កីឡាជាតិ
វគ្គជម្រុះជុំទីបី AFC Asian Cup៖ កម្ពុជាអាចប៉ះក្រុមណាខ្លះ? លោក Lee Tae Hoon គ្រូបង្វឹកក្រុមជម្រើសជាតិកម្ពុជា
×
នៅទីក្រុងអាប៊ីដាប៊ី ប្រទេសអារ៉ាប់រួមអេមីរ៉េត សហព័ន្ធកីឡាបាល់ទាត់អាស៊ី (AFC) នឹងរៀបចំពិធីចាប់ឆ្នោតសម្រាប់ការប្រកួតវគ្គជម្រុះជុំទី៣នៃព្រឹត្តិការណ៍ AFC Asian Cup ឆ្នាំ២០១៩ នាវេលាម៉ោង៧ល្ងាចនេះ (ម៉ោងនៅកម្ពុជា)។ ក្រុមចំនួន២៤ នឹងត្រូវបែងចែកជា៨ពូល ដោយក្នុង១ពូលៗ មាន៤ក្រុម។
ក្រុមដែលត្រូវប្រកួតវគ្គជម្រុះជុំទី៣ ត្រូវបានបែងចែកជា៤ថ្នាក់ ដោយយោងតាមលទ្ធផលនាការប្រកួតជម្រុះជុំទីពីរ និងការប្រកួតវគ្គ Play-Off កន្លងមក រួមទាំងផ្អែកលើចំណាត់ថ្នាក់ FIFA World Rankings ក្នុងខែមករា ឆ្នាំ២០១៧។
ក្រុមនៅក្នុង Pot 1 មាន ហ្ស៊កដង់ អូម៉ង់ ហ្វីលីពីន បារ៉ែន គៀហ្ស៊ីស្ថាន កូរ៉េខាងជើង។ Pot 2 មាន ឥណ្ឌា ប៉ាឡេស្ទីន តាហ្ស៊ីគីស្ថាន វៀតណាម តួកមេនីស្ថាន។ Pot 3 មាន ម៉ាល់ឌីវ លីបង់ យ៉េមេន អាហ្វហ្គានីស្ថាន ឆាយនីសតៃប៉ិ មីយ៉ាន់ម៉ា។ Pot 4 មាន ម៉ាឡេស៊ី សិង្ហបុរី កម្ពុជា នេប៉ាល់ ប៊ូតង់ ម៉ាកាវ។
នេប៉ាល់ និងម៉ាកាវ បានធ្លាក់ពីការប្រកួតជម្រុះ ប៉ុន្តែ AFC បានបញ្ចូលឈ្មោះក្រុមទាំងពីរឡើងវិញ ដោយនេប៉ាល់ជំនួស ហ្គាម ដែលបានដកខ្លួន រីឯម៉ាកាវជំនួស គូវែត ដែលកំពុងជាប់ពិន័យ។ វត្តមានឡើងវិញរបស់ នេប៉ាល់ និងម៉ាកាវ ដោយសារតែពួកគេសុទ្ធតែឈានដល់វគ្គផ្តាច់ព្រ័ត្រក្នុងព្រឹត្តិការណ៍ Solidarity Cup ឆ្នាំ២០១៦ ដែលរៀបចំដោយ AFC។
ពីរក្រុមដែលទទួលបានពិន្ទុលើសគេក្នុងពូលនីមួយៗពីការប្រកួតវគ្គជម្រុះជុំទីបី AFC Asian Cup នឹងទទួលបានកៅអីសម្រាប់ព្រឹត្តិការណ៍ AFC Asian Cup ឆ្នាំ២០១៩ នៅប្រទេសអារ៉ាប់រួមអេមីរ៉េត។ ក្រុមដែលកំពុងរង់ចាំរួចជាស្រេចរួមមាន ម្ចាស់ផ្ទះអារ៉ាប់រួមអេមីរ៉េត កាតា កូរ៉េខាងត្បូង ជប៉ុន ថៃ អារ៉ាប៊ីសាអូឌីត អូស្ត្រាលី អ៊ូសបេគីស្ថាន អ៊ីរ៉ង់ ស៊ីរី អ៊ីរ៉ាក់ និងចិន៕
Tag:
AFC Asian Cup
ជម្រើសជាតិកម្ពុជា
© រក្សាសិទ្ធិដោយ thmeythmey.com