COVID-19
អន្តរជាតិ
ហ្វីលីពីន ហាមក្មេងអាយុ១០ទៅ១៤ឆ្នាំមិនឱ្យចេញពីផ្ទះជាថ្មី ស្របពេលរាលដាលកូវីដ-១៩ ប្រភេទថ្មី
រូបថត Xinhua
×![]()
ដោយ ឈួន ឈីវអ៊ីង
ប្រធានាធិបតីហ្វីលីពីន លោក រ៉ូឌ្រីហ្គោ ឌូទើតេ បានដាក់បម្រាមចេញពីផ្ទះជាថ្មីម្តងទៀតលើក្មេងៗមានអាយុចន្លោះពី១០ទៅ១៤ឆ្នាំ ខណៈហ្វីលីពីនកំពុងប្រយុទ្ធប្រឆាំងនឹងការរីករាលដាលជំងឺកូវីដ-១៩ ប្រភេទថ្មី។
ហ្វីលីពីន បានចេញបម្រាមមិនឱ្យក្មេងអាយុ១០ទៅ១៤ឆ្នាំ ចេញពីផ្ទះតាំងពីការរាលដាលជំងឺកូវីដ-១៩ មក។ ចំណែកក្រុមប្រជាជនដែលមានអាយុលើសពីនោះ ត្រូវរក្សាគម្លាតសុវត្ថិភាពចេញក្រៅផ្ទះ។ យ៉ាងណាមិញ បម្រាមនេះ មិនត្រូវបានអនុវត្តឱ្យបានពេញលេញឡើយ ដោយគេឃើញមានគ្រួសារមួយចំនួន អនុញ្ញាតឱ្យកូនៗចេញមកលេងនៅតាមសួនឧទ្យាន ឬនៅតាមផ្លូវដដែល។
បើតាមទីភ្នាក់ងារព័ត៌មាន AFP កាលពីសប្ដាហ៍មុន ក្រុមការងារប្រយុទ្ធនឹងជំងឺកូវីដ-១៩ របស់ រដ្ឋាភិបាលហ្វីលីពីន បានប្រកាសអនុញ្ញាតឱ្យក្រុមក្មេងៗខាងលើ អាចចេញពីផ្ទះបាន ចាប់ពីខែ កុម្ភៈ តទៅ។ ប៉ុន្តែ លោក ឌូទើតេ នៅថ្ងៃទី២៥ ខែមករា ច្រានចោលការណែនាំថ្មីនេះ ព្រោះលោកមិនចង់ឱ្យ ក្មេងៗទទួលរងហានិភ័យក្នុងការឆ្លងកូវីដ-១៩ប្រភេទថ្មីមកពីចក្រភពអង់គ្លេសឡើយ។ ហ្វីលីពីនមាន ករណីវិជ្ជមានជំងឺកូវីដ-១៩ ទម្រង់ថ្មី ១៧នាក់រួចមកហើយ រួមទាំងក្មេងៗចំនួន៣នាក់ដែរ។
«ចូលក្នុងផ្ទះរបស់អ្នកវិញ ហើយក្មេងៗនឹងរីករាយជាមួយការមើលទូរទស្សន៍។ ពួកគេអាចនឹងចាប់អារម្មណ៍ជាមួយទូរទស្សន៍ពេលមួយថ្ងៃ។» ប្រធានាធិបតីហ្វីលីពីន រ៉ូឌ្រីហ្គោឌូទើតេ បានលើកឡើងដូចនេះ នៅពេលចេញការហាមប្រាមមិនឱ្យក្មេងៗអាយុពី១០ទៅ១៤ឆ្នាំចេញពីផ្ទះ។ លោកអះអាងថា លោកមានការព្រួយបារម្ភណាស់ ពីព្រោះជំងឺកូវីដ-១៩ បំប្លែងខ្លួនថ្មីនេះក៏ឆ្លងទៅក្មេងៗដែរ។
ហ្វីលីពីនបានក្លាយជាប្រទេសមានអត្រាឆ្លងច្រើនជាងគេមួយនៅក្នុងអាស៊ីអាគ្នេយ៍ ជាមួយករណីវិជ្ជមានសរុបចំនួន ៥១៦,១៦៦ករណី ខណៈអ្នកស្លាប់មានចំនួនជាង១ម៉ឺននាក់ គិតមកត្រឹមថ្ងៃទី២៧ មករានេះ៕
Tag:
ហ្វីលីពីន
កូវីដ-១៩
© រក្សាសិទ្ធិដោយ thmeythmey.com
