ក្រោយធ្វើការប្រកួតប្រជែងអស់រយៈពេល២ថ្ងៃចាប់ពីថ្ងៃទី១៤ ដល់ថ្ងៃទី១៥ ខែមករា នៅប្រទេសម៉ាឡេស៊ី ក្រុមកីឡាអេឡិចត្រូនិកកម្ពុជា(E-Sport)បានក្លាយជាម្ចាស់ជើងឯកការប្រកួតកីឡាអេឡិចត្រូនិកអន្តរជាតិប្រចាំឆ្នាំ២០១៧(MATIC 2017) ក្រោយផ្តួលម្ចាស់ជើងឯកថៃ Superior នៅវគ្គផ្តាច់ព្រ័ត្រ។ ប្រតិភូ និងក្រុមកីឡាករកម្ពុជាបានមកដល់កម្ពុជាកាលពីថ្ងៃទី១៧ ខែមករា ដោយបានពាំនាំមកជាមួយនូវពានជើងឯកមួយ និងប្រាក់រង្វាន់លើកទឹកចិត្តចំនួន១៥,០០០ដុល្លារ។
ក្រោយផ្តួលក្រុមម្ចាស់ជើងឯកពីរជំនាន់របស់ថៃ Superior នៅវគ្គផ្តាច់ព្រ័ត្រកាលពីថ្ងៃទី១៥ ខែមករា ក្រុមកីឡាអេឡិចត្រូនិកកម្ពុជា Never Care បានក្លាយជាម្ចាស់ជើងឯកអន្តរជាតិប្រចាំឆ្នាំ២០១៧ នៃព្រឹត្តិការណ៍ប្រកួតជើងឯកកីឡាអេឡិចត្រូនិកអន្តរជាតិ MATIC 2017 នៅប្រទេសម៉ាឡេស៊ី។ ក្រៅពីពានរង្វាន់ជើងឯក ក្រុមកីឡាអេឡិចត្រូនិកកម្ពុជាក៏ទទួលបានប្រាក់រង្វាន់លើកទឹកចិត្ត១៥,០០០ដុល្លារផងដែរ។
មុនក្លាយជាម្ចាស់ជើងឯកអន្តរជាតិ MATIC ប្រចាំឆ្នាំ២០១៧ ក្រុម Never Care របស់កម្ពុជាបានយកឈ្នះគូប្រជែងជាបន្តបន្ទាប់ក្នុងវគ្គសន្សំពិន្ទុ រួមមានក្រុម KC-Kingover របស់ម៉ាឡេស៊ី, Shui Feng របស់ចិន, ក្រុម Troop History របស់សិង្ហបុរី, ក្រុម Successful របស់កម្ពុជា និងក្រុមការពារជើងឯករបស់ថៃ Superior។
បន្ទាប់មកក្រុមកម្ពុជាមួយនេះបានទម្លាក់ក្រុម No Excuse របស់សិង្ហបុរីក្នុងវគ្គ៨ក្រុមចុងក្រោយ មុនទម្លាក់ក្រុម Shui Feng របស់ចិននៅវគ្គពាក់កណ្ដាលផ្ដាច់ព្រ័ត្រ។ ក្រោយមកបានយកឈ្នះក្រុមការពារជើងឯកថៃ Superior នៅវគ្គផ្ដាច់ព្រ័ត្រដើម្បីគ្រងជើងឯក MATIC ប្រចាំឆ្នាំ២០១៧។
ក្រុមកីឡាអេឡិចត្រូនិកកម្ពុជា Never Care បានពាំនាំពាន និងប្រាក់រង្វាន់មកដល់កម្ពុជាកាលពីថ្ងៃទី១៧ ខែមករា ឆ្នាំ២០១៧ កន្លងទៅ។ ក្រុមនេះទទួលបានការស្វាគមន៍យ៉ាងកក់ក្តៅពីសំណាក់លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា(NOCC) និងថ្នាក់ដឹកនាំសហព័ន្ធកីឡាអេឡិចត្រូនិកកម្ពុជានៅឯអាកាសយានដ្ឋានអន្តរជាតិភ្នំពេញ។
គួរបញ្ជាក់ថា ការប្រកួតកីឡាអេឡិចត្រូនិកជ្រើសរើសជើងឯកអន្ដរជាតិ MATIC ឆ្នាំ២០១៧ នៅប្រទេសម៉ាឡេស៊ី មានចូលរួមទាំងអស់ចំនួន១២មកពី៧ប្រទេស ក្នុងនោះកម្ពុជាបានបញ្ជូនកីឡាករ២ក្រុមឲ្យចូលរួម, ម៉ាឡេស៊ី៣ក្រុម, សិង្ហបុរី២ក្រុម, ចិន២ក្រុម, ថៃ១ក្រុម, មីយ៉ាន់ម៉ា១ក្រុម និងឥណ្ឌូនេស៊ី១ក្រុម។ ការប្រកួតធ្វើឡើងរយៈពេល២ថ្ងៃចាប់ពីថ្ងៃទី១៤ ដល់ថ្ងៃទី១៥ ខែមករា៕