ជាតិ
អ្នកនាំពាក្យ៖ ICC-Angkor បានតាមដានយ៉ាងលម្អិតពីកិច្ចការក្នុងរមណីយដ្ឋានអង្គរ ទោះអាក់ខានប្រជុំព្រោះកូវីដ-១៩
× សៀមរាប៖ គណៈកម្មាធិការអន្ដរជាតិដើម្បីសម្របសម្រួលកិច្ចគាំពារការអភិរក្ស និងអភិវឌ្ឍន៍តំបន់រមណីយដ្ឋានប្រវត្តិសាស្ដ្រអង្គរ ហៅកាត់ថា អាយស៊ីស៊ី-អង្គរ បានរៀបចំកិច្ចបច្ចេកទេសលើកទី៣៤ និងកិច្ចប្រជុំពេញអង្គលើកទី២៧ នាថ្ងៃទី២៦ និង២៧ ខែមករា ឆ្នាំ២០២១ ក្រោយខកខានការប្រជុំនៅឆ្នាំ២០២០។ តាមអ្នកនាំពាក្យអាជ្ញាធរជាតិអប្សរា លោក ឡុង កុសល ដ្បិតថាកិច្ចប្រជុំនេះត្រូវបានពន្យារពេល និងខកខានការជួបជុំក៏ពិតមែន តែអ្នកជំនាញការជាតិ និងអន្ដរជាតិ បានជជែកពិភាក្សាគ្នាតាមរយៈបណ្ដាញប្រព័ន្ធឌីជីថល ដើម្បីជជែកលម្អិតលើការងារនានាលើកិច្ចការអភិរក្ស និងអភិវឌ្ឍន៍រមណីយដ្ឋានអង្គរ។
ក្នុងកិច្ចប្រជុំនារសៀលថ្ងៃទី២៦ ខែមករា នៅសណ្ឋាគារ សូហ្វីតែល អង្គរភូគីត្រា ខេត្តសៀមរាប ដោយមានអ្នកជំនាញការជាតិ អន្ដរជាតិប្រមាណជិត១០០នាក់ ដោយភ្ជាប់ទៅអ្នកជំនាញការអាដហុកអន្ដរជាតិតាមរយៈប្រព័ន្ធ Video Conference។ ក្នុងនោះមានលេខាធិការវិទ្យាសាស្ដ្រអចិន្ដ្រៃយ៍ នាប្រទេសទុយនីស៊ី អ្នកជំនាញការសម្រាប់ការងារអភិរក្ស ពីប្រទេសបារាំង អ៊ីតាលី និងជប៉ុន និងអ្នកជំនាញសម្រាប់ការអភិវឌ្ឍន៍ប្រកបដោយចីរភាព ពីប្រទេសបារាំង និងជប៉ុន។
គួរបញ្ជាក់ថា កិច្ចប្រជុំនេះក៏រួមបញ្ចូលគ្នាជាមួយកិច្ចប្រជុំអាយស៊ីស៊ី-សម្បូរព្រៃគុក ផងដែរ។ កិច្ចពិភាក្សាក្នុងកិច្ចប្រជុំបច្ចេកទេសនាថ្ងៃទី២៦នេះ គឺផ្តោតលើការអភិរក្សនៅតាមការដ្ឋានការងារជួសជុលមួយចំនួន មានដូចជា ការតាមការងារជួសជុលស្ពានហាលអង្គរវត្ត ការជួសជុលព្រះលានជល់ដំរី ការជួសជុលខ្លោងទ្វារខាងលិចប្រាសាទតាព្រហ្ម ការជួសជុលប្រាសាទទន្លេស្ងួត ក៏ដូចជាការងារជួសជុលប្រាសាទមេបុណ្យខាងលិចជាដើម។ល។ អ្នកជំនាញការនៃកិច្ចប្រជុំអាយស៊ីស៊ី-អង្គរ នឹងផ្តល់អនុសាសន៍បន្ថែម ក៏ដូចជាកែលម្អនូវចំណុចខ្វះខាតមួយចំនួន លើគម្រោងជួសជុលទាំងនោះ៕
Tag:
កិច្ចប្រជុំអាយស៊ីស៊ី-អង្គរ
© រក្សាសិទ្ធិដោយ thmeythmey.com