ព័ត៍មានសុខភាព
ប្រុសមិនស្តាប់សំដីស្រី ជាកត្តាវិទ្យាសាស្ត្រ មិនមែនជាចេតនាឡើយ
× និយាយជាមួយមនុស្សប្រុសដូចជាចាក់ទឹកលើក្បាលទា? សូមនារីទាំងឡាយស្វែងយល់ពីមូលហេតុសិន។ តាមការសិក្សាមួយរបស់អ្នកជំនាញអង់គ្លេស បានបង្ហាញថា ខួរក្បាលមនុស្សប្រុសមានការពិបាកយ៉ាងខ្លាំងក្នុងការទទួលសំឡេងរបស់ស្រី។
យោងតាមការសិក្សារបស់អ្នកជំនាញនៅសាកលវិទ្យាល័យ Sheffield របស់ចក្រភពអង់គ្លេស ដែលត្រូវបានចុះផ្សាយដោយទស្សនាវដ្តី NeuroImage បុរសស្តាប់សំដីរបស់ស្ត្រី មិនសូវចូលត្រចៀកនោះឡើយ។ ការសិក្សាបានផ្អែកលើការស្កែនសកម្មភាពនៃដំណើរការខួរក្បាលរបស់បុរស១២នាក់ នៅពេលស្តាប់សំឡេងរបស់បុរស និងស្ត្រី។
លទ្ធផលបានបង្ហាញថា សំឡេងមានសកម្មភាពទៅក្នុងផ្នែកផ្សេងៗគ្នានៃខួរក្បាល។ រលកសំឡេងរបស់ស្ត្រីមានលក្ខណៈដូចជាតន្ត្រី ដែលធ្វើឲ្យខួរក្បាលបុរសពិបាកចាប់បាន ពោលគឺដូចជាកាដង់ភ្លេង។ លោក Michael Hunter តំណាងក្រុមអ្នកស្រាវជ្រាវ បានអះអាងថា សំឡេងរបស់ស្ត្រី មានភាពស្មុគ្រស្មាញជាងសំឡេងបុរស ដោយមានភាពខុសគ្នាទាំងទំហំ និងរលកសំឡេង ពោលគឺស្ត្រី មានសំឡេងដូចទៅនឹងបទភ្លេងធម្មជាតិ។
សម្រាប់សំឡេងបុរស អ្នកស្រាវជ្រាវ បានរកឃើញថា ជាសំឡេងម៉ាត់ៗ និងច្បាស់លាស់ ដែលធ្វើឲ្យអ្នកស្តាប់ឆាប់ចាប់បាន។ ក្រុមវេជ្ជបណ្ឌិតបានណែនាំស្ត្រីទាំងឡាយថា៖ «សូមកុំប្រញាប់ខឹងពេកនៅពេលដែលបុរសមិនស្តាប់សំដីរបស់អ្នក។ វាមិនមែនជាចេតនារបស់ពួកគេឡើយ តែវាជាកំហុសនៃសំឡេងរបស់អ្នក និងខួរក្បាលរបស់ពួកគាត់...»៕
Tag:
វិទ្យាសាស្ត្រ
សំឡេង
© រក្សាសិទ្ធិដោយ thmeythmey.com