នាយករដ្ឋមន្ត្រីជប៉ុនសុំទោស បន្ទាប់ពីសមាជិកសភាបក្សកាន់អំណាចចូលក្លិបអំឡុងពេលកូវីដ-១៩ រាលដាល

COVID-19

អន្តរជាតិ

នាយករដ្ឋមន្ត្រីជប៉ុនសុំទោស បន្ទាប់ពីសមាជិកសភាបក្សកាន់អំណាចចូលក្លិបអំឡុងពេលកូវីដ-១៩ រាលដាល

27, Jan 2021 , 5:59 pm

រូបភាព

នាយករដ្ឋមន្រ្តីជប៉ុន លោក ស៊ូហ្កា យូស៊ីហ៊ីដេ។ រូបភាព៖ EPA-EFE

ដោយ: ធៀន ភារិន្ទ

នាយករដ្ឋមន្ត្រីជប៉ុន លោក ស៊ូហ្កា យូស៊ីហ៊ីដេ នៅថ្ងៃទី២៧ ខែមករា បានសុំទោសជាសាធារណៈ បន្ទាប់ពីសមាជិកសភាចេញមកពីបក្សប្រជាធិបតេយ្យសេរី (LDP) របស់លោក បានចូលកម្សាន្តក្នុងក្លិបរាត្រី ក្នុងអំឡុងពេលជប៉ុន ដាក់ខេត្ត និងក្រុងចំនួន១១ ក្នុងស្ថានភាពអាសន្ន។ ការចូលក្លឹបរាត្រីរបស់សមាជិកសភានេះ ផ្ទុយទៅនឹងការអំពាវនាវរបស់រដ្ឋាភិបាលជប៉ុន ក្នុងការទប់ស្កាត់កូវីដ-១៩ ដែលកំពុងរាលដាលយ៉ាងខ្លាំងនៅក្នុងប្រទេស។

អត្ថបទទាក់ទង

ជប៉ុន ដាក់ខេត្ត៧ទៀត ក្នុងស្ថានភាពអាសន្នដើម្បីទប់ស្កាត់កូវីដ-១៩

ជប៉ុន ប្រកាសដាក់ទីក្រុងតូក្យូ និងខេត្តបីទៀតក្នុងស្ថានភាពអាសន្នជាថ្មី

«ខ្ញុំពិតជាសុំទោសចំពោះបញ្ហាកើតឡើង ស្របពេលយើងស្នើឲ្យប្រជាជនកុំទៅបរិភោគអាហារខាងក្រៅ នៅក្រោយម៉ោង ៨យប់ និងចៀសវាងការចេញទៅក្រៅ ក្នុងករណីមិនចាំបាច់មួយចំនួន»។ លោក ស៊ូហ្កា យូស៊ីហ៊ីដេ ថ្លែងបែបនេះទៅកាន់កិច្ចប្រជុំសភានៅថ្ងៃទី២៧ ខែមករា ជាការសុំទោសចំពោះទង្វើមិនគប្បីរបស់សមាជិកសភាបក្ស LDP ដែលលោកជាប្រធានផ្ទាល។

បើតាមការបញ្ជាក់របស់លោកនាយករដ្ឋមន្ត្រី សមាជិកសភាម្នាក់ៗ គួរធ្វើសកម្មភាពឲ្យបានត្រឹមត្រូវ ដើម្បីបង្កើនការយល់ដឹងរបស់សាធារណជន។

ការសុំទោសរបស់លោកស៊ូហ្កាជាសាធារណៈបែបនេះ ធ្វើឡើងបន្ទាប់ពីសមាជិកសភាចេញមកពីបក្សប្រជាធិបតេយ្យសេរីជាច្រើនរូប បានចូលទៅកម្សាន្តក្នុងក្លិបរាត្រី បើទោះបីរដ្ឋាភិបាលបានអំពាវនាវ កុំឲ្យប្រជាជនដើរទៅក្រៅផ្ទះផ្តេសផ្តាស ក្នុងអំឡុងពេលកូវីដ-១៩ ក៏ដោយ។ កន្លងមក ជប៉ុន បានប្រកាសដាក់ខេត្ត និងក្រុងចំនួន១១ ក្នុងស្ថានភាពអាសន្ន រហូតដល់ថ្ងៃទី៧ ខែកុម្ភៈ ដើម្បីជាផ្នែកមួយនៃការទប់ស្កាត់ជំងឺឆ្លង។

សារព័ត៌មានក្នុងស្រុកជប៉ុន បានចុះផ្សាយថា រដ្ឋាភិបាលអាចនឹងពន្យារថ្ងៃដាក់តំបន់ក្នុងស្ថានភាពអាសន្នថែមទៀត ដោយសារជំងឺឆ្លង មិនទាន់អាចស្ថិតនៅក្រោមការគ្រប់គ្រងបាន។

ក្រៅពីការសុំទោសរបស់ប្រមុខរដ្ឋាភិបាល សមាជិកសភា ដែលត្រូវបានសារព័ត៌មានជប៉ុនចុះផ្សាយថា បានចូលក្នុងក្លិបរាត្រី បានចេញមុខមកសុំទោសជាសាធារណៈជាបន្តបន្ទាប់។ លោក Jun Matsumoto សមាជិកសភាមកពីបក្ស LDP និង លោក Kiyohiko Toyama សមាជិកសភាមកសម្ព័ន្ធភាពបក្សKomeito បានទទួលស្គាល់ពីកាយវិការខុសឆ្គងរបស់ខ្លួន។

ដ្បិតមានការសុំទោសពីសមាជិកសភាក្តី ប៉ុន្តែប្រជាជនជប៉ុនមួយចំនួន ដែលសរសេរលើបណ្តាញសង្គម Twitter ពីភាពមិនពេញចិត្តរបស់ខ្លួន និងទាមទារឲ្យសមាជិកសភាទាំងនោះចុះចេញពីតំណែង។ អ្នកប្រើប្រាស់បណ្តាញសង្គមTwitter ម្នាក់ បានទាមទារឲ្យសមាជិកសភាទាំងនោះ ចុះចេញពីតំណែង ដោយសារតែអ្នកទាំងនោះ មិនបានគិតពីទង្វើរបស់ខ្លួន និងមិនសាកសមជាតំណាងរបស់សាធារណៈ។

សូមបញ្ជាក់ថា ជប៉ុន នៅថ្ងៃទី២៦ ខែមករា មានករណីឆ្លងកូវីដ-១៩ ចំនួន ៣៣៣០ និងអ្នកស្លាប់ចំនួន ៧៤នាក់។ ករណីសរុបនៅជប៉ុនមានចំនួនជាង ៣៦ម៉ឺននាក់ និងអ្នកស្លាប់មានចំនួនជាង ៥ពាន់ករណី។ ចំណែកអ្នកជាសះស្បើយមានចំនួនជាង ៣០ម៉ឺននាក់៕