COVID-19
ជាតិ
សេដ្ឋកិច្ច
COVID-19៖ មន្ត្រីសេដ្ឋកិច្ច ពន្យល់មូលហេតុសេដ្ឋកិច្ចកម្ពុជាធ្លាក់ចុះ ខណៈឡាវ មីយ៉ាន់ម៉ា និងវៀតណាម នៅរក្សាលេខបូក
× ភ្នំពេញ៖ កូវីដ-១៩ បានជះឥទ្ធិពលអវិជ្ជមានខ្លាំង ទៅលើសេដ្ឋកិច្ចពិភពលោក។ បើនិយាយដោយឡែកវិញ ប្រទេសក្នុងតំបន់អាស៊ាន ក៏ជួបបញ្ហាសេដ្ឋកិច្ចខ្លាំងដែរ លើកលែងតែប្រទេស៣ប៉ុណ្ណោះ គឺវៀតណាម ឡាវ មីយ៉ាន់ម៉ា នៅរក្សាលេខបូក។ ចំណុចនេះ នាំឱ្យមានការចោទសួរពីគ្រប់គ្រងសេដ្ឋកិច្ចនៅកម្ពុជា ធៀបទៅប្រទេសទាំង៣នេះ។
លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានបកស្រាយថា មូលហេតុដែលនាំឱ្យកំណើនសេដ្ឋកិច្ចកម្ពុជា ធ្លាក់ចុះរហូតដល់ ដក២ភាគរយ (-២%) កាលពីឆ្នាំ២០២០នេះ ដោយសារបញ្ហាទេសចរណ៍ និងលំហូរវិនិយោគទុន(Foreign Direct Investment) រួមទាំងការបញ្ជាទិញផ្នែកឧស្សាហកម្មថមថយ ខណៈកូវីដ-១៩ កំពុងរាតត្បាត។ លោក វិស្សុត បន្ថែមថា វិស័យទេសចរណ៍កម្ពុជា គឺជាសរសេរស្ដម្ភសំខាន់សម្រាប់សេដ្ឋកិច្ចជាតិ ដែលស្មើនឹង១៨ភាគរយនៃផលិតផលក្នុងស្រុកសរុប (GDP) ខណៈដែលលំហូរទុនវិនិយោគ ១៣ភាគរយ នៃGDP។ ដោយសារការធ្លាក់ចុះវិស័យទាំងពីរនេះហើយ ទើបធ្វើឱ្យសេដ្ឋកិច្ចកម្ពុជាប្រឈមមុខបញ្ហា ស្របពេលដែលការនាំចេញទៅក្រៅប្រទេសឡើងរហូតដល់១២០ភាគរយ ។
សូមស្ដាប់ការបកស្រាយរបស់លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ៖
ងាកទៅនិយាយពីសេដ្ឋកិច្ចវៀតណាមវិញ លោក វង្សី វិស្សុត ពន្យល់ថា វៀតណាមអាចរក្សាលំនឹងនិងទប់ស្កាត់ផលប៉ះពាល់សេដ្ឋកិច្ចបាននេះ ដោយសារលំហូរទុនវិនិយោគខ្ពស់ ពីក្រុមហ៊ុនបរទេសនៅប្រទេសចិន ។ បើតាមលោក វិស្សុត សេដ្ឋកិច្ចវៀតណាម គឺពឹងផ្អែកលើលំហូរទុនវិនិយោគនេះ ជាងចរន្តទេសចរណ៍។ ត្រង់ចំណុចនេះលោក វិស្សុត បានសង្កត់ធ្ងន់ថា វៀតណាម ប្រៀបដូចជាកូនក្រមុំមួយរូប ដែលរង់ចាំការវិនិយោគពីក្រុមហ៊ុននៅចិន ខណៈដែលចិនជួបបញ្ហាសង្គ្រាមសេដ្ឋកិច្ចជាមួយអាមេរិកកន្លងមក។
ចំណែកសេដ្ឋកិច្ចឡាវ ក៏អាចរក្សាលេខបូកបានដែរ ព្រោះឡាវ មិនមែនជាប្រទេសនាំចេញ និងមិនសូវមានផលប៉ះពាល់លើវិស័យទេសចរណ៍ធំដូចកម្ពុជា។ មិនតែប៉ុណ្ណោះ ឡាវ ក៏ជាប្រទេសផ្គត់ផ្គង់អគ្គិសនីក្នុងតំបន់ រួមទាំងតម្លៃរ៉ែមាសក្នុងស្រុកមានតម្លៃខ្ពស់ ដែលអាចជួយឱ្យប្រទេសមានតង់ស៊ីតេប្រជាជនជាង៧លាននាក់នេះ គ្រប់គ្រងស្ថានភាពសេដ្ឋកិច្ចបាន។ នេះបើតាមរដ្ឋលេខាធិការក្រសួងសេដ្ឋកិច្ច ដែលបានបន្ថែមថា កម្ពុជា វៀតណាម និងឡាវ អាចគ្រប់គ្រងស្ថានការណ៍កូវីដ-១៩ បាន ខណៈស្ថានភាពជំងឺរាតត្បាតនេះ នៅមីយ៉ានម៉ា មានភាពស្រពិចស្រពិល។
ក្នុងន័យនេះលោក វិស្សុត បានបញ្ជាក់ថា ដ្បិតស្ថានភាពសេដ្ឋកិច្ចមីយ៉ាន់ម៉ា នៅរក្សាកម្រិតមួយល្អក្តី ប៉ុន្តែការគ្រប់គ្រង់ស្ថានភាពកូវីដ-១៩ មិនទាន់ល្អនេះ វាអាចទាញទម្លាក់សេដ្ឋកិច្ចប្រទេសមួយនេះ ជាក់ជាមិនខាននាពេលខាងមុខ។
គួរបញ្ជាក់ថា កំណើនសេដ្ឋកិច្ចវៀតណាម ស្ថិតនៅក្នុងរង្វង់ជាង២ភាគរយ នៃទំហំសេដ្ឋកិច្ច ២៦០ពាន់លានដុល្លារអាមេរិក នៅក្នុងឆ្នាំ២០២០។ ចំណែក ឡាវ នៅ ០,៧ភាគរយ នៃទំហំសេដ្ឋកិច្ច ១៧ពាន់លានដុល្លារ ខណៈមីយ៉ាន់ម៉ា នៅរង្វង់១,៨ ភាគរយ នៃទំហំ ៧៥ពាន់លានដុល្លារ។ រីឯសេដ្ឋកិច្ចកម្ពុជា ធ្លាក់ចុះ ដក២ភាគរយ នៃទំហំសេដ្ឋកិច្ច ២៧ពាន់លានដុល្លារ ៕
Tag:
សេដ្ឋកិច្ច
COVID-19
© រក្សាសិទ្ធិដោយ thmeythmey.com