ជនអន្តោប្រវេសន៍ដណើ្តមគ្នារកច្រកចូល អាមេរិកឲ្យបានមុន ដូណាល់ ត្រាំ ចូលកាន់តំណែង

អន្តរជាតិ

ជនអន្តោប្រវេសន៍ដណើ្តមគ្នារកច្រកចូល អាមេរិកឲ្យបានមុន ដូណាល់ ត្រាំ ចូលកាន់តំណែង

20, Jan 2017 , 9:19 am

រូបភាព

ដោយ: សៅ ផលនិស្ស័យ (Sao Phal Niseiy)

ជនអន្តោប្រវេសន៍ជាច្រើនបានប្រញាប់ប្រញាល់ឆ្លងដែនពីម៉ិកស៊ិកចូលទឹកដីអាមេរិក ធ្វើយ៉ាងណាឲ្យបានមុនពេលលោក ដូណាល់ ត្រាំ ចូលកាន់អំណាចថ្ងៃ ២០មករា។ ពួកគេព្យាយាមផ្សងព្រេង ប្តូរជីវិតប្រឈមគ្រោះថ្នាក់ច្រើនសន្ធឹកដោយមិនខ្លាចរអា ឲ្យតែបានចូលដល់ទឹកដីអាមេរិក។

មិនដល់៤៨ម៉ោងទៀតឡើយ ប្រធានាធិបតីអាមេរិកថ្មី លោក ដូណាល់ ត្រាំ នឹងស្បថចូលកាន់តំណែងជាផ្លូវការ។ លោកទំនងជាសង់ជញ្ជាំងយក្សតាមព្រំដែនម៉ិកស៊ិកដើម្បីទប់ស្កាត់ការហូរចូលនៃជនអន្តោប្រវេសន៍ចូលក្នុងទឹកដីអាមេរិក តែគម្រោងសាងសង់ប្រហែលត្រូវប្រើលុយប្រជាជនអាមេរិកសិន។

ដោយសារ បារម្ភពីការបិទច្រកព្រំដែនដោយសង់ជញ្ជាំងធំខណ្ឌចែកប្រទេសទាំងពីរ ជនអន្តោប្រវេសន៍ជាច្រើននៅទឹកដីម៉ិកស៊ិកត្រហេបត្រហបរត់រកច្រកឆ្លងចូលទឹកដីអាមេរិកឲ្យបានមុនលោក ដូណាល់ ត្រាំ ឡើងកាន់អំណាច។

ទីភ្នាក់ងារព័ត៌មាន AFP បានចុះផ្សាយថា ជនអន្តោប្រវេសន៍ជាច្រើននាក់បានព្យាយាមឆ្លងដែនចូលសហរដ្ឋអាមេរិកតាមវាលខ្សាច់ប្រទេសម៉ិកស៊ិក ដោយប្រឈមគ្រោះថ្នាក់ខ្លាំង។ ពួកគេត្រូវចំណាយពេលវេលាដើរយ៉ាងយូរ និងត្រូវប្រឈមមុខជាមួយក្រុមជើងកាងជួញដូរមនុស្សនៅតាមព្រំដែន, ជួបសត្វសាហាវ,និងក្រុមល្បាតតាមព្រំដែនជាដើមផង។

ក្នុងចំណោមជនអន្តោប្រវេសន៍ទាំងនោះ មានប្រជាជនហុងឌុយរ៉ាសមួយក្រុមផង។ ពួកគេកំពុងអាំងភ្លើងពេលឈប់សម្រាកនៅក្រុង Caborca នៅជិតព្រំដែនអាមេរិក។

លោក Wilson វ័យ ៤៨ឆ្នាំដែលស្ថិតក្នុងចំណោមក្រុមជនអន្តោប្រវេសន៍បានថ្លែងប្រាប់ទីភ្នាក់ងារព័ត៌មាន AFP ថា លោកសុខចិត្តចាកចេញពីស្រុកកំណើតដោយមិនបានរង់ចាំកូនស្រីលោកកើតឡើយ។ លោកបញ្ជាក់ថា លោកគ្មានជម្រើសឡើយព្រោះ ការឆ្លងចូលទឹកដីអាមេរិកឲ្យបានមុនលោក ត្រាំ ចូលកាន់តំណែងវាសំខាន់ជាង។

«ពេលដែលខ្ញុំមើលឃើញបុរសម្នាក់និយាយតាមកញ្ចក់ទូរទស្សន៍ថា គាត់ស្អប់ជនអន្តោប្រវេសន៍និងសង់ជញ្ជាំងតាមព្រំដែន ខ្ញុំគិតឃើញថា វាដល់ពេលយើងធ្វើអ្វីម្យ៉ាងហើយ។ ដូច្នេះហើយយើងបានចំណាយពេលវេលាបុណ្យ Christmas និងបុណ្យឆ្លងឆ្នាំដើម្បីធ្វើដំណើរមកសហរដ្ឋអាមេរិកឲ្យបានទាន់ពេល»។

យ៉ាងណាក៏ដោយគេដឹងច្បាស់ហើយថា ជនអន្តោប្រវេសន៍មិនត្រូវគេស្វាគមន៍ឲ្យចូលទឹកដីអាមេរិកដោយងាយឡើយ។ រដ្ឋបាលថ្មីរបស់លោក ដូណាល់ ត្រាំ ក៏រឹតែស្អប់ជនអន្តោប្រវេសន៍ទៀត ហើយលោកធ្លាប់សន្យាបណ្តេញជនអន្តោប្រវេសន៍ខុសច្បាប់រាប់លាននាក់ចេញពីអាមេរិកផង។

ពាក់ព័ន្ធបញ្ហានេះ លោក Wilson ដែលផ្សងព្រេងអស់ច្រើនថ្ងៃមកសហរដ្ឋអាមេរិកនោះបានអះអាងថា លោកសង្ឃឹមនិងបួងសួងឲ្យរដ្ឋបាលអាមេរិកថ្មីបន្ធូរបន្ថយការរឹតបន្តឹងព្រំដែន។ លោកបានបញ្ជាក់ដូច្នេះថា៖« ខ្ញុំជឿជាក់ថា ព្រះនឹងបន្ទន់ចិត្តលោកដូណាល់ ត្រាំ»។

តាមពិតទៅ ជនអន្តោប្រវេសន៍ម្នាក់ៗ ចំណាយលុយ អស់ ១០០០ដុល្លារម្នាក់ដើម្បីឲ្យមេខ្យល់នាំពួកគេចូលទឹកដីអាមេរិក។ ហើយអ្វីដែលសំខាន់ជនអន្តោប្រវេសន៍រាប់ពាន់នាក់ដែលគ្មានឯកសារត្រឹមត្រូវ ត្រូវបានអាជ្ញាធរម៉ិកស៊ិកចាប់ខ្លួនរាល់ខែ ហើយរដ្ឋាភិបាលម៉ិកស៊ិកបានស្នើឲ្យមានការបន្ថែមថវិកាដើម្បីដោះស្រាយនិងទប់ស្កាត់ការហូរចូលនៃក្រុមជនអន្តោប្រវេសន៍នេះ៕