ភ្នំពេញ៖ កម្ពុជា កំពុងអភិវឌ្ឍប្រទេសដោយផ្លាស់ប្តូរពីវិស័យកសិកម្ម ឆ្ពោះទៅរកវិស័យឧស្សាហកម្មទំនើប និងសម័យភាវូបនីយកម្ម តាមរយៈសកម្មភាពសេដ្ឋកិច្ចនៅក្នុងវិស័យនានា។ បើតាមលទ្ធផលជំរឿនទូទៅប្រជាជននៅកម្ពុជាឆ្នាំ២០១៩ អ្នកមានការងារធ្វើទាំងអស់ក្នុងវិស័យកសិកម្មបានថយចុះអស់១៧,៦ភាគរយ ដែលផ្ទុយពីវិស័យកម្មន្តសាល វិស័យសំណង់ស៊ីវិល និងវិស័យពាណិជ្ជកម្មលក់ដុំលក់រាយ ជួសជុលយានយន្ត និងទោចក្រយានយន្ត មានកំណើនទៅវិញ។
យោងតាមលទ្ធផលជំរឿនទូទៅប្រជាជននៅកម្ពុជាឆ្នាំ២០១៩ ដែលផ្សព្វផ្សាយដោយក្រសួងផែនការ នាព្រឹកថ្ងៃទី២៦មករា ឆ្នាំ២០២១ ចំនួនអ្នកមានការងារធ្វើទាំងអស់ក្នុងវិស័យកសិកម្ម ព្រៃឈើ និងនេសាទ បានថយមកនៅត្រឹម៥៤,៧ភាគរយស្មើប្រមាណ៤,៧លាននាក់ នៃចំនួនអ្នកមានការងារធ្វើសរុប៨,៦១២,៣៦៧នាក់។ អត្រានេះ បើធៀបនឹងលទ្ធផលជំរឿនកាលពី១១ឆ្នាំមុន ពោលក្នុងឆ្នាំ២០០៨ មានអ្នកធ្វើការងារលើវិស័យកសិកម្ម ព្រៃឈើ និងនេសាទនេះ រហូតដល់ ៧២,៣ភាគរយស្មើនឹងជាង៥លាននាក់នៃចំនួនអ្នកមានការងារធ្វើសរុបជាង៦,៩លាននាក់។
សម្រាប់ក្រុមវិស័យការងារដែលមានភាគរយខ្ពស់និងកំណើនវិញ មានវិស័យកម្មន្តសាល ឬផលិតកម្ម បានកើនពី៦,២មកដល់១៣,៣ភាគរយ។ វិស័យពាណិជ្ជកម្មលក់ដុំលក់រាយ, ជួសជុលយានយន្ត និងទោចក្រយានយន្ត បានពី៧,៨ មកដល់១០,៧ភាគរយ និងវិស័យសំណង់ស៊ីវិល ក៏បានកើនពី២ មក៥,២ភាគរយ។
របាយការណ៍ជាតិស្តីពីលទ្ធផលចុងក្រោយនៃជំរឿនទូទៅប្រជាជននៅកម្ពុជា ឆ្នាំ២០១៩ បានបញ្ជាក់៖« អ្នកមានការងារធ្វើនៅក្នុងវិស័យកម្មន្តសាល, វិស័យពាណិជ្ជកម្មលក់ដុំលក់រាយ, ជួសជុលយានយន្ត-ទោចក្រយានយន្ត និងវិស័យសំណង់ស៊ីវិល ក្នុងអំឡុង១១ឆ្នាំកន្លងមក គឺស្ទើតែស្មើបីភាគបួននៃការងារធ្វើការក្នុងវិស័យកសិកម្ម ព្រៃឈើ និងនេសាទ នៅឆ្នាំ២០០៨»។
កម្ពុជាមានពលរដ្ឋជាង១៥,៥៥លាននាក់។ ក្នុងនោះបុរសមានជាង៧,៥៧លាននាក់ និងស្ត្រីជិត៨លាននាក់។ នេះបើតាមលទ្ធផលជំរឿនទូទៅប្រជាជននៅកម្ពុជាឆ្នាំ២០១៩។
កាលឆ្នាំ២០២០ កម្ពុជានាំចេញផលិតផលកសិកម្ម បានក្នុងទំហំទឹកប្រាក់ចំនួន ៤,០៣៧ ពាន់លានដុល្លារ។ ការនាំចេញនោះ មានអង្ករ ផលិតកម្មស្រូវ ដំឡូងមី ស្វាយចន្ទី ស្វាយ កៅស៊ូ ចេក មៀនប៉ៃលិន ម្រេចសំបុកត្រចៀកកាំ ផលិតផលជល ផលិតផលសត្វ ផលិលផលព្រៃឈើ និងទំនិញផ្សេងទៀត។ នេះបើតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ៕