជានីតិវិធីដំបូងនៃការកែប្រែសេចក្ដីព្រាងរដ្ឋធម្មនុញ្ញឆ្នាំ២០១៦ ដើម្បីបង្កើនអំណាចមហាក្សត្រ។
«ខ្ញុំបានព្រាងសំបុត្រដើម្បីស្នើសុំសេចក្ដីព្រាងរដ្ឋធម្មនុញ្ញពីមហាក្សត្រវិញហើយ ដូច្នេះសេចក្ដីព្រាងនេះ អាចត្រូវបានកែប្រែឲ្យប្រសើរឡើង។ ដំណើរការកែប្រែនេះ អាចប្រើប្រាស់ពេលមួយខែ»។ នេះជាការលើកឡើងរបស់នាយករដ្ឋមន្ត្រីថៃ ប្រាយុទ្ធ ចន្ទអូចា ទៅកាន់ក្រុមអ្នកសារព័ត៌មាននៅថ្ងៃទី១៧ ខែមករា ទាក់ទងនឹងសំណើឲ្យធ្វើវិសោធនកម្មសេចក្ដីព្រាងរដ្ឋធម្មនុញ្ញឆ្នាំ២០១៦ របស់មហាក្សត្រ Maha Vajiralongkorn ក្នុងចំណុចទាក់ទងអំណាចមហាក្សត្រ។
កាលពីសប្ដាហ៍មុន ខុទ្ធកាល័យមហាក្សត្រ Maha Vajiralongkorn បានស្នើឲ្យរបបយោធាថៃ កែប្រែសេចក្ដីព្រាងរដ្ឋធម្មនុញ្ញ ដែលត្រូវបានអនុម័តក្នុងប្រជាមតិខែសីហា ឆ្នាំ២០១៦ ។ សេចក្ដីព្រាងរដ្ឋធម្មនុញ្ញនេះ បានឆ្លងផុតអំណាចនាយករដ្ឋមន្ត្រី និងធ្លាក់ដល់រាជវាំងដើម្បីឲ្យមហាក្សត្រ Maha Vajiralongkorn សម្រេចចុងក្រោយ។ ប៉ុន្តែមហាក្សត្រអង្គនេះ ក៏ស្នើឲ្យកែប្រែមាត្រាចែងពីការតែងតាំងរាជានុសិទ្ធិ ពេលទ្រង់ឯបរទេស ឬមានប្រឈួន។
ត្រង់ចំណុចនេះ មហាក្សត្រថៃ ចង់ឲ្យរដ្ឋធម្មនុញ្ញថ្មីផ្ដល់អំណាចឲ្យទ្រង់ «មិនចាំបាច់តែងតាំងរាជានុសិទ្ធិឡើយ ពេលព្រះអង្គមិនស្ថិតក្នុងប្រទេស ឬក៏មិនអាចបំពេញរាជកិច្ចបាន។ ប៉ុន្តែនេះគ្រាន់តែជាចំណុចមួយនៃចំណុចជាច្រើនដែលមហាក្សត្រថៃ ចង់ឲ្យមានការកែប្រែប៉ុណ្ណោះ។ ការបង្ហាញរាជបំណងចង់កែប្រែសេចក្ដីព្រាងធម្មនុញ្ញបែបនេះ ជារឿងដ៏កម្រមាន ដ្បិតមហាក្សត្រថៃ មិនងាយអន្តរាគមន៍ផ្ទាល់ក្នុងកិច្ចនយោបាយឡើយ ទោះជាស្ដេចមានឥទ្ធិពលខ្លាំងក៏ដោយ។
ទាក់ទិននឹងរឿងនេះ លោក ប្រាយុទ្ធ បញ្ជាក់ថា គណៈកម្មាធិការពិសេសដែលមានសមាជិក១១នាក់ នឹងត្រូវបង្កើត ដើម្បីពិនិត្យមាត្រាក្នុងសេចក្ដីព្រាងរដ្ឋធម្មនុញ្ញ ដែលត្រូវធ្វើវិសោធនកម្ម។ សារព័ត៌មាន The Nation ផ្សាយថា គណៈកម្មាធិការនេះ នឹងត្រូវតែងតាំងដោយលោក ប្រាយុទ្ធ ផ្ទាល់។ អតីតប្រធានគណៈកម្មការព្រាងរដ្ឋធម្មនុញ្ញ Borwornsak Uwanno, ប្រធានគណៈកម្មការនេះបច្ចុប្បន្ន Meechai Ruchupan, ប្រធានសភា Pornpetch Wichitcholchai និងឧបនាយករដ្ឋមន្ត្រី Wissanu Krea-ngam សុទ្ធតែមានមុខក្នុងគណៈកម្មាធិការពិសេសនេះ។
ប្រមុខរបបយោធាថៃ ក៏បញ្ជាក់ច្បាស់ថា ការធ្វើវិសោធនកម្ម នឹងធ្វើឡើងតែលើមាត្រានិយាយអំពីអំណាចមហាក្សត្រប៉ុណ្ណោះ។ ចំណែកមាត្រាចែងពីសិទ្ធិ និងសេរីភាពប្រជាជន ក៏ដូចជាមាត្រានិយាយពីរដ្ឋាភិបាលក្ដី នឹងមិនត្រូវបានប៉ះពាល់អ្វីទាំងអស់។ បន្ទាប់ពីកែប្រែរួច សេចក្ដីព្រាងរដ្ឋធម្មនុញ្ញនេះ នឹងបញ្ជូនត្រឡប់ទៅមហាក្សត្រ Maha Vajiralongkorn វិញ ដើម្បីសុំការយល់ព្រម ហើយព្រះអង្គ នឹងមានពេលបីខែដើម្បីពិនិត្យសម្រេច។ នេះមានន័យថា ការបោះឆ្នោតទូទៅ ក៏ត្រូវពន្យារពេលដែរ៕
Tag:
ថៃ
ប្រាយុទ្ធ ចន្ទអូចា
Maha Vajiralongkorn
© រក្សាសិទ្ធិដោយ thmeythmey.com