ភ្នំពេញ៖ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU)បានថ្លែងសារព្រមានមេធាវីកម្ពុជាទាំងអស់ កុំឲ្យប្រព្រឹត្តអំពើពុករលួយពេលការពារកូនក្តីនៅក្នុងតុលាការ ជៀសវាងពួកគេប្រឈមមុខ នឹងផ្លូវច្បាប់។
ថ្លែងក្នុងពិធីប្រកាសផ្ទេរតំណែងប្រធានមេធាវីអាណត្តិទី១១ និងចែកវិញ្ញាបនបត្រដល់មេធាវីជំនាន់ទី ១៣ និងទី១៤ នៅថ្ងៃទី១៩ មករានេះ ប្រធានអង្គភាព ACUបានបង្ហើបប្រាប់មេធាវីពេញសិទ្ធិថ្មីជាង ៣០០នាក់ ថា អង្គភាពប្រឆាំងអំពើពុករលួយ និងគណៈមេធាវី បាន និងកំពុងសហការគ្នាទប់ស្កាត់យ៉ាងជិតស្និទប្រឆាំងអំពើពុករលួយក្នុងវិស័យយុត្តិធម៌ ដើម្បីលើកកម្ពស់នីតិរដ្ឋនៅកម្ពុជាឲ្យកាន់តែប្រសើរ។
ដោយមេធាវីអាចប្រឈមនឹងច្បាប់ព្រហ្មទណ្ឌ ច្បាប់ស្តីពីលក្ខន្តិក និងក្រមសីលធម៌មេធាវី និងច្បាប់ស្តីពី ការប្រឆាំអំពើពុករលួយ លោកទេសរដ្ឋមន្ត្រីរូបនេះ បានលើកឡើងថា មេធាវីមានសិទ្ធិស្នើថតចម្លងឯកសារសំណុំរឿងពីតុលាការ ប៉ុន្តែពួកគេមិនអាចចម្លងបន្តឲ្យកូនក្តី ឬអ្នកដទៃឡើយ។
«មេធាវីការពារក្តីមានសិទ្ធិតែប្រាប់ផ្ទាល់មាត់ពីអ្វីដែលខ្លួនបានដឹងឮពីតុលាការទៅកូនក្តីប៉ុណ្ណោះ ពួកគេមិនត្រូវផ្តល់ឯកសារឲ្យកូនក្តីខ្លួនដាច់ខាត»។ លោក ឱម យ៉ិនទៀង ដែលធ្លាប់បំពេញការងារជាមេធាវី បានរម្លឹកមេធាវីពេញសិទ្ធិថ្មី មុនពេលពួកគេប្រឡូកក្នុងវិស័យយុត្តិធម៌នៅកម្ពុជា។
មិនខុសពីសារព្រមានមេធាវីពេញសិទ្ធិ លោក ឱម យ៉ិនទៀង ក៏បានព្រមានអ្នកប្រព្រឹត្តអំពើពុករលួយពេលប្រឡងមេធាវីនឹងប្រឈមនឹងផ្លូវច្បាប់ផង។យ៉ាងណា ACU ពុំបានរកឃើងថា ការប្រឡងជ្រើសរើសបេក្ខជនឲ្យចូលសាលាមេធាវីមានអំពើខុសប្រក្រតី ឬពុករលួយ ផ្ទុយពីច្បាប់ឡើយ។
«ខ្ញុំលើកមួយចំណុច គឺថា គេប្តឹងថាមានអំពើពុករលួយ មានការចែកវិញ្ញាសារមុនការប្រឡង ប៉ុន្តែពេលយើងចុះពិនិត្យស៊ើបអង្កេតទៅគ្មានការបើកហឹបវិញ្ញាសារមុនទេ។ គណៈកម្មាធិការប្រឡងបានបិទក្រដាសលើហឹបវិញ្ញាសារត្រឹមត្រូវ»។ លោក ឱម យ៉ិនទៀង តបនឹងសំណួរអ្នកសារព័ត៌មានក្រោយចុះពីវេទិកា។
ដោយលោកពុំបង្ហើបពីចំនួនបណ្តឹងដែល ACU បានទទួលពីជនអនាមិកនោះ លោកទេសរដ្ឋមន្ត្រី របស់រដ្ឋាភិបាលរូបនេះ អះអាងថា ACU បានទទួល និងបើកការស៊ើបអង្កេតករណីបណ្តឹងផ្សេងទៀតផង។
លោក ប៊ុន ហុន ប្រធានគណៈមេធាវីអាណត្តិចាស់ និងលោក សួន វិសាល ប្រធានគណៈមេធាវីអាណត្តិទី១១ ថ្មី សុទ្ធតែបញ្ជាក់ថា គណៈមេធាវីពុំទាន់រកឃើញអំពើពុករលួយ ក្នុងពេលប្រឡងមេធាវីទេ។
បើតាមប្រធានគណៈមេធាវីអាណត្តិទី១១ថ្មីដែលមិនចង់លឺពាក្យ«ពុករលួយ»ពេលប្រឡងមេធាវី ក្នុងអាណត្តិខ្លួនបច្ចុប្បន្ន កម្ពុជាមានមេធាវីជាង ១ពាន់នាក់ ក្នុងនោះ មេធាវីជាង ១០០នាក់ កំពុងបំពេញអាណត្តិការពារ ក្តី នៅក្រៅប្រទេស៕